بىرنەشە جىل بۇرىن سوتتالعان كاسىپكەر مۇراتحان توقمادي ءوزىنىڭ كىناسىز ەكەنىن مالىمدەدى. ول جاڭا ۇندەۋىندە بانكير ەرجان تاتىشەۆتى مۇحتار ابليازوۆتىڭ تاپسىرماسى بويىنشا ءولتىردى دەگەن ايىپتى ءماسىموۆتىڭ، ءىىم مەن باس پروكۋراتۋرانىڭ قىسىمى ارقىلى ءوز موينىنا العانىن ايتقان.  

«مەن مۇراتحان توقمادي - قازاقستان رەسپۋبليكاسىنىڭ ازاماتى، اعاش ۇستاسىنىڭ شاكىرتىنەن باستاپ ەكى زاۋىتتىڭ يەسىنە دەيىن كوتەرىلگەن قىرىق جىلدىق سپورتتىق-قوعامدىق جۇمىس جولىمدا كوپتەگەن وردەن، التىن ساپا مەدالى مەن «حابار» ارناسىنداعى «جەتىستىك فاكتورى» باعدارلاماسىندا جوعارى باعالانىپ، 2017 جىلى 12 شىلدەدە ءبىر ساتتە ادىلەتسىز تۇردە ساياسي تۇتقىنعا اينالدىم. ماعان، مەنىڭ وتباسىما، جاقىندارىما قاتىستى جاسالعان ادىلەتسىز تۇتقىنداۋ مەن قۋدالاۋ تۇتقىندالعان ۇقك باسشىسى ءماسىموۆتىڭ تەرگەۋ توپتارى ارقىلى ىسكە استى»، - دەيدى توقمادي. ول بۇل تۋرالى پرەزيدەنت توقاەۆقا جازعان حاتىندا ايتقان.

توقماديدىڭ جازۋىنشا جەدەل تەرگەۋ توبىن ۇقك پولكوۆنيگى رۋسلان يسكاكوۆ باسقارعان.

«ولار قورقىتۋ، ۇرىپ سوعۋ، قيناۋ، پسيحولوگيالىق قىسىم جاساۋ، 20-30 جىل بۇرىنعى ىستەردى بۇرمالاۋ، جۇبايىما ءۇش قىلمىستىق ءىس اشۋ، بيزنەسىمدى بۇعاتتاۋ، مۇلىكتەرىمە قول سالۋ، ەسەپشوتتارىمدى جابۋ جانە باسقا دا ارەكەتتەر ارقىلى مەنى سوتقا دەيىنگى قىلمىستى مويىنداۋ كەلىسىمىنە كەلىپ، قۇجاتتارعا قول قويدىرۋعا ءماجبۇر ەتتى. ولار مۇحتار ابليازوۆ تاپسىرىسى بويىنشا ەرجان تاتىشەۆتى ءولتىردىم دەگەندى جازدىردى. ارتىنشا بىزگە ءسىزدىڭ كەرەگىڭىز شامالى، بىزگە م.ا. كەرەك دەدى»، - دەيدى كاسىپكەر.

توقمادي ارتىنشا بىلاي دەيدى: «مەنى كەلىسىمگە كەلۋگە كوندىرۋ ءۇشىن، قيناۋدان بولەك ولار مەنى ۇقك-ءنىڭ پسيحاتريالىق بولىمشەسىنە جاتقىزدى. ءتورت اي ازاپتاۋ فاكتىلەرىن كورگەن سوڭ جانە ايەلىمدى 15 جىل تۇرمەگە، بالالارىمدى بالالار ۇيىنە وتكىزەمىز دەپ قورقىتقاننان كەيىن، 2017 جىلدىڭ 18 قاراشاسىندا مەن كەلىسىمگە كەلۋگە ءماجبۇر بولدىم.  2018 جىلدىڭ 16 ناۋرىزىندا تاراز قالاسىنىڭ سوتى م.تلەپوۆ ۇكىمدى وقىعان ساتتە كەلىسىم كۇشى كىنالى تاراپقا ۇكىم شىققاندا ىسكە اساتىنىن ايتتى. ابليازوۆكە ۇكىم سول جىلدىڭ 27 قاراشاسىندا شىققان بولاتىن. ءبىر جىلدان كەيىن، 2019 جىلى مەنىڭ وتباسىم كوپتەگەن ءوتىنىش ايتقان سوڭ، جامبىل وبلىسىنىڭ پروكۋرورى قۇسايىنوۆ ج.ك بىلاي دەدى: «وعان بەرىلگەن مەرزىم ونسىز دا ەڭ جەڭىلى سانالادى». وسىلايشا ولار سوتقا دەيىنگى كەلىسىمنىڭ تەك الدامشى ەكەنىن ناقتى دالەلدەدى», - دەيدى توقمادي.

ول بەس جىل بويى ءوزى ەشقاشان جاساماعان قىلمىس ءۇشىن ادىلەتسىز اباقتىدا وتىرعانىن ايتادى.

«مەنىڭ وتباسىم مەن ماعان وسىنشالىقتى ازاپتى جىلدار سىيلاعان بۇل وقيعالاردىڭ بارلىعى دا ءماسىموۆ پەن ونىڭ جاقتاستارى، ءىىم، سوتتاردىڭ قاتىسۋىمەن ىسكە استى. ولاردىڭ باستى ماقساتى ن.نازارباەۆتىڭ باستى جاۋى مۇحتار ءابليازوۆتى قازاقستانعا اكەلۋ بولاتىن.  الايدا بۇل ولاردىڭ قولىنان كەلمەيدى، ال قاڭتار ايىندا ولاردىڭ بارلىعى دەرلىك تۇتقىندالىپ، ولاردىڭ قىلمىستىق ىستەرى اقىرىنداپ جاريالانىپ جاتىر. كونستيتۋتسيانىڭ كەپىلى رەتىندە مەن وزىڭىزدەن ادىلەتتىلىكتى قالپىنا كەلتىرىپ، كىنالىلىەردى جازالاپ، مەنى اقتاۋىڭىزدى، بوستاندىققا جىبەرۋىڭىزدى سۇرايمىن. شىنشىدىق پەن ادىلەت – ءار ادامعا قاجەت قاسيەت!» - دەدى توقمادي.

توقمادي جازعان حات كازتاگ سايتىندا جاريالانعان بولاتىن.

Abai.kz