«قاسىرەتتى قاڭتار» وقيعاسىنان كەيىن ەكونوميكاعا كەلگەن شىعىن وراسان. بۇل قيراعان عيمارات، ورتەنگەن دۇكەن، تونالعان بانكتەن بولەك ەلگە كەلمەي قالعان بىرنەشە ملرد دوللارلىق ينۆەستيتسيالار دەسەك تە بولادى. ال ەندى عيماراتتاردى قالپىنا كەلتىرۋگە كەتەتىن قارجى مولشەرى بەلگىلى بولا باستادى. 

الشماتى قالاسىندا قاڭتاردا زارداپ شەگىپ، ورتەنىپ كەتكەن عيماراتتىڭ ءبىرى پرەزيدەنت رەزيدەنتسياسى ەدى. وعان دەمونتاج جاساۋ ءۇشىن 6 ملرد تەڭگە كەتەتىنى ايتىلۋدا. قارجى ۆيتسە-ءمينيسترى تاتيانا ساۆەلەۆانىڭ سوزىنشە قاڭتاردا ايتقان پرەزيدەنت تاپسىرماسىن ورىنداۋعا 1,8 ترلن تەڭگە قارجى بولىنبەك. بۇل قارجىعا ايماقتار مەن كاسىپكەرلىكتى قولداۋ كىرەدى. وزگە دە ەكونوميكاعا قاتىستى مىندەتتەردى ورىنداۋ قاراستىرىلۋدا. بولىنگەن قارجى ءۇش ماقساتتا جۇمسالماق.

«ءبىرىنشى ماقساتتا قاڭتارداعى وقيعالاردىڭ سالدارىن جويۋ ءۇشىن 31 ملرد تەڭگە قارجى بولىنبەك. ونىڭ ىشىندە الماتى قالاسى مەن وزگە ايماقتارداعى زارداپ شەككەن كىشى بيزنەس وكىلدەرىنە 21 ملرد تەڭگە بولىنەدى. جالپى بيزنەستى قولداۋ ءۇشىن ەكونوميكا مينيسترلىگىنىڭ مالىمەتىنە سۇيەنسەك، 45 ملرد تەڭگەدەي قارجى قاجەت. ۇكىمەت رەزەرۆىنەن قازىردىڭ وزىندە 24 ملرد تەڭگە قارجى ءبولىندى»، - دەيدى ول.

قاڭتاردا زارداپ شەككەن اكىمشىلىك، الەۋمەتتىك نىسانداردى قالپىنا كەلتىرۋگە بولىنگەن قارجى مولشەرى 10 ملرد تەڭگە كولەمىندە.

«ينفراقۇرىلىمدى قالپىنا كەلتىرۋگە جالپى قاجەتتىلىك 22 ميلليارد تەڭگەنى قۇرايدى. قازىردىڭ وزىندە ۇكىمەت رەزەرۆىنەن 12 ميلليارد تەڭگە ءبولىندى، قالعان 37 ميلليارد تەڭگەنى دە ۇكىمەتتەن رەزەرۆكە قويدىق. قۇجاتتار بار. ناقتى قاراستىرىلعان جاعدايدا بۇل قاراجاتتىڭ بارلىعى بولىنەدى. الماتىداعى پرەزيدەنت رەزيدەنتسياسىنا عيماراتتار مەن قۇرىلىستاردى دەمونتاجداۋ ءۇشىن 6 ملرد تەڭگە جوسپارلانعان»، - دەدى ول.

قارجىنىڭ ەكىنشى بولىگى كۇشتىك قۇرىلىمداردىڭ دايىندىعىن ارتتىرۋ مەن جاراقتاندىرۋعا بولىنبەك. وعان قوسىمشا 441 ملرد تەڭگە ءبولۋ جوسپارلانىپ وتىر ەكەن. ونىڭ ىشىندە 4,1 ملرد تەڭگە كومپەنساتسيا رەتىندە بەرىلەدى.  اسكەري تەحنيكالاردى جوندەۋ، اسكەري نىساندار مەن كۇشتىك قۇرىلىم عيماراتتارىن جوندەۋگە قارجى بولىنەدى. كۇشتىك قۇرىلىم قىزمەتكەرلەرىنىڭ سانى مەن جالاقىسىن ارتتىرۋ ءۇشىن قوسىمشا 92 ملرد تەڭگە قاراستىرىلعان. اسكەري قىزمەتكەرەردىڭ جالاقاسى 20%-40% ارتادى.

بۇعان دەيىن ايماقتارعا قاڭتارداعى شىعىندى قالپىنا كەلتىرۋ ءۇشىن 75 ملرد تەڭگە قاجەت ەكەنى ايتىلعان ەدى.

كا مىرزا

Abai.kz