كەشە امەريكالىق مۇعالىممەن اڭگىمەلەسىپ وتىرىپ، ءبىر ءسوزى جۇرەگىمە قادالدى... بۇل كىسى بىرنەشە ءتىل بىلەدى. قالاي ۇيرەنگەنىن ءبولىسىپ، ايتىپ بەرىپ جاتىر. افريكا ەلدەرىندە ۇستازدىق قىزمەتتە ىستەگەندە، تەك اۋديتوريادا اعىلشىنشا سويلەسەمىز، سىرتقا شىقسام ءبارى فرانتسۋز تىلىندە سويلەيدى. ادامدارمەن ارالاسۋ كەرەك، قاجەت بولعان سوڭ ۇيرەنىپ الدىم دەيدى. قىتايدا بىرنەشە جىل جۇمىس ىستەدىم. ول جاقتا دا تەك ساباقتا عانا اعىلشىنشا سويلەيمىن، سىرتتا ءبارى قىتاي تىلىندە سويلەسەدى، قىتاي ءتىلىن ۇيرەنىپ الدىم دەيدى. يسپانيادا دا تۇرعان، يسپان ءتىلىن بىلەدى.

قازاقستاندا جۇرگەنىمە 2 جىلدان استى. كافە-رەستورانعا، قىدىرۋعا شىققاندا ءبارى ورىسشا سويلەسەدى. ورىسشا ءبىراز سوزدەردى ۇيرەنىپ الدىم دەيدى. باسە، باسىندا بۇيىمداردىڭ باعاسىن "سكولكو" دەپ سۇرادى... كەيىن، تەك اعىلشىنشا سويلەستىك. قازاقشا ەشتەڭە بىلمەيدى. "راقمەت" دەگەن ءسوزدى ۇيرەتىپ جىبەردىك... سەكەن تۇرىسبەكتىڭ "كوڭىل تولقىنى", تولەگەن اتامىزدىڭ "سالتانات" كۇيلەرىنىڭ تاريحىن ايتىپ، ورىنداپ بەردىم...

جالپى، ۇلتتىڭ كۇشى - ءتىلى مەن جەرى. السىزدىگىمىز وسى، وزگە تۇرماق، ءوز ارامىزدا باسقانىڭ ءتىلىن قولدانامىز. قۇستار سايرايدى، بىراق، ۇرگەن نەمەسە مياۋلاعان قۇستى ەشكىم كورمەگەن شىعار.

ابزال مولدابەك

Abai.kz