جۋىردا «Haqnazar Arnasy» Telegram پاراقشاسىندا قازاقستان ءماجىلىسىنىڭ ەكس-سپيكەرى نۇرلان نىعماتۋلين مەن ونىڭ جاقىن تۋىستارىنا قاتىستى اقپارات تارادى. ناقتى ايتقاندا، نۇرلان نىعماتۋليننىڭ لوندونعا كەتىپ قالعانىن جازدى.

«نۇرلان نىعماتۋلين قازاقستاننان كەتىپ، لوندوندا ءجۇر. ونىمەن بىرگە نىعماتۋليننىڭ جاقىن تۋىستارى دا قازاقستاننان كەتكەن. نىعماتۋليندەرگە تيەسىلى بارلىق دۇنيە-مۇلىكتەر مەن بيزنەستەر ساتىلىمعا شىعارىلعان»، - دەپ جازدى.

ماجىلىستە ون جىلعا جۋىق قىزمەت اتقارىپ، ءۇش شاقىرىلىمدا ماجىلىسكە باسشىلىق جاساعان نۇرلان نىعماتۋلين ءماجىلىس توراعالىعىنان 1 اقپان كۇنى ءوز ەركىمەن كەتكەن ەدى. ول ماجىلىستەن كەتەرىندە:

«بيىل ءماجىلىس سپيكەرى بولعانىما 10 جىل تولىپ وتىر. ءۇش شاقىرىلىم توراعا بولدىم. بۇل ارينە، از ۋاقىت ەمەس. وسى ۋاقىتتىڭ ىشىندە ەلىمىزدىڭ ساياسي جانە الەۋمەتتىك-ەكونوميكالىق ومىرىنە بەلسەنە ارالاسىپ، ەلىمىزگە، حالقىمىزعا قاجەتتى ساپالى زاڭدار قابىلداۋ جولىندا بىرلەسىپ، ايانباي ەڭبەك ەتتىك.

«نۇر وتان» پارتياسىنىڭ وتكەن سەزىندە ەل پرەزيدەنتى قاسىم-جومارت توقاەۆ پارتيا توراعاسى رەتىندە جاڭا ساياسي تاپسىرمالار جۇكتەدى. سونىڭ ىشىندە، ماجىلىستەگى پارتيا فراكتسياسى ءۇشىن دە... مەن بۇل مىندەتتەردى جۇزەگە اسىرۋ ءۇشىن كادرلىق جاڭارۋ قاجەت ەكەنىن تۇسىنەمىن. سوندىقتان دا، مەن ەل ەل پرەزيدەنتىنە، پارتيا توراعاسىنا ءوزىمنىڭ دەپۋتاتتىق وكىلەتتىگىمدى ءوز ەركىممەن تاپسىرۋ تۋرالى ءوتىنىش جاسادىم.

بۇگىن مەن ەڭ اۋەلى ەلباسىمىز، «نۇر وتان» پارتياسىنىڭ نەگىزىن قالاعان نۇرسۇلتان ءابىشۇلى نازارباەۆقا، قازىرگى مەملەكەت باسشىمىز، قازىرگى پارتيا توراعاسى قاسىم-جومارت كەمەلۇلى توقاەۆقا ماعان سەنىم ارتقانى ءۇشىن العىس ايتقىم كەلەدى»، - دەپ سويلەگەن ەدى.

نۇرلان نىعماتۋلين وسىعان دەيىن ەلىمىزدە بىرقاتار لاۋازىمدى قىزمەتتەردى اتقارعان. پرەزيدەنت اكىمشىلىگىندە، استانا اكىمدىگىندە، ۇكىمەتتە باسشىلىق قىزمەتتەردە بولدى. قاراعاندىدا وبلىس باسقاردى. ول قر پارلامەنتى ءماجىلىسىنىڭ ءۇش شاقىرىلىمىندا توراعا بولىپ، وسى قىزمەتتە 10 جىل بويى ءجۇردى.

نۇرلان نىعماتۋليننىڭ سىنارى ەرلان نىعماتۋلين دە 18 جىل دەپۋتات بولعان. 1999-2011 جىلدارى ءماجىلىس دەپۋتاتتىعىنا سايلانسا، 2012-2017 جىلدارى پرەزيدەنت جارلىعىمەن سەنات دەپۋتاتتىعىنا تاعايىندالعان.

جوعارىداعى نىعماتۋليننىڭ دۇنيە-مۇلكىن ساتىپ، لوندونعا قونىس اۋدارعانى تۋرالى اقپارات قازىر الەۋمەتتىك جەلىدە قىزۋ تالقىلانۋدا. بۇعان قاتىستى ازىرگە نىعماتۋليندەر تاراپىنان ەشقانداي تەرىستەۋ ءسوز ايتىلعان جوق.

Abai.kz