پرەزيدەنت قاسىم-جومارت توقاەۆ كەشەگى پارلامەنت ءماجىلىسىنىڭ پلەنارلىق وتىرىسىندا سويلەگەن سوزىندە: «كوشى-قون، سونىڭ ىشىندە ىشكى كوشى-قون سالاسىن تارتىپكە كەلتىرەتىن كەز كەلدى»، - دەدى.

وسىعان بايلانىستى، قانداستارىمىزدىڭ الاڭداپ جاتقانىن مەن جاقسى بىلەمىن. ارينە، قانداستارىمىزدىڭ دا، جالپى الاش جۇرتىنىڭ دا الاڭدايتىن دا ءجونى بار.

سەبەبى، 2011 جىلعى «جاڭاوزەن وقيعاسى» كەزىندە تيمۋر قۇلىباەۆ: «ەگەر ەرەۋىلشىلەردىڭ جەتەكشىلەرى تۋرالى ايتاتىن بولساق، ول جاقتا الماتىدان بارعاندار جەتەكشىلىك ەتىپ جۇرگەن جوق. ولاردا وزدەرىنىڭ قاراقالپاقستاننان بىرگە كەلگەن رەسمي ەمەس جەتەكشىلەرى بار. ول جاققا كەلەتىن ادامدار سانىن باياعىدا-اق، شەكتەۋ كەرەك ەدى»، – دەگەن بولاتىن.

تيمۋر قۇلىباەۆتىڭ بۇل جالاسىن نەگىزگە العان كارىم ءماسىموۆ ۇكىمەتى 2013 جىلى جەلتوقساندا قانداستارىمىزعا ءتورت جىلسىز ازاماتتىق بەرىلمەيتىن قاتاڭ زاڭ قابىلداتۋمەن تىنعان بولاتىن. بۇل – ءبىر.

ەكىنشىدەن، جاڭا جاساقتالعان ۇكىمەت قۇرامىندا شاش ال دەسە، باس الاتىنداردىڭ بار ەكەنىن كوردىك...

ەڭ قۋانىشتىسى – سول – وزدەرىڭىز دە كورىپ وتىرسىزدار، قازاق كوشىنە قارسى بولىپ كەلگەن كارىم ءماسىموۆ قاماققا الىندى، تيمۋر قۇلىباەۆتىڭ ساياسي ىقپالى السىرەدى.

قازاق كوشىنە قارسى بولعانداردىڭ تاعدىرى نەمەن اياقتالعانىن تۇسىنەتىن كەز جەتتى!

ال، «شەتەلدەگى قانداستارىمىزدى ەلگە قايتارۋ ءىسى ەشقاشان نازاردان تىس قالعان ەمەس، قالمايدى دا. دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز»، - دەگەن قاسىم-جومارت كەمەلۇلىنىڭ ونداي قادامعا بارماسى ايدان انىق!

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى سالاسىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ جوباسى وتكەن جىلدىڭ توعىزىنشى قاراشاسىندا ءماجىلىس تالقىسىنا ءتۇستى.

ەندىگى جەردە پرەزيدەت كوشى-قون، سونىڭ ىشىندە ىشكى كوشى-قون سالاسىنا قاتىستى زاڭدار مەن نورماتيۆتىك قۇجاتتاردى جەتىلدىرە ءتۇسىپ، كوشىپ كەلۋشىلەر مەن قونىس اۋدارۋشىلارعا ءتيىمدى شارت-جاعداي جاساۋعا باسىمدىق بەرەدى دەپ ويلايمىن...

ۋاقىتتىڭ سىركەسى سۋ كوتەرمەي تۇرعان وسىناۋ قيىن كەزەڭدە مەن قانداستارىمدى سابىرلى بولىپ، پرەزيدەنتتى قولداۋعا شاقىرامىن!

اۋىت مۇقيبەك

Abai.kz