– تەرگەۋ ورگاندارى وقيعانىڭ جاي-جاپسارىن قالپىنا كەلتىرىپ جاتىر. باستاپقى كەزەڭدە نارازىلار وزدەرىن بەيبىت ۇستادى. وندا ءجاي جۇرگەن ادامدار كوپ بولدى. وقيعا تارتىپسىزدىككە ۇلاسادى دەپ ەشكىم ويلاماعان. الايدا كەيىن وقيعاعا قىلمىستىق تۇلعالار مەن بۇزاقى توپتار ارالاسا باستادى. ولار تىزگىندى قولىنا الىپ، بەلسەندىرەك ارەكەتتەرگە ارانداتا باستادى، – دەدى ارنايى پروكۋرورلار قىزمەتىنىڭ باستىعى ريزابەك وجاروۆ.

ول سونىمەن بىرگە "ارەكەتتەردىڭ ۇيلەستىرىلگەنىن" اتاپ ءوتىپ، قازاقستان "گيبريدتى شابۋىلعا ۇشىرادى" دەپ مالىمدەدى.

– ۇيىمداستىرۋشىلار وزدەرىنىڭ جوسپارلارىنا دەسترۋكتيۆتى جانە قىلمىستىق توپتاردى تارتىپ، ولارعا قارۋ بەرىپ، ءىس-ارەكەتتەرىن ۇيلەستىرىپ وتىرعان. قازىرگى تاڭدا 18 ۇيىمداسقان قىلمىستىق توپتىڭ مۇشەسى، ادام ءولتىرۋ، ۇرلىق، توناۋ جانە قاراقشىلىق جاساعانى ءۇشىن بۇرىن سوتتى بولعان 21 تۇلعا ۇستالدى. ولاردىڭ قاتارىندا "ديكي ارمان" لاقاپ اتىمەن تانىمال جۇماگەلديەۆ جانە ونىڭ توپ مۇشەلەرى دە بار. بۇل تۇلعا تۋرالى جەكە توقتالىپ وتەيىن. ونىڭ قارۋلانعان ادامدارى كەزدەيسوق ءوتىپ بارا جاتقان 24 بەيبىت تۇرعىندى ۇرلاپ، كۇشتەپ ۇستاعان. ولاردى ءبىر جەردەن ەكىنشى جەرگە اپارىپ، ۇرىپ-سوققان، ناتيجەسىندە ءبىر ادام قازا بولعان. بۇدان باسقا، قاراقشىلار 12-ءشى قالالىق اۋرۋحانادا پوليتسيا قىزمەتكەرىن قاتتى سوققىعا جىعىپ، قىزمەتتىك قارۋىن تارتىپ العان، - دەدى باس پروكۋراتۋرا وكىلى.

وجاروۆ سونىمەن بىرگە الماتى مەن جامبىل وبلىستارىندا پوليتسيا قىزمەتكەرلەرىنىڭ "مەملەكەتتىك مۇددەسى مەن قوعام قاۋىپسىزدىگىنە قايشى" ارەكەت ەتىپ، قارۋ-جاراق پەن وق ءدارى بولعان پوليتسيا دەپارتامەنتى عيماراتتارىن تاستاپ كەتكەنىن ايتتى. ناتيجەسىندە قولدى بولعان 1,5 مىڭ قارۋدىڭ 967-ءى عانا تابىلعان.

- بۇعان قوسا، ۇلتتىق قاۋىپسىزدىك كوميتەتىنىڭ الماتى، الماتى وبلىسى جانە قىزىلوردا وبلىسىنداعى دەپارتامەنت باستىقتارى ارەكەتسىزدىك تانىتتى. ءبىز كەيبىر كۇشتىك ورگان جەتەكشىلەرىنىڭ ءتارتىپتى ساقتاۋى ءتيىس بولعان ارنايى جاساق ارەكەتىن ادەيى تەجەگەن دەگەن بولجامدى قاراستىرىپ وتىرمىز، – دەدى وجاروۆ.

ۇلتتىق قاۋىپسىزدىك كوميتەتى قازىرگى كەزدە "مەملەكەتكە وپاسىزدىق جاساۋ جانە بيلىكتى كۇشپەن باسىپ الۋ تالپىنىسى" بويىنشا قىلمىستىق ءىستى تەرگەپ جاتىر. بۇعان دەيىن ۇقك بۇرىنعى جەتەكشىسى كارىم ءماسىموۆ، ونىڭ ەكى ورىنباسارى ءانۋار سادىقۇلوۆ پەن داۋلەت ەرعوجين قاماۋعا الىنعان.

بۇعان قوسا، 7 اقپاندا ۇلتتىق قاۋىپسىزدىك كوميتەتى "ا" ارنايى تاعايىنداۋ قىزمەتى ديرەكتورىنىڭ ءبىرىنشى ورىنباسارى جانە قىزمەت ورتالىعىنىڭ باستىعى بيلىك وكىلەتىن اسىرا پايدالانۋ بابى بويىنشا ۇستالعانى بەلگىلى بولدى. ولارعا قوزعالعان قىلمىستىق ىستەر "قۇپيا" جۇرگىزىلۋى ءتيىس ىستەر قاتارىندا.

باس پروكۋراتۋرا وكىلدەرى قاڭتار وقيعاسى كەزىندە "ساياسي ەكسترەميزم" بەلگىلەرى دە بولدى دەپ سانايدى.

– ءتىپتى قوعام جانە ازاماتتىق بەلسەندىلەر دەپ سانالاتىندار دا، نارازىلىقتاردىڭ باستاپقى كەزەڭىن پايدالانىپ، تىزگىندى الۋعا تىرىسقان. بۇل رەتتە تىيىم سالىنعان "قدت/كوشە" اتتى ەكسترەميستىك ۇيىمىنىڭ مۇشەلەرى جاپپاي تارتىپسىزدىكتەرگە بەلسەنە يتەرمەلەگەن. جالپى ۇستالعانداردىڭ اراسىندا 35 تىيىم سالىنعان ەكسترەميستىك اعىمداردىڭ مۇشەلەرى انىقتالدى، – دەدى وجاروۆ. (ەۋروپارلامەنت اتالعان ەكى ۇيىمدى "بەيبىت وپپوزيتسيالىق ۇيىمدار" دەپ اتاپ، قۇقىق قورعاۋشىلار ۇيىمنىڭ جاقتاستارىن قۋدالاماۋعا ۇندەگەن).

بۇعان دەيىن قازاقستان بيلىگى قاڭتار وقيعاسى كەزىندە "سىرتقى كۇشتەردىڭ" ارەكەت ەتكەنىن دە مالىمدەگەن. باس پروكۋراتۋرانىڭ دۇيسەنبىلىك بريفينگىسىندە "سىرتقى كۇشتەر" تۋرالى ايتىلعان جوق.

ريزابەك وجاروۆتىڭ ايتۋىنشا، قاڭتار وقيعاسىن زەرتتەيتىن ۆەدومستۆوارالىق تەرگەۋ توبى ەلدىڭ 8 ايماعىندا جۇمىس ىستەپ جاتىر: الماتى قالاسى، شىمكەنت، الماتى وبلىسى، جامبىل، اتىراۋ، اقتوبە، قىزىلوردا جانە شىعىس قازاقستان وبلىسى.

Abai.kz