بۇگىن الەۋمەتتىك جەلىدە قازاقستاننىڭ بۇرىنعى قورعانىس ءمينيسترى مۇرات بەكتانوۆتىڭ تۇتقىندالعانى تۋرالى اقپارات تارادى.

بەلگىلى ساياساتكەر ەربول ەدىلوەۆتىڭ Telegram-داعى پاراقشاسىندا: «كەيبىر دەرەككوزدەردىڭ مالىمەتىنشە، قازاقستاننىڭ ەكس-قورعانىس ءمينيسترى مۇرات بەكتانوۆ تۇتقىندالىپ، ۋاقىتشا ۇستاۋ يزولياتورىنا قامالعان. 19 اقپان كۇنى اتالعان فاكتىگە قاتىستى، قر قىلمىستىق كودەكسىنىڭ 452 بابى بويىنشا قر باس پروكۋراتۋراسى سوتقا دەيىنگى تەرگەۋدى باستاعان»، - دەپ جازىلعان.

قر قىلمىستىق كودەكسىنىڭ 452 بابى – «بيلىكتىڭ ارەكەتسىزدىگى» دەپ اتالاتىن باپ. وندا:

«1. بيلiكتiڭ ارەكەتسiزدiگi, ياعني باستىقتىڭ نەمەسە لاۋازىمدى ادامنىڭ ءوزi نەمەسە باسقا ادامدار نەمەسە ۇيىمدار ءۇشiن پايدا مەن ارتىقشىلىقتار الۋ نە باسقا ادامدارعا نەمەسە ۇيىمدارعا زيان كەلتiرۋ ماقساتىندا ءوزىنىڭ قىزمەتتىك مىندەتتەرىن ورىنداماۋى, ەگەر بۇل ازاماتتاردىڭ نەمەسە ۇيىمداردىڭ قۇقىقتارى مەن زاڭدى مۇددەلەرiن نە قوعامنىڭ نەمەسە مەملەكەتتiڭ زاڭمەن قورعالاتىن مۇددەلەرiن ەلەۋلi تۇردە بۇزۋعا اكەپ سوقسا، – مۇلكى تاركىلەنىپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرا وتىرىپ، ءۇش مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە ءۇش جىلعا دەيiنگi مەرزiمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى.

2. اۋىر زارداپتارعا اكەپ سوققان ءدال سول ءىس-ارەكەت – مۇلكى تاركىلەنىپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرا وتىرىپ، ءتورت جىلدان سەگىز جىلعا دەيiنگi مەرزiمگە باس بوستاندىعىنان ايىرۋعا جازالانادى.

3. وسى باپتىڭ بiرiنشi نەمەسە ەكiنشi بولiكتەرiندە كوزدەلگەن، ۇرىس جاعدايىندا جاسالعان ءىس-ارەكەتتەر – مۇلكى تاركىلەنىپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرا وتىرىپ، بەس جىلدان ون جىلعا دەيiنگi مەرزiمگە باس بوستاندىعىنان ايىرۋعا جازالانادى.

4. وسى باپتىڭ بiرiنشi نەمەسە ەكiنشi بولiكتەرiندە كوزدەلگەن، سوعىس ۋاقىتىندا جاسالعان ءىس-ارەكەتتەر – مۇلكى تاركىلەنىپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرا وتىرىپ، ون جىلدان جيىرما جىلعا دەيiنگi مەرزiمگە باس بوستاندىعىنان ايىرۋعا جازالانادى»، - دەپ جازىلعان.

مۇرات بەكتانوۆ قازىر 56 جاستا. سولتۇستىك قازاقستان وبلىسىنىڭ تۋماسى. اسكەري شەنى – گەنەرال-لەيتەنانت (2020 جىلى العان).

2021 جىلى 31 تامىزدا پرەزيدەنت توقاەۆتىڭ جارلىعىمەن قر قورعانىس ءمينيسترى لاۋازىمىنا تاعايىندالعان. كەيىن 2022 جىلدىڭ 11 قاڭتارىندا پرەزيدەنت توقاەۆ مينيستر بەكتانوۆتى ءوز قىزمەتىنە قايتا تاعايىنداۋ تۋرالى بۇيرىق شىعارعان.

ال «قاڭتار كوتەرىلىسىنەن» كەيىن، پرەزيدەنت توقاەۆ مينيستر بەكتانوۆتىڭ قىزمەتىن قاتاڭ سىناپ، 19 قاڭتار كۇنى قىزمەتىنەن العان. سول كەزدە پرەزيدەنت توقاەۆ ەكس-مينيستر بەكتانوۆ تۋرالى:

«ارميا – ءبىزدىڭ تاۋەلسىزدىگىمىزدىڭ قورعانى بولۋى جانە مەملەكەتتىڭ مۇددەسى ءۇشىن ساپتا تۇرۋى كەرەك. قاڭتار وقيعاسى كەزىندە قارۋلى كۇشتەر وزدەرىنە سەنىمسىز ءھام باستاماشىل باسشىلىقتىڭ بولماۋى سەبەپتى وزدەرىنە ارتىلعان مىندەتتى اتقارا العان جوق. مينيستر بەكتانوۆ كومانديرلىك قاسيەتتەرىن كورسەتە المادى. قاراماعىندا كوماندالىق-شتابتىق وقۋ-جاتتىعۋلاردا جاقسى ناتيجە كورسەتىپ جۇرگەن ارميا بولا تۇرا، ءبىز ونىڭ پوتەنتسيالىن ءدال وسىنداي كۇردەلى كەزەڭدە قولدانا الماي، سىرتتان كومەك سۇراۋعا ءماجبۇر بولدىق»، - دەپ سويلەگەن ەدى.

Abai.kz