جاقىندا «egov.press» پورتالىندا تاعى ءبىر پەتيتسيا جاريالاندى. بۇل جولى نىساناعا ىلىنگەن شەندى – قر ىشكى ىستەر ءمينيسترى ەرلان تۇرعىمباەۆ بولعان. «بۇل ماسەلەنى قر پرەزيدەنتى شەشە الادى»، - دەپ كورسەتىلگەن پەتيتسيا – 12 اقپان كۇنى جاريالانعان.

كۇنى بۇگىنگە دەيىن اتالعان پەتيتسياعا 3,5 مىڭنان استام ادام قول قويىپتى. پەتيتسيا اۆتورى – توقمۋرزين دوستيار دۇيسەمبايۇلى دەپ كورسەتىلگەن.

پەتيتسيا ماتىنىندە: «ازاپتاۋعا، ءتۇرلى زاڭسىزدىقتارعا جول بەرگەن ءىىم ءمينيسترى ەرلان تۇرعىنباەۆ وتستاۆكاعا كەتۋى ءتيىس.

06.01.2022 جىلى كەشكى ۋاقىتتا «حالىق تەرروريست ەمەس» دەگەن ۇلكەن جازۋمەن الاڭدا تۇعان بەيبىت حالىققا ەسكەرتۋسىز وق اتىلدى دەگەن شاعىمدار مەن حابارلامالاردى، دالەلدەردى ءجىتى تەكسەرۋ قاجەت. دالەلدەنگەن جاعدايدا بەيبىت حالىققا وق اتقاندار قىلمىستىق جاۋاپقا تارتىلۋى كەرەك. سونداي-اق، 07.01.2022, 08.01.2022 جىلى ولتىرىلگەندەردىڭ قانداي جاعدايدا، كىمنىڭ قولىنان قازا تاپقاندارىن تولىق انىقتاۋ كەرەك. اۋىر قىلمىسقا قاتىسى جوق ميتينگىگە قاتىسقانداردىڭ ءبارىن تۇگەلدەي بوستاندىققا شىعارۋ كەرەك»، - دەپ جازىلعان.

اتالعان پەتيتسياعا قاتىستى 400-گە جۋىق پىكىر جازىلىپتى. ولاردىڭ باسىم بولىگى مينيستر ەرلان تۇرعىمباەۆتىڭ دوعارىسقا كەتۋىن تالاپ ەتسە، پىكىرشىلەردىڭ ەكىنشى جارتىسى تۇرعىمباەۆ جۇمىسىنا كوڭىلدەرى تولاتىندارىن جازعان.

پىكىرشىلەردىڭ ءبىر بولىگى: «قۇقىق قورعاۋ ورگاندارىنا سەنىم جوق. بالىق باسىنان ءشىريدى»، «قانشاما جازىقسىز ادامدار قۇربان بولىپ، قانشاماسى تۇرمەلەردە ازاپتالىپ جاتىر»، «قازاقستاندا ازاپتاۋعا جول جوق»، «سوتتاۋ كەرەك! قازاقستانعا گەستاپو ەمەس، دەموكراتيالىق ءىىم كەرەك»،  -دەيدى.

ال پىكىرشىلەردىڭ ەكىنشى بولىگى: «ەرلان زامانبەكۇلى تۇرعىمباەۆ ءوزىنىڭ قىزمەتىنە ادال جانە ىسكەر مامان! تەك پوليتسيانىڭ عانا ەمەس حالىقتىڭ دا جاعدايىن جاقسارتۋعا ءوزىنىڭ شەكسىز ۇلەسىن قوسقان تۇلعا!»، «جاقسى مينيستر پوليتسيا قىزمەتكەرلەرىنىڭ يميدج جاقسارتتى»، «جاقسى رەفورمالار جۇرگىزىپ جاتىر»، «وسىنداي قيىن جاعدايدا ءىىم ءمينيسترى ەلدە ءتارتىپتى ساقتاۋ ءۇشىن ۇلكەن جۇمىس ىستەدى»، - دەيدى.

ەرلان تۇرعىمباەۆتىڭ دوعارىسقا كەتۋىن تالاپ ەتۋ كەشە-بۇگىن عانا ايتىلىپ وتىرعان جوق. قاسىرەتتى قاڭتار وقيعاسىنان كەيىن، تەرگەۋگە اكەتىلىپ، ازاپتاۋعا ۇشىراعان جاندار جايلى ءتۇرلى اقپاراتتار الەۋمەتتىك جەلىنى ءدۇر سىلكىندىرۋدە. «باۋىرىمدى الىپ كەتتى»، «اكەمدى سوققىعا جىعۋدا»، «دوسىم جوعالدى»، «ءىنىم تەرگەۋگە كەتكەننەن كەلمەدى» دەگەن حابارلاما كوپ. تەرگەۋ يزولياتورىندا ۇرىپ-سوعىپ، ازاپتاۋدىڭ سان ءتۇرى بولىپ جاتقانى دا ايتىلۋدا.

2019 جىلدىڭ اقپانى. قازاقستاننىڭ ىشكى ىستەر ءمينيسترى اۋىستى. قالمۇحانبەت قاسىموۆ سەگىز جىل تاپجىلماي وتىرعان كرەسلوعا ەرلان زامانبەكۇلى كەلىپ قونجيدى. ءسويتىپ، قاسىموۆقا قوش ايتتىق تا، تۇرعىمباەۆتى تورگە شىعاردىق. ەل-جۇرتقا سۇيەۋدەي سۇيكىمى قالماي بارا جاتقان سوڭ، ەل باسشىلىعى وزگەرىس جاساۋدى تاپسىرعاندا، فورما اۋىستىرعاننان ءارى اسا الماعان قازاق پوليتسياسىنا ءمينيستردىڭ اۋىسۋى وڭ اسەر ەتەر دەدىك. وكىنىشتىسى، باياعى جارتاس – سول جارتاس كۇيىندە قالدى. ال كەشەگى «قاڭتار وقيعاسىنان» كەيىن تۇرعىمباەۆ مينيسترلىگىنە سىن كوبەيدى.

بەلگىلى ءدىن مامانى، قوعام قايراتكەرى قايرات جولىدايۇلى: «قاڭتار وقيعاسىندا كوپشىلىك حالىق كوشەگە ادىلدىك سۇراپ شىقتى. ولاردىڭ نارازى كوڭىلىن بيلىك ىشىندەگى ەڭ ىقپالدى كلان ءوز مۇددەلەرىنە پايدالانىپ، ارانداتۋشىلىق ارەكەتتى ادەيى ۇيىمداستىردى. بانديتتەر مەن كەيبىر راديكالدى توپتاردى قولداندى. بىراق ولاردىڭ سانى نارازىلىق تانىتىپ، كوشەگە شىققان بەيبىت حالىقتان الدە قايدا از. قاڭتار وقيعاسىنىڭ نەگىزگى سەبەبى تەرروريستەر ەمەس، 30 جىلدىق سىرەسكەن جۇيەدەن شارشاعان حالىقتىڭ ادىلدىك سۇراپ شىققان نارازى كوڭىلى. بيلىك وسىنىڭ ارا-جىگىن اجاراتىپ ايتۋى كەرەك.

ميتينگە قاتىسقانداردى تۇرمەدە ۇرىپ، سوعىپ، جانتۇرشىگەرلىك تاسەلدەرمەن ازاپتاعان پوليتسيا قىزمەتكەرلەرى تۇتقىندالىپ، قىلمىستىق جاۋاپقا تارتىلۋى قاجەت. ازاپتاۋعا، ءتۇرلى زاڭسىزدىقتارعا جول بەرگەن ءىىم ءمينيسترى ەرلان تۇرعىنباەۆ وتستاۆكاعا كەتۋى ءتيىس»، - دەپ جازسا، بەلگىلى زاڭگەر ايگۇل ورىنبەك: «ءبىز قازىر ءۇنسىز قالساق، ەرتەڭ پوليتسيا تاراپىنان «ۇتىك باسۋ» ادەتكە اينالادى! ۇراپاعىڭ ۇتىكتەلىپ جۇرمەسىن دەسەڭ، بۇل جاعدايدى ۇمىتپاي، ۇتىك باسقانداردى انىقتاپ ەل الدىنا شىعارۋدى تالاپ ەتۋىمىز كەرەك!

پرەزيدەنت بۇكىل ۋاقىتشا ۇستاۋ مەكەمەلەرىنە بەينە باقىلاۋ كامەرالارىن قويۋعا تاپسىرما بەرگەن! بۇكىل بەينە باقىلاۋ كامەرالارىنا تۇسكەن ۆيدەولاردى ەل الدىنا شىعارسىن! حالىقتى قيناماعانىن كورەيىك! «ءبىر-ەكى كۇن شۋلايدى، سوسىن ۇمىتالادى»، دەۋلەرى مۇمكىن. بۇل ءجاي عانا ۇمىتىپ كەتەتىن دۇنيە ەمەس. «ۇرىپ سوقتى» دەگەنگە قۇلاق ۇيرەنگەن، ەرتەڭ «ۇتىكپەن كۇيدىرىپتى» دەگەنگە دە قۇلاق ۇيرەنىپ جۇرمەسىن! «جاڭا قازاقستان» زورلىق زومبىلىقسىز، ازاپسىز قازاقستان بولۋ كەرەك»، - دەپ جازادى. ال ءماجىلىس دەپۋتاتى بەرىك ابدىعاليۇلى: «ىشكى ىستەر مينيسترلىگىن ازاماتتىق تۇلعا باسقارۋى كەرەك»، - دەگەن پىكىردى جازادى.

Abai.kz