نۇر-سۇلتاندا «مادەنيەتتى انا – مادەنيەتتى ۇلت» رەسپۋبليكالىق جوباسىنىڭ تۇساۋى كەسىلدى. ەلورداداعى دوستىق ۇيىندە قازاقستان حالقى اسسامبلەياسىنىڭ رەسپۋبليكالىق انالار كەڭەسىنىڭ وتىرىسى ءوتتى. جيىنعا قحا توراعاسىنىڭ ورىنباسارى – قحا حاتشىلىعىنىڭ مەڭگەرۋشىسى م. ءازىلحانوۆ توراعالىق ەتتى.

ءىس-شاراعا قوعام قايراتكەرلەرى، زاڭ ورگاندارى وكىلدەرى، اقپارات جانە قوعامدىق دامۋ مينيسترلىگىنىڭ قىزمەتكەرلەرى، قحا مۇشەلەرى، قحا قالالىق جانە وبلىستىق انالار كەڭەستەرىنىڭ ءتورايىمدارى، «قوعامدىق كەلىسىم» كمم جانە قحا قوعامدىق قۇرىلىمدارىنىڭ باسشىلارى قاتىستى.

«مەملەكەت باسشىسىنىڭ تاياۋداعى قازاقستان حالقىنا جولداۋى ەلىمىزدى جان-جاقتى دامىتىپ، جەتىلدىرۋگە باعىتتالعان. ءبىز پرەزيدەنت جولداۋىن قازاقستاننىڭ ءار وتباسىنا، ءار اناسىنا تىكەلەي ايتقان ۇندەۋى دەپ قابىلدايمىز. سەبەبى، ءار وتباسىنىڭ مۇددەسى، انا مەن بالانىڭ قاۋىپسىزدىگى پرەزيدەنتتىڭ ءجىتى باقىلاۋىندا ەكەنىن ايتۋىمىز كەرەك»،- دەپ سويلەدى جيىندى اشقان م.ءازىلحانوۆ. ول پرەزيدەنتتىڭ «جاڭا قازاقستان: جاڭارۋ جانە جاڭعىرۋ جولى» اتتى جولداۋىندا ايتىلعان مىندەتتەمەلەرى، سونىڭ ىشىندە قحا جانىنداعى انالار  كەڭەسىنىڭ قىزمەتى ەل-جۇرتتىڭ ەرەكشە نازارىندا ەكەنىن اتاپ ءوتتى.

سونىمەن قاتار، ءازىلحانوۆ پرەزيدەنتتىڭ قوعام تالابىن ەسكەرە وتىرىپ رەفورمالار جۇرگىزۋدى ءوزىنىڭ نەگىزگى مىندەتتەرىنىڭ ءبىرى دەپ سانايتىنىن دا ايتا كەتتى.

«مەملەكەت باسشىسىنىڭ ساياسي رەفورمالارى ەلىمىزدىڭ تۇراقتى دامۋىنا، مەملەكەتتىڭ قاۋىپسىزدىگىن قامتاماسىز ەتۋگە، بيلىك پەن حالىقتىڭ ءوزارا ديالوگ ارقىلى قوعامدىق كەلىسىمدى ساقتاۋىنا، ساياسي ءارى الەۋمەتتىك-ەكونوميكالىق سالالاردى نىعايتۋعا باعىتتالعان. بۇل اتالعان باستامالار پاندەميادان باستالىپ الەمدىك داعدارىسقا دەيىن جالعاسقان قيىن-قىستاۋ كەزەڭدەرگە، قاۋىپ-قاتەرگە قاراماستان جالعاسىن تابا بەرمەك»، - دەدى قحا توراعاسىنىڭ ورىنباسارى.

سپيكەر انالار كەڭەسىنىڭ قىزمەتى تۋرالى ايتىپ، حالىقتىڭ ءار ءتۇرلى الەۋمەتتىك توبىنا جاتاتىن انالاردىڭ جاعدايىن جاساۋ، الەۋەتىن ارتتىرۋدىڭ ماڭىزدى ەكەنىن ەرەكشە اتادى.

«ءبىز بۇگىن «مادەنيەتتى انا – مادەنيەتتى ۇلت» جوباسىن ىسكە اسىرۋدى رەسمي تۇردە باستاعانىمىزدى حابارلايمىز. جوبا بارىسىندا مەملەكەتتىك ورگاندار مەن ازاماتتىق قوعام ينستيتۋتتارى سپەكترىنىڭ ءوزارا ءىس-قيمىلىنىڭ ءتيىمدى سينەرگياسى ىسكە قوسىلادى. جوبادا وتباسىلىق قۇندىلىقتاردى دارىپتەپ، جاس ۇرپاقتى ۇلتتىق سالت-ءداستۇردى ساقتاۋعا شاقىرىپ، تاربيەلەۋگە ەرەكشە ىقىلاس بەرەمىز»، - دەدى ءازىلحانوۆ.

«مادەنيەتتى انا – مادەنيەتتى ۇلت» جوباسى قحا جانىنداعى انالار كەڭەسىنىڭ كوتەرۋمەن دايىندالعان جوبا. بۇل جوبانىڭ باستى ماقساتى وتباسى قۇندىلىقتارىن وسكەلەڭ ۇرپاقتىڭ بويىنا تاراتىپ، ۇلتتىق ءداستۇردى قادىرلەۋگە، ساقتاۋعا شاقىرۋ بولىپ سانالادى. اتالعان ماقساتتى جۇزەگە اسىرۋ ءۇشىن مەملەكەتتىك ورگاندار مەن ازاماتتىق قوعام ينستيتۋتتارىنىڭ اراسىندا تىعىز بايلانىس ورناۋى قاجەت. جاقىن ۋاقىتتا جوبانىڭ جول كارتاسى ازىرلەنىپ، قازاقستاننىڭ بارلىق ايماقتارىن قامتىعان ءوز جۇمىسىن باستايدى.

"قازىرگى تاڭدا قىزدىڭ دا، ۇلدىڭ دا تاربيەسى ماڭىزدى. بىردە «قىزدى بولساڭ ونى ارداقتى انا بولاسىڭ دەپ تاربيەلە، ۇلدى بولساڭ ابىز اقساقال بولاسىڭ دەپ تاربيەلە» دەگەن ءسوز بار دەپ ايتقان ەدىم. سول ۋاقىتتا ءبىر جەتكىنشەك سۇرايدى: «مەن نەگە اقساقال بولۋىم كەرەك؟»،- دەپ. وسكەلەڭ ۇرپاقتىڭ «اقساقال» ءسوزىنىڭ ماعىناسىن بىلمەيتىنىن كوردىم. ءبىزدىڭ مىندەتىمىز وسىلايشا اقساقال ءسوزىنىڭ قادىر-قاسيەتىن ۇمىتىپ بارا جاتقان جاستاردىڭ ەسىنە ءتۇسىرۋ، ءتۇسىندىرۋ»،- دەپ ءسوز سويلەدى پاۆلودار وبلىسى انالار كەڭەسىنىڭ توراعاسى باقىتجامال ماكسيلوۆا.

«مادەنيەتتى انا – مادەنيەتتى ۇلت» رەسپۋبليكالىق جوباسىن تانىستىرعان قازاقستان حالقى اسسامبلەياسىنىڭ رەسپۋبليكالىق انالار كەڭەسىنىڭ ءتورايىمى نازيپا شاناي ءار باعىتقا توقتالىپ، ورتالىق دەڭگەيدە دە جانە جەرگىلىكتى دەڭگەيدە دە اتقارىلاتىن ءىس-شارالار تۋرالى ايتىپ بەردى.

«مادەنيەتتى انا – مادەنيەتتى ۇلت» رەسپۋبليكالىق جوباسى 2021 جىلدان بەرى ايتىلىپ، بۇگىندە ءوز مارەسىنە جەتتى. جوبا 15 باعىتتان تۇرادى. قحا جانىنان قۇرىلعان انالار كەڭەسى 2014 جىلدان بەرى جۇمىس ىستەيدى. ول اسسامبلەيانىڭ نەگىزگى قۇرىلىمدارىنىڭ ءبىرى بولىپ تابىلادى. ەلىمىز بويىنشا انالار كەڭەسىنىڭ 1832 قۇرىلىمى بار. بۇگىنگى كۇنى قۇرامىندا 13 مىڭنان استام بەلسەندى انا بار ۇيىم وتباسىنداعى كۇرمەۋى قيىن ماسەلەلەر، بالالار مەن انالارعا قاتىستى وزەكتى ماسەلەلەردى شەشۋگە اتسالىسىپ ءجۇر.

انالار كەڭەسى قازاقستاندىق ءپاتريوتيزمدى، تولەرانتتىلىق پەن ەتنوسارالىق كەلىسىمدى، ۇرپاقتار ساباقتاستىعىن، ۇلتتىق داستۇرلەر مەن وتباسىلىق قۇندىلىقتاردى نىعايتۋعا جانە ساقتاۋعا ءوز ۇلەسىن قوسىپ كەلەدى.

«قوعامدىق ۇيىمنىڭ كەيبىر ماسەلەلەردە الەۋەتى جەتپەي قالۋى مۇمكىن. ءبىز بىرلەسە اتقارعاندا الدىمىزعا قويعان ەڭ ۇلى ماقسات- ۇلتىمىزدى مادەنيەتتى ەتىپ تاربيەلەۋ. وسى ماقساتىمىزعا جەتەمىز دەپ ويلايمىز»، - دەدى انالار كەڭەسىنىڭ ءتورايىمى نازيپا شاناي.

حالقىمىز ۇلت بولاشاعىن انامەن بايلانىستىرعان. بۇگىنگى ءسابي ەرتەڭگى ەل ىرگەسىن ۇستايتىن ازامات. بالانى جاستايىنان ءوز ەلىنىڭ تاريحىن بىلۋگە، سالت-ءداستۇرىن قادىرلەۋگە، بويىنا ۇلت نامىسىن سىڭىرۋدە انانىڭ ءرولى ەرەكشە. سوندىقتان انا مەن بالا الەۋەتىن كوتەرۋ ءۇشىن، دەنساۋلىعى مەن قاۋىپسىزدىگىن قامتاماسىز ەتۋ ءۇشىن مەملەكەت جىلدا جاڭا شارالار قابىلداپ جاتادى. بەلسەندى انالاردان قۇرىلعان ۇيىمنىڭ جاڭا باستاماسى دا مەملەكەتتىڭ ۇستانىمىنا ءدال كەلەتىن، بولاشاقتا ءوز جەمىسىن بەرەتىن جوبانىڭ ءبىرى.

جينالىس بارىسىندا ءار ايماقتان قاتىسقان انالار كەڭەسىنىڭ ءتورايىمدارى وڭىرلەردە ەتنومادەني بىرلەستىكتەردىڭ قولداۋىمەن وڭىرلەردە اتقارىلىپ جاتقان ءىس-شارالار جايىندا ايتىپ بەردى. سونداي-اق جوبانى ىسكە اسىرعاندا ناتيجەگە جەتۋ ءۇشىن قوعامدىق ينستيتۋتتاردى تارتۋ بويىنشا ساراپشىلاردىڭ ۇسىنىسى ەسكەرىلدى.

جيىن سوڭىندا قحا توراعاسىنىڭ ورىنباسارى – قحا حاتشىلىعىنىڭ مەڭگەرۋشىسى م.ا.ءازىلحانوۆ قاتىسۋشىلاردىڭ سوزدەرىن قورىتىندىلاپ، مەملەكەتتىك ورگاندار مەن قوعامدىق ۇيىمدارعا قحا انالار كەڭەسىنە بەلسەندى قولداۋ كورسەتۋدى جانە جوبانىڭ جول كارتاسىن ىسكە اسىرۋ بويىنشا ءتيىمدى ءوزارا ءىس-قيمىل جاساۋدى تاپسىردى.

قاتىسۋشىلار بارلىق ايتىلعان ءىس-شارالار مەن ۇسىنىستار تولىقتاي ىسكە اسىرىلاتىنىنا، ال «مادەنيەتتى انا – مادەنيەتتى ۇلت» جوباسى ورتاق ءىس-ارەكەتتىڭ ارقاسىندا ءوزىنىڭ تۇپكى ماقساتى جەتىپ، ناتيجە كورسەتىنىنە سەنىم ءبىلدىردى.

Abai.kz