پرەزيدەنتتىڭ اتىنا شەتەلدىك مەملەكەت باسشىلارىنان قازاقستاندى تۇركى ەلدەرىنە ورتاق «ناۋرىز» مەيرامىمەن قۇتتىقتاعان جەدەلحاتتار كەلىپ جاتىر. بۇل تۋرالى اقوردا سايتى جاريالادى.

اقش پرەزيدەنتى دجو بايدەن : – بەيبىتشىلىك پەن جاڭارۋعا ۇندەيتىن بۇل كۇنى قۇراما شتاتتارداعى جانە بۇكىل الەمدەگى كوپتەگەن ادام وسىناۋ كەرەمەت مەيرامدى سىزبەن بىرگە تويلايدى. قازاقستان مەن اقش 30 جىلدان بەرى بەرىك ءارى تۇراقتى سەرىكتەستىككە نەگىزدەلگەن ديپلوماتيالىق قاتىناستاردى جالعاستىرىپ كەلەدى. مەنىڭ اكىمشىلىگىم حالقىڭىزدىڭ ەكونوميكالىق، الەۋمەتتىك جانە ساياسي مۇمكىندىكتەرىن قالىپتاستىرۋدى كوزدەيتىن رەفورمالارىڭىزدىڭ باعدارلاماسىنا قولداۋ كورسەتەدى. ناۋرىز قۇتتى بولسىن! – دەلىنگەن دجو بايدەننىڭ جەدەلحاتىندا.

وزبەكستان پرەزيدەنتى شاۆكات ميرزيوەۆ : – ادامزات تاريحىندا ۇلكەن ورىن الاتىن وسى ايتۋلى مەرەكە حالىقتارىمىز بەن ەلدەرىمىز اراسىنداعى دوستىق ارقاۋىن بەكەمدەۋگە، ىنتىماقتاستىق پەن ۇيلەسىمدى قاتىناستاردى نىعايتۋعا ولشەۋسىز ۇلەس قوسادى. ءبىز ەكى ەل اراسىنداعى ءوزارا سەنىم مەن قۇرمەتكە نەگىزدەلگەن تاتۋ كورشىلىك بايلانىستارىمىزدى، ستراتەگيالىق سەرىكتەستىگىمىز بەن وداقتاستىق قاتىناستارىمىزدى ودان ءارى كەڭەيتە بەرەتىنىمىز ءسوزسىز، – دەلىنگەن قۇتتىقتاۋ حاتتا.

تاجىكستان پرەزيدەنتى ەمومالي راحمون : – قاستەرلى ناۋرىز مەرەكەسىنىڭ ىزگى داستۇرلەرىنە نەگىزدەلگەن تاجىكستان مەن قازاقستان اراسىنداعى دوستىق، ستراتەگيالىق سەرىكتەستىك قاتىناستارى حالىقتارىمىزدىڭ تۇپكى مۇددەلەرىنە سايكەس الداعى ۋاقىتتا دا دامىپ، كەڭەيە بەرەدى، – دەپ جازعان ەمومالي راحمون.

ازەربايجان پرەزيدەنتى يلحام اليەۆ: – ءوزىمنىڭ جانە ازەربايجان حالقىنىڭ اتىنان ءسىزدى جانە حالقىڭىزدى قاسيەتتى ناۋرىز مەيرامىمەن شىن جۇرەكتەن قۇتتىقتايمىن. بۇل مەرەكە – تابيعاتقا دەگەن شەكسىز ماحاببات پەن ۇلكەن قۇرمەتتىڭ بەلگىسى. مىڭداعان جىلدار بويى سىناققا ءتوزىپ كەلگەن ومىرلىك فيلوسوفيانىڭ نىشانى، – دەلىنگەن قۇتتىقتاۋ جەدەلحاتتا.

پرەزيدەنت قاسىم-جومارت توقاەۆتىڭ اتىنا ءوز قۇتتىقتاۋلارىن تۇركى مەملەكەتتەرى ۇيىمىنىڭ باس حاتشىسى باعدات امىرەەۆ، كاۆكاز مۇسىلماندار باسقارماسىنىڭ توراعاسى، تمد دىنارالىق كەڭەسىنىڭ توراعالىعىن قوسا اتقارۋشى شەيح-ۋل-يسلام اللاحشۇكىر پاشە-زادە، "شەۆرون" كورپوراتسياسى ەۋرازيالىق بولىمشەسىنىڭ باسقارۋشى ديرەكتورى دەرەك ماگنەسس، ەۋرازيالىق دامۋ بانكىنىڭ باسقارما توراعاسى نيكولاي پودگۋزوۆ، بايقوڭىر قالاسى قالالىق اكىمشىلىگىنىڭ باسشىسى كونستانتين بۋسىگين جانە باسقالارى جولدادى.

قازاقستاننىڭ رەسەيدەگى ەلشىلىگى دە قازاقستاندىقتاردى ناۋرىز مەيرامىمەن قۇتتىقتادى: ەجەلدەن بەرى حالىقتىڭ رۋحاني ۇلىلىعىن كورسەتەتىن بۇل جارقىن مەرەكە ۋاقىت پەن ۇرپاقتىڭ ۇزدىكسىز بايلانىسىن بەينەلەيدى، كوكتەمگى كۇن مەن ءتۇننىڭ تەڭەلۋىن، بارلىق تىرشىلىكتىڭ جاڭارۋى مەن ويانۋىن بىلدىرەدى. بۇل كۇنى ءبىز وتكەن كۇندى قورىتىندىلايمىز، بولاشاققا جوسپار قۇرامىز. كوكتەم جىلۋىمەن كەلگەن ناۋرىز رۋحاني تازارۋعا، بەيبىتشىلىك پەن كەلىسىمنىڭ نىعايۋىنا ىقپال ەتەدى، حالقىمىزدىڭ مادەني بايلىعىن پاش ەتىپ، قازاقستاندا تۇراتىن باسقا دا ەتنوستار وكىلدەرىنىڭ باسىن بىرىكتىرەدى. شىن مانىندە بۇكىلحالىقتىق مەرەكەنى اتاپ ءوتۋ وسى ءبىر ۇلكەن وتباسىنىڭ داستۇرىنە اينالدى. ناۋرىز مەيرامى سىزدەردىڭ ۇيلەرىڭىزگە كوكتەمگى كەرەمەت كوڭىل-كۇيمەن، جومارت داستارحانمەن، قۋانىشپەن كىرسىن! سىزدەرگە زور دەنساۋلىق، باقىت پەن اماندىق، جاقسىلىق پەن كەلىسىم، مولشىلىق پەن بەرەكە ، تىنىشتىق پەن بەيبىت بولاشاق تىلەيمىز!

Abai.kz