كۇنى كەشە الماتىدا بەلسەندى مارعۇلان بورانباي مەن ەكونوميست دانات نامازباەۆقا سوت شەشىمى شىعىپ، المالى اۋداندىق سوتى 5 جىلعا باس بوستاندىعىنان ايىرۋ تۋرالى ۇكىم شىعاردى.  

المالى اۋدانىنىڭ سوتى مارعۇلان مەن داناتقا ۇلتارالىق الاۋىزدىق تۋدىردى، ۇلتقا ءتىل تيگىزدى جانە ۇلتتى كەمسىتۋ مەن قورلاۋدى ىسكە اسىردى دەگەن ايىپ تاققان. سونىمەن بىرگە، مەملەكەتتىك تۇتاستىققا قاۋىپتى ۇندەۋلەر تاستاپ، بيلىكتى باسىپ الۋعا شاقىرعان ۇندەۋلەر جاساعانىن ايتىپتى. 2018 جىلدان بەرى وزدەرىنىڭ الەۋمەتتىك جەلىلەرىندە ورىس ۇلتىنا ءتىل تيگىزەتىن جازبالار جاريالاعانىن ايتادى.

مارعۇلان بورانباي مەن دانات نامازباەۆ شىندىعىندا قازاقستانعا قاتىستى رەسەيلىك ساياساتكەرلەردىڭ قاۋىپتى ۇندەۋلەرىنە جاۋاپ بەرىپ، رەسەي اسكەرىنىڭ ۋكرايناداعى اگرەسسياسىن قاتاڭ سىنعا الۋشىلاردىڭ ءبىرى. ولار رەسەيمەن ەكونوميكالىق وداقتان شىعۋعا دا ۇندەگەن ەدى.

سوت شەشىمىنە قوعام مەن بەلسەندىلەر نارازىلىق ءبىلدىرىپ جاتىر. قوعام بەلسەندىسى مۇحتار تايجان بىلاي دەپ جازبا قالدىردى:

«مارعۇلان بورانباي مەن دانات نامازباەۆقا شىعارىلعان كەشەگى ۇكىم مۇلدەم نەگىزسىز ەكەنى انىق. فەيسبۋكتەگى جازبالار ءۇشىن 5 جىلعا باس بوستاندىعىنان ايىرۋ جازاسىن بەرۋ، ونىڭ سالدارىن ايتپاعاندا، بارىپ تۇرعان نونسەنس. 

بۇگىن سوتتالعان بەلسەندىلەر ءبىراز جىل بۇرىن پرەزيدەنت جانىنداعى بالا قۇقىقتارى جونىندەگى ۋاكىل ارۋجان ساينمەن، دالىرەك ايتساق، ونىڭ قورىنىڭ قىزمەتكەرى يۋري يۋرينمەن جانجالداسىپ قالعانى بەلگىلى. ساين بۇل قاقتىعىستى ءوزىنىڭ قورىنا شابۋىل رەتىندە كورسەتۋگە تىرىستى، بۇل شىندىققا مۇلدەم سايكەس كەلمەيدى. ونىڭ قورى «سامۇرىق-قازىنا» سياقتى كۆازيمەملەكەتتىك قۇرىلىمداردان جىلدار بويى اقشا الىپ، جۇمىس ىستەپ كەلەدى.

بۇگىندە ساين پرەزيدەنتكە جاقىن قىزمەت بابىن پايدالانىپ، سوتتىڭ مۇنداي قاتاڭ شەشىمىنە ىقپال ەتۋى مۇمكىن. ەستەرىڭىزگە سالا كەتەيىن، بۇل تۋرالى جوعارعى سوت توراعاسى اسانوۆتىڭ ءوزى ايتىپ وتكەندەي، بالالار ومبۋدسمەنى سوت شەشىمدەرىنە ىقپال ەتۋ ءۇشىن تەلەفون شالۋ قۇقىعىن پايدالانعان.

سونىمەن قاتار, سوت وتىرىسىنا قاتىسقانداردىڭ ايتۋىنشا، ساين قايىرىمدىلىق قورىنىڭ قاراجاتىن ءوزىنىڭ جەكە سوت ىستەرى ءۇشىن ادۆوكاتتاردىڭ اقىسىن تولەۋگە پايدالانعان. بۇل قايىرىمدىلىققا بولىنگەن قاراجاتتىڭ ماقساتتى جۇمسالۋىن ورەسكەل بۇزۋ بولىپ تابىلادى.

قازىردىڭ وزىندە بالالار ومبۋدسمەنى دە قۇرامىندا بار جاڭا «قازاقستان حالقىنا» قايىرىمدىلىق قورىندا ىقتيمال الاياقتىق تۋرالى اقپارات بار. ەستەرىڭىزگە سالا كەتەيىن، بۇل مەملەكەتتىك جانە قوعامدىق باقىلاۋسىز جەكە قور، بىراق سوعان قاراماستان مەملەكەت باسشىسى سول جەرگە اقشا سالۋعا شاقىردى.

بۇل فاكتىلەردىڭ بارلىعى سايننىڭ پرەزيدەنتكە ىقپالى بار ەكەنىن كورسەتۋى مۇمكىن. مەن تىزبەلەگەن فاكتىلەردىڭ ءبىرى ونىڭ وتستاۆكاعا كەتۋىنە سەبەپ بولۋى كەرەك ەدى. بىراق, ولاي بولمايدى، مۇنى پرەزيدەنتتىڭ وعان دەگەن ەرەكشە كوزقاراسىمەن تۇسىندىرۋگە بولادى. ولاي بولماۋعا ءتيىس. «دوستارعا بارلىعى بولادى، ال قالعاندارىنا زاڭ اياسىندا» دەگەن پرينتسيپتەن الشاقتاۋ كەرەك. 

جوعارىدا ايتىلعانداردىڭ بارلىعىنا سۇيەنە وتىرىپ، ارۋجان سايننىڭ پرەزيدەنتتىڭ شەشىمدەرىنە دە، سوت جۇيەسىنە دە كەرى اسەرى بار دەپ ەسەپتەيمىن. ونىڭ بالالار ومبۋدسمەنى قىزمەتىنەن كەتەتىن ۋاقىتى كەلدى. بۇل قىزمەتكە قوعامدىق كەلەڭسىزدىككە، سوتقا ازىراق ارالاساتىن باسقا ادام كەلسىن.

ال ءبىز، دوستار، مارعۇلان مەن داناتتى قورعاۋعا بار كۇشىمىزدى سالۋىمىز كەرەك. كەشەگى سوت شەشىمى مۇلدەم ادىلەتسىز دەپ بىلەم», - دەدى ول.

قوعام بەلسەندىلەرى سوت شەشىمىن ادىلەتسىز دەپ اتاپ، ۇلتىن سۇيگەندى قاماۋ ناعىز اقىماقتىق دەپ ءوز پىكىرلەرىن بىلدىرۋدە.

Abai.kz