قاڭتار قاندى قىرعىنىنان كەيىن ءبارىمىز دە وزگەردىك دەپ جاتىرمىز. مەن دە ءدال سونداي كۇي كەشىپ ءجۇرمىن: نە ۇيقى جوق، نە مازا جوق. سانانى نەبىر استىرتىن جورامالدار جاۋلاپ العان. ەڭ باستىسى، وققا ۇشقان جانە ازاپتالىپ جاتقان بەيبىت شەرۋشىلەرگا قاتىستى اششى سۇراقتارعا ءجوندى جاۋاپ جوق!

ولەڭ دە تۋا قويمادى. "الماتىنى تۇمان باستى" دەپ ءبىر ولەڭ عانا جازا الدىم. بار ويىمدى ماقالالار مەن سۇحباتتاردا ايتىپ جاتىرمىن. جىر قالامى بولسا، بۇل كۇندەرى قاڭتارۋلى كۇيدە قالدى...

سوندىقتان بۇگىن، قاندى قىرعىن قۇرباندارىنىڭ قىرقى كۇنى، وسىدان تۋرا 10 جىل بۇرىن، جاڭاوزەن قاندى تراگەدياسىنان 40 كۇن وتكەندە جازعان ولەڭىمدى جاريالاپ وتىرمىن.وكىنىشكە وراي، تراگەديالار قايتالانۋدا!

وسى كۇنگى ميتينگتەرگە قاتىستى ايتارىم مىناۋ. قاڭتار قاندى قىرعىنى بەيبىت شەرۋلەر مەن ميتينگىلەردى بيلىك تە، ءۇشىنشى كۇشتەر دە وزدەرىنىڭ ارام ويلارىن جۇزەگە اسىرىپ، قۇيتىرقى ارانداتۋلارعا بارا الاتىنىن اپ-انىق كورسەتتى. قانشاما ادام قىرىلدى، زارداپ شەكتى. سول قاۋىپتىڭ بۇلتى ءالى دە سەيىلگەن جوق! بيلىك ءترازيتى ءالى دە اياقتالعان جوق! انتيتوقاەۆشىل كۇشتەر، كەشەگى زامانىن اڭساپ، قايتارعىسى كەلىپ، كەز كەلگەن سۇمدىققا بارۋى مۇمكىن. ول ءۇشىن بەيبىت ادامداردى پايدالانۋى دا مۇمكىن! ماعان بولسا، ءار قازاقتىڭ اماندىعى كەرەك!

جاڭاوزەن. قىرىق كۇن

كوزىم جاسقا جۋىلىپ تۇر، تۇنىپ تۇر،
كەرەگى جوق ناسيحات پەن ۇگىتتىڭ!
ساياساتتان جولى بيىك ءاردايىم
قۇربانداردى قادىر تۇتار عۇرىپتىڭ!
قىرىق كۇن!

قارس ايرىلعان جۇرەگىمدى كىم ۇقتىڭ؟
ەي، اقوردا، نەگە سونشا قۇنىقتىڭ؟
قاندى كولدى قىلمەسكەردى تابۋعا
جەتپەيدى مە ساعان، ايتشى، قىرىق كۇن؟!
قىرىق كۇن!

مەن شىندىق پەن شەرۋلەردە شىنىقتىم،
كىشىكپىن مەن، كەرەك بولسا، ۇلىقپىن.
ەلۋ جىلىڭ ءادىرام بوپ قالسىنشى،
ەلدى بۇگىن جاڭارتتى عوي قىرىق كۇن!
قىرىق كۇن!

ساعان دەيىن بەيشارا بوپ ءجۇرىپپىن،
جاتقا سىيلاپ باسىن مايلى جىلىكتىڭ!
قازاعىمنىڭ قانىن سورعان سۇلىك كىم؟
قازاعىمنىڭ قانىن توككەن جۇلىك كىم؟
قىرىق كۇن!

مەن دە سەنسىز بەيمالىم كۇن ءسۇرىپپىن
ورتاسىندا بىلىق پەنەن شىلىقتىڭ.
قازاقىلىق دەگەندى مەن قولدايمىن،
قۇرسىن ءتۇرى تەك «قازاقباي-شىلىقتىڭ»!
قىرىق كۇن!

ۇزىلمەسىن التىن ءجىبى ءۇمىتتىڭ!
كۇناھاردىڭ اتىن اتار ءبىلىپ كىم؟
جەسىر مەنەن جەر داۋى بار قازاقتا
قىرىق كۇننىڭ ارتىندا تۇر قىرىق قۇن!
قىرىق كۇن!

توتەنشە بوپ ءتوندى ۇستىڭنەن قىرىق ءتۇن.
سەن دەگەندە ۇيقىمدى دا ۇمىتتىم.
وزەنىمە بارا الماسام، مىگىتپىن!
وزەنىمە بارا قالسام، جىگىتپىن!
قىرىق كۇن!

قىلمىسكەرگە تابادى ەكەن قۇرىق كىم؟
قاشان اتار وزەنىمدە كۇلىپ كۇن؟
قىرىق كۇندە كوزىن اشتىڭ قازاقتىڭ،
تانىتتىڭ سەن قاسيەتىن ءبىر ۇلتتىڭ!

بەكەت اتا ءباتۋاسى قونسا ەكەن،
و، قۇدايىم، ەلگە بوستان بەرسە ەكەن!
اداي مالاي ەمەستىگىن كورسەتتىڭ،
قازاق مازاق ەمەستىگىن كورسەتەم!

ءامىرجان قوسان

Abai.kz