بۇگىنگى جالپىۇلتتىق ازا تۇتۋ كۇنىندە - مەملەكەتتىگىمىزدى قورعاۋ جولىندا قاندىبالاق لاڭكەستەر قولىنان قۇربان بولعان جازىقسىز بوزداقتار مەن بەيبىت تۇرعىنداردىڭ رۋحىنا تاعزىم ەتە وتىرىپ، بالا كەزدە اكەم مارقۇمنان ەستىگەن ءبىر اڭىزدى ەسكە الدىم.

بىردە ىبىلىستەن قۇدايدىڭ ءبىر قاراپايىم پەندەسى:

-سەنىڭ كىرمەيتىن ەسىگىڭ مەن تەسىگىڭ، بۇلدىرمەيتىن ورتاڭ، شاتاستىرمايتىن شارۋاڭ، اۋىستىرمايتىن ميىڭ،

الدامايتىن، ازعىرمايتىن، الجاستىرمايتىن ادامىڭ،

شالىس باستىرمايتىن قادامىڭ جوق!

قاشان، قايدا بارساڭ دا ويىڭا كەلگەنىڭدى ىستەيسىڭ، امىسە دەگەنىڭ بولادى. وسى دۇنيەدە سەن قورقاتىن نە بار؟-دەپ سۇراعان ەكەن.

سوندا اتىڭ وشكىر ءىبىلىس:

-مەنىڭ قورقاتىنىم - ادامداردىڭ ىنتىماق بىرلىگى! ەگەر ادامزات بالاسى ءبىر بىرىمەن ءتىل تابىسىپ، تاتۋ-ءتاتتى تۇرىپ، قويان-قولتىق جاقىنداسىپ، قاۋىشىپ، تىزە قوسىپ- بىرىگىپ كەتسە - مەن ولاردىڭ اراسىنا تۇمسىق تىعا الماي، دەندەپ كىرە الماي، تۇلەن بوپ تۇرتە الماي، ىرگەدەن ىشكە ىرىتكى سالا الماي، ارام ءىس، شايتاني شارۋام تۇسالىپ، بۇلىگىم تۇنشىعىپ، ۇرىس-كەرىسىم تۇتانباي، لاجسىز پۇشايمان بولىپ قالامىن،- دەپ جاۋاپ بەرگەن ەكەن.

"التاۋ الا بولسا - اۋىزداعى كەتەدى، تورتەۋ تۇگەل بولسا - توبەدەگى كەلەدى" دەگەن وسى.

ارداقتى الاش ەلى، بىرلىگىمىز بۇلجىماسىن، ارامىزدان ارامزا تۇگىلى قىل وتپەسىن!

شايتاننىڭ شاتاعىنان، ءىبىلىستىڭ ىرىتكىسىنەن ساق بولايىق!

ەلىمىزدىڭ باسىنا كۇن تۋىپ، تاۋەلسىزدىگىنە قاتەر تونگەن بۇگىنگىدەي سىن كەزەڭدە - بىرلىكتەن بەرىك قالقان، ىنتىماقتان كۇشتى قارۋ جوق!

ۇلىقبەك ەسداۋلەت

10.01.2021

Abai.kz