1) بۇگىن پولشاعا كەلىپ جيىن وتكىزگەن ناتو باس حاتشىسى سولتەنبەرگ: «ناتو كورشى ەۋروپا ەلدەرى ارقىلى ۋكراينا اسپانىن ناتو پۆو-سىمەن جابا المايدى. جانە پۆو جۇيەسىن ۋكراين جەرىنە ورنالاستىرا المايدى. بۇل دەگەنىڭىز رەسەي مەن ناتو-نىڭ تىكەلەي سوعىسى»، - دەدى. بىراق ءبىر قىزىعى ناتو-عا مۇشە جانە مۇشە ەمەس ەلدەر ۋكرايناعا ۇشاقتان باستاپ, ءتۇرلى اسكەري كومەكتەرىن جىبەرىپ جاتىر.

2) 1815 جىلدان بەرى بەيتاراپتىق ساياسات ۇستانىپ كەلگەن شۆەيتساريانىڭ ءوزى 207 جىلدان كەيىن وسى ساياساتتى بۇزىپ، رەسەيگە اۋە كەڭىستىگىن جاپتى.

3) بزەجينسكيدىڭ «ۇلكەن شاحمات تاقتاسى» كىتابىندا: «ۋكرايناسىز رەسەي - رەسەي ەمەس»، - دەگەنى ءدال كەلدى. ۋكراينادا 45 ملن. سلاۆيان بار. وتە قۇنارلى جەرى بار. جانە ول سلاۆيان رەسەي ءۇشىن ءوز ىشىندەگى «تسۆەتنويلاردان» ون ەسە ارتىق. ۋكراينانى وزىنە قاراتسا، رەسەي ءوزىنىڭ دەموگرافيالىق جاعدايىن ۋكرايندار ارقىلى تۇزەپ الار ەدى. جانە باسقا جاعىنان دا. انگلو-ساكستار سونى جاقسى ءتۇسىندى. شەبەرلىكپەن سوعىستىرىپ ۇلگەردى. رەسەيدىڭ ءوزى دە قۇبىجىق. ەۋرازيا وداعىن ۇسىندى. بىراق، وداقتاستارىن باسىپ-جانشىپ وتىرادى. ەۋرو وداق بار. ليدەرى - گەرمانيا. نەگىزى ەۋرو وداق، ول نەمىس يمپەرياسى. 28 ەلدى بىرىكتىرگەن. وداقستاسىنىڭ جەرىنە كوزىن الارتپايدى، ءتىلىن قۇرمەتتەيدى، وركەنيەت بار، زاڭ بار. ەلدىڭ بارلىعى سول وداققا جۇگىرەدى.

4) رەسەي: «ۋكراينا ناتو-عا كىرسە، ناتو زىمراندارى ءدال مەنىڭ تۇمسىعىمنىڭ استىنا كەلەدى»، -دەدى.

ناتو: «2004 جىلى ەستونيا، لاتۆيا، ليتۆا ۇيىمعا كىردى جانە ولاردىڭ دا ارا قاشىقتىعى ماسكەۋگە تۋرا ۋكراينامەن بىردەي»، - دەدى.

بىراق، رەسەي ءۇشىن ۋكراينانىڭ ءجونى بولەك. جيرينوۆسكيدىڭ ايتقانىنداي، سول ءۇشىن رەسەي «سوڭعى سوعىسىن جۇرگىزىپ جاتىر».

5) پۋتين 2008 جىلى گرۋيزيانىڭ 20% جەرىن، 2014 قىرىمدى، دونباسس پەن لۋگانسكىنى الدى. سول جولمەن «جۇرە بەرەمىن» دەپ ويلادى. باتىس ءپۋتيندى وڭدىرماي تۇزاققا ءتۇسىردى.

15 كۇن بۇرىن گەرمانيا: 5 مىڭ اسكەري كاسكى عانا جىبەرەمىن»، - دەدى. فرانتسيا ارالاسقىسى كەلمەيتىنىن ايتتى. قىسقاسى، پولشادان باسقاسى ونشا كومەككە كەلمەيتىندەي بولدى. ال كەشە باسىپ كىرگەندە بارلىعى وزگەرىپ شىعا كەلدى.

بۇل جەردە ۇتقان انگليا مەن اقش بولدى. ەكەۋىنىڭ ءجۇرىسى ءبىر. انگليا الەمدىك قارجىنى وزىنە توپتاستىرعان. وزگە ەلدەردەگى دەموكراتيا تۋرالى ايتادى. بىراق، سول ەلدەردى توناۋدى وتە جاقسى مەڭگەرگەن. ءبىر مىسال، قازاقستاننان اقشا ۇرلاعان قانشا ادام باردى. نازارباەۆتاردىڭ اۋلەتىنەن باستاپ ەسەپتەي بەر. اقشانىڭ لاس جولمەن كەلگەنىن بىلەدى. بىراق، قايتارمايدى.

ەندى ءبىز سياقتى ەلدەردىڭ سانى جۇزدەن اسادى. رەسەي، ءۇندىستان، پاكىستاننان باستاپ، قاي ەلدى الماڭىز، قاشقاننىڭ ءبارى سوندا بارادى. وسىنداي جولدارمەن جىلىنا تەك 200 ملرد كەلەدى ەكەن.

6) اقش ىقپالىنان كەتە باستاعان ەۋروپا قايتادان ناتو-دا بىرلەسىپ، اقش كولەڭكەسىنە كىرە ءتۇستى. اقش-قا دا كەرەگى وسى.

كەزىندە كسرو-مەن قورقىتىپ، وزىنە تارتىپ تۇردى. ەندى رەسەيدى قۇبىجىق ەتىپ تۇرادى. شىندىعىندا قۇبىجىق. اقش پەن ەۋروپا ەلدەرى اراسىندا ۇلكەن كەلىسپەۋشىلىك بار ەدى.

ترامپ كەزىندە گەرمانيانى سىنعا الدى. «ناتو-نىڭ كوپ اقشاسىن اقش تولەيدى. بىراق، گەرمانيا رەسەيدەن گاز ساتىپ الادى»، - دەپ....

7) مىنا جاعدايدان كەيىن ەۋروپاداعى ناتو-عا مۇشە ەلدەر دەرەۋ ءىجو 2%-عا تولەۋگە كەلىستى. بۇعان دەيىن 2% تولەۋگە قارسى بولىپ جۇرگەن. ناتو بۇرىن بولماعان دارەجەدە بىرىكتى. ءتىپتى، فينلانديا مەن شۆەتسيادا ۇيىمعا مۇشە بولۋعا ارىز بەردى.

8) ەڭ ماڭىزدى ەمەس دەگەن الەمدىك مادەني-سپورتتىق ۇيىمداردان باستاپ، ءتۇرلى-ءتۇرلى حالىقارالىق ۇيىمداردان، بانكتىك جۇيە - SWIFT-تەن رەسەيدى اجىراتىپ جاتىر. رەسەي مۇنايىن الۋدان باس تارتىپ جاتىر. بايدەن ەڭ باسىندا: «ۋكرايناعا كىرسەڭ ناتيجەسى سۇمدىق بولادى»، - دەپ ەسكەرتتى.

9) رەسەي بۇلقان-تالقان بولدى. «2003-تە اقش يراكقا باسىپ كىرگەندە ەشكىم وعان سانكتسيا سالىپ وقشاۋلامادى»، - دەدى. بىراق، شىندىق مىناۋ، بۇۇ باستاپ الەمدەگى بارلىق ۇلكەن ۇيىمدار اقش جانە باتىس باستاماسىمەن قۇرىلعان. جوعارى تەحنولوگيالار مەن بارلىق جەتىستىكتەر سولاردىڭ قولىندا. ارينە، يراكتا سوعىس جونىندە قوزعالماعان قىلمىسىق ءىس گااگادا ەندى قوزعالادى.

10) زەلەنسكي: «الەمنىڭ بارلىق جەرىنەن ۋكراينانى قورعاعىسى كەلەتىندەرگە ەسىك اشىق، ۆيزاسىز كىرە بەرەدى»، - دەپ جارلىق شىعاردى. بۇل يدەيانىڭ ارتىندا اقش تۇر. الەمدە اقشا ءۇشىن سوعىساتىن ءتۇرلى-ءتۇرلى ۇيىمدار بار. بۇل تىزبەكتەلگەن كلاستەر بيزنەسى. كەيبىرى ءدىني فاناتتار، پسيحيكالىق اۋىتقۋى بارلار، ءجاي ادام ولتىرگىسى كەلگەندەر كوپ. ەندى ەستوندىق سنايپەر ايەلدەردەن باستاپ، كوسوۆالىق، پاكىستاندىق، نيگەريالىق، انگولالىق دەگەندەر قاپتايدى. سول ۇيىمداردىڭ كۋراتورلارىن اقش جاقسى بىلەدى. اقشاسىن دا اقش تولەيدى. مۇنداي تاجىريبە چەچەن مەن يۋگوسلاۆيا، سيريا سوعىسىندا بولدى. ۋكرايندەر 90 جىلدارى چەچەندەر ءۇشىن سوعىسقان. ەندى چەچەندەر پۋتين ءۇشىن سوعىسىپ ءجۇر. حاككەرلەر توبى دا ءوز ۇلەستەرىن قوسىپ جاتىر. اقش سپۋتنيك سۋرەتتەرىمەن كومەكتەسىپ جاتىر.

11) مەديادا دا سۇمدىق سوعىس. مىسالى، بۇگىن زەلەنسكيدىڭ ەۋرووداق پارلامەنتى الدىنداعى ۆيدەو ارقىلى سويلەگەن ءسوزىن ورىندارىنان تۇرىپ قول شاپالاقتاپ قارسى الدى. ءدال وسىنداي جيىن بۇگىن بۇۇ-نىڭ ادام قۇقىقتارى جونىندە بولدى. رەسەي ءسىم-ءى لاۆروۆ سويلەگەندە رەسەيدىڭ جانىنداعى 4-5 مەملەكەتتەن باسقاسى ورىندارىنان تۇرىپ، زالدان شىعىپ كەتتى. 200 مەملەكەت ىشىنەن بۇل سۇمدىق. ەندى وسىلاردى رەسەي مەدياسى كورسەتپەيدى. بۇل ءبىر مىسال عانا. باتىس مەدياسى، ارينە، رەسەيدەن ۇلكەن. ال مۇمكىن بولسا ساياسي حابار تاراتاتىن ءبىزدىڭ ەلدەگى رەسەي مەدياسىن جابۋ كەرەك.

12) بۇل سوعىس پۋتين مەن لۋكاشەنكونىڭ جۇلدىزدارىنىڭ ءسونۋىنىڭ باسى بولدى. ويتكەنى بۇگىن سولتەنبەرگ: «لۋكاشەنكونى دا سوعىس باستاۋشى»، - دەدى. سونىمەن قاتار، اقش ماسكەۋدە ءپۋتيننىڭ جانىنداعىلارمەن دە كەلىسسوز جۇرگىزە باستاۋى مۇمكىن. ويتكەنى، كوزى قىزارعان پۋتين يادرولىق قىزىل كنوپكانى باسىپ جىبەرۋى دە مۇمكىن. جۇيكەسى سىر بەرگەن. ياعني، ايتقانىن ورىنداماڭدار دەگەن سەكىلدى. قازىرگى بومبا جاپونياعا تاستالعان بومبادان مىڭداعان ەسە قۋاتتى. بۇل سۇمدىق.

13) وسى كەزگە دەيىن اۋعانستانعا ءبولىپ كەلگەن اقشاسىن اقش ەندى ۋكرايناعا بولەتىن سياقتى. سول ءۇشىن دە بىلتىر اۋعاننان كەتكەن. اقش مەمدەپتىڭ حابارلاۋىنشا، رەسەيلىك ارنايى توپتار 2-3 اي بۇرىن ۋكاريناعا كىرىپ، كيەۆ، حاركوۆ سياقتى بىرنەشە ۇلكەن قالالاردا پاتەر جالداپ تۇرعان. سوعىس بارىسىندا ىشتەن حابار جيناپ، بەلگى قويىپ، ديۆەرسيالىق شابۋىلدار جاساعان. وسىدان ەكى جىل بۇرىن اقش ەسكەرتۋىمەن ۋكراينالىق شايتانوۆ دەگەن گەنەرال ماسكەۋگە جۇمىس ىستەگەنى ءۇشىن تۇتقىندالعان.

14) سوعىس باستالعالى بىرنەشە ەل تاتۋلاستىرعىش بولىپ ۇسىنىس ايتتى. بۇگىن لاۆروۆ: «ەشبىرىنىڭ قاجەتى جوق»، - دەدى. ەرتەڭ بەلارۋس جەرىندە كەلىسسوزدىڭ ەكىنشى كەزەڭى بولادى.

15) ۋكراينا جەڭەدى دەگەن ءسوز - رەسەي اسكەرىن ماسكەۋگە دەيىن قۋىپ بارۋ دەگەن ءسوز ەمەس. ءوز جەرىنەن كەتۋگە ماجبۇرلەسە، سول ۇلكەن جەڭىس. ەستونيا، لاتۆيا، ليتۆادان كەيىن رەسەيدەن تۇبىمەن بوستاندىق العان ءتورتىنشى ەل بولادى. تۇبىمەن بوستاندىق الۋعا ۋكرايندىقتاردىڭ سانا-سەزىمى دە دايىن.

ءدال قازىر شەكتەۋلەر مەن سانكتسيالار استىندا قالعان رەسەيدىڭ ەكونوميكالىق جاعدايى السىرەپ، بىزگە اسەرى قاتتى ءتيىدى. ال جايمەنەن ۇتىپ جاتقان قىتاي. بىراق، اقش ونىڭ دا اياعىن اسپاننان كەلتىرە الاتىن سياقتى. وسىنداي ۇلكەن ويىنداردا ءبىزدىڭ ەل اياعىن انىق باسىپ امان ءجۇرسىن دەپ تىلەيىك!

نۇرات ءىلياس

Abai.kz