قر پرەزيدەنتى ق.توقاەۆتىڭ،
قر جوعارعى سوتىنىڭ توراعاسى
ج.اسانوۆتىڭ،
قر باس پروكۋرورى ب.اسىلوۆتىڭ،
قر ۇلتتىق قاۋىپسىزدىك كوميتەتىنىڭ توراعاسى
ە.ساعىمباەۆتىڭ،
قر سىبايلاس جەمقورلىققا قارسى
ءىس-قيمىل اگەنتتىگىنىڭ توراعاسى
و.بەكتەنوۆتىڭ،
قر قارجىلىق مونيتورينگ اگەنتتىگىنىڭ توراعاسى
ج.ەليمانوۆتىڭ                                                                                    نازارلارىنا!

ماڭعىستاۋ وبلىسى جۇرتى ۆيدەوۇندەۋ مەن اشىق حاتى ارقىلى، ماڭعىستاۋ وبلىستىق، اقتاۋ قالالىق «ارداگەرلەر كەڭەسى» ۇيىمدارى جانە ماڭعىستاۋ وبلىسىنىڭ قوعامدىق كەڭەسى ءوز حاتتارى ارقىلى، ۇلى وتان سوعىسى، جاپون ميليتاريستەرىنە قارسى، وڭتۇستىك جانە سولتۇستىك كورەي اراسىنداعى سوعىستارعا قاتىسقان ارداگەردىڭ بالاسى، سونىمەن قاتار اتى الاشقا ايگىلى، ابىز ءابىش كەكىلبايۇلىنىڭ ءىنىسى، مەملەكەتتىك  قىزمەتتە 20 جىلدان بەرى، ياعني قاتارداعى ماماننان باستاپ، وبلىستىق باسقارمالاردى باسقارعان، اقتاۋ قالاسىنىڭ اكىمى، قازىرگى ۋاقىتتا وبلىس اكىمىنىڭ ورىنباسارى قىزمەتىن اتقارىپ جۇرگەن عالىمجان نيازوۆتىڭ ۇستىنەن، گاز باعاسىنىڭ كۇرت كوتەرىلۋىنە بايلانىستى قىلمىستىق ءىس بويىنشا  جازىقسىز قامالعانىن ايتىپ، قازاقستان حالقىمەن پرەزيدەنتى قاسىم-جومارت توقاەۆتان اراشا سۇرادى.

ول باعانى باقىلايتىن ورگانعا جەتەكشىلىك ەتكەن جوق.

قاڭتاردا ماڭعىستاۋدا گازدىڭ باعاسىنا بايلانىستى حالىق بەيبىت ميتينگكە شىقتى. سول كەزدە «گازدىڭ باعاسىن نەگىزسىز كوتەردىڭ» دەگەن جەلەۋمەن ءوڭىردىڭ ءتول پەرزەنتى، ادال ازاماتى ماڭعىستاۋ وبلىسى اكىمىنىڭ ورىنباسارى ع.نيازوۆقا جالا جابىلىپ، جازىقسىز قاماۋعا الىندى. بىراق، ول گاز باعاسىن كوتەرمەك تۇگىلى، وعان ارالاسا دا المايدى. ويتكەنى، وسى ۋاقىتقا دەيىن مۇناي، گاز سالاسىنا قانداي وليگارحتاردىڭ يەلىك ەتكەنى جۇرتتىڭ بارىنە بەلگىلى ەمەس پە؟ ەكى ورتادا بولاشاعىنان زور ءۇمىت كۇتتىرەتىن ەل ازاماتى كۇيىپ بارادى.

- شىن مانىسىنە كەلگەندە، وبلىس اكىمىنىڭ ورىنباسارى - وكىلەتتى ورگان-ەنەرگەتيكا مينيسترلىگىنىڭ بۇيرىعىمەن باعاسى تۇراقتى بەكىتىلگەن الەۋمەتتىك گاز ءبولۋ كوميسسياسىنىڭ توراعاسى بولعانىمەن، نارىقتاعى باعانى باقىلاۋى ءتيىس مونوپولياعا قارسى ورگانعا جەتەكشىلىك ەتكەن جوق. ءتىپتى كەرەك دەسەڭىز، ع.نيازوۆ بۇل لاۋازىمعا تاعايىندالعان كەزدە ونىڭ مىندەتىنە گازدىڭ ساتىلۋىن قاداعالاۋ ماسەلەسى مۇلدەم كىرمەگەن. ول اۋىلشارۋاشىلىعى، جەر قاتىناستارى، تابيعاتتى قورعاۋ سالالارىنا جەتەكشىلىك ەتتى. ەندەشە، ونىڭ گاز باعاسىنىڭ كوتەرىلۋىنە تىكەلەي دە، جاناما دا قاتىناسى بولماعان. بۇل جەردە ءبىز ءبىر نارسەنى ءتۇسىنۋىمىز كەرەك. ءوڭىردى گازبەن قامتۋداعى، وسى كەزگە دەيىن «تۇسىنىكسىز» بولىپ كەلگەن جاعدايلارعا بايىپپەن قارايتىن بولساڭىز، كوپ نارسەنى اڭعاراسىز. مىسالى، گاز ساتۋ ستانسالارىندا گازدىڭ ازدىعى، باعاسىنىڭ توقتاۋسىز ءوسۋى، جەرگىلىكتى حالىقتىڭ نارازىلىعىن تۋدىردى. مۇنىڭ ارتى ەل اراسىندا ۇلكەن دۇمپۋگە ۇلاستى. ال حالىقتى كىمدەردىڭ جاپپاي تارتىپسىزدىككە يتەرمەلەگىسى كەلگەنى بەلگىلى بولدى ەمەس پە، – دەيدى وڭىردە بىرنەشە جىل باسشىلىق قىزمەتتەر اتقارىپ، زەينەتكە شىققان ارداگەر ا.قارتباي.

ورتادا دەلدالدار پايدا بولدى.

«گاز جانە گازبەن جابدىقتاۋ» تۋرالى زاڭعا سايكەس، 2018 جىلى زاۋىتپەن  گاز ساتۋ ستانساسى بار كاسىپكەرلەردىڭ اراسىندا دەلدال گاز جەلىلىك ۇيىمدارى دەگەن پايدا بولدى. بۇرىن گازدى زاۋىتتان تىكەلەي ساتىپ الاتىن گاز ساتۋ ستانساسى بار كاسىپكەرلەر، ەندى كوتەرمە باعامەن گاز جەلىلىك ۇيىمدارىنان ساتىپ الۋعا ءماجبۇر بولدى.

وسىلايشا، دەلدالدىق قىزمەت كورسەتەتىن گاز جەلىلىك ۇيىمدارى گازدى نەگىزىنەن وزدەرىنىڭ جەكە گاز ساتۋ ستانسالارى ارقىلى ساتىلۋى بارىسىندا ۇزىن-سونار كەزەكتەر پايدا بولىپ، قالعان جەكە كاسىپكەرلەردىڭ كوپ بولىگىنە گاز بەرمەي، جەكە كاسىپكەرلەر گازدىڭ ازدىعىنان گازدى قىمباتقا ساتىپ، الەۋمەتتىك نارازىلىقتار تۋىنداپ، جەرگىلىكتى اتقارۋشى ورگانداردىڭ جۇمىستارىنا كوڭىلى تولماي بۇقارالىق اقپارات قۇرالدارى ارقىلى پرەزيدەنتكە، ۇكىمەتكە جەكە كاسىپكەرلەر شاعىمدانعان.

گاز باعاسىنا ارالاسا المايدى جانە شالا ەلەكتروندىق ساۋدا قىزمەتى.

بىلاي قاراپ تۇرساڭىز، گاز باعاسىن وبلىس اكىمىنىڭ ورىنباسارى مۇلدەم بەلگىلەي المايدى. ول مۇمكىن ەمەس جاعداي. ەندەشە قاڭتار وقيعاسىنا سەبەپشى بولدى دەپ تانىلعان گاز پروبلەماسى قايدان شىقتى؟ نەگە بۇل گاز 10-12 جىلعا سوزىلعان شەشىلمەيتىن ماسەلەگە اينالدى؟ وسى سۇراق اركىمدى مازالايتىنى انىق.

گازعا قاتىستى بارلىق ماسەلەلەر 2012 جىلدىڭ 9 قاڭتارىندا قابىلدانعان «گاز جانە گازبەن جابدىقتاۋ» تۋرالى زاڭمەن رەتتەلىپ كەلەدى. 2018 جىلى 2 مامىردا وسى اتالعان زاڭعا گازدىڭ 10-20% ەلەكتروندى ساۋدا الاڭدارى ارقىلى ساتۋ تۋرالى وزگەرىس ەنگىزىلگەن.

باسەكەلەستىكتى قورعاۋ جانە دامىتۋ اگەنتتىگىنىڭ ۇسىنىسىمەن 2 جىلدىڭ ىشىندە، ياعني 2022 جىلدىڭ قاڭتار ايىنان باستاپ زاۋىتتان شىعاتىن گاز 100% تولىعىمەن ەلەكتروندى ساۋدا الاڭى ارقىلى ساتىلۋى ءتيىس بولعان.

اقپارات رەتىندە: زاڭعا سايكەس 2018 جىلدان اياعىنان 2021 جىلدىڭ ءساۋىر ايىنا دەيىن، وبلىسقا قاجەتتى گازدىڭ 20% ەلەكتروندىق ساۋدا الاڭى ارقىلى ساتىلىپ باستالعان، ال 2021 جىلدىڭ ءساۋىر ايىنان - جىلدىڭ اياعىنا دەيىن، اي سايىن 5-10% دەيىن قوسىلىپ، جىل اياعىندا تولىقتاي 100% ەلەكتروندى ساۋدا الاڭىنا ءوتتى. سول سەبەپتى، كوميسسيا ءوز جۇمىسىن توقتاتتى.

بۇل شەشىم سۇرانىس پەن ۇسىنىستى ەسكەرە وتىرىپ، بوتتاردى پايدالانۋعا جول بەرمەۋگە جانە سۋبەكتىلەرگە ءادىل باسەكەلەستىك قاعيداسىنىڭ نەگىزىندە ساۋدا الاڭدارىندا گازدى ساتىپ الۋ ءۇشىن بىردەي قاتىسۋعا مۇمكىندىك بەرۋى ءتيىس بولاتىن.

«كورشى وبلىس، ەلدەرگە قاراعاندا بىزدەگى گاز باعاسى وتە تومەن، سوندىقتان زاڭسىز سىرتقا تاسۋ، ءارى ەلدەگى بولشەك ساۋداداعى گازدىڭ باعاسى كوتەرمە ساۋدادان كوپ جوعارى. زاۋىتتار حالىققا (ىشكى رىنوكقا) گاز ساتقاننان ءتاۋىر پايدا تابا الماي وتىر، 2017 جىلى ەلدىڭ زاۋىتتارىنىڭ وسى سەبەپتەن جوعالتقان پايدالارىنىڭ مولشەرى 40 ملرد تەڭگەدەي بولدى. سونىمەن تومەن باعامەن گازدى ىشكى نارىققا بەرۋ، وڭدەۋ كولەمىن كوبەيتۋ زاۋىتتار ءۇشىن ءتيىمسىز. ەلىمىزدە وندىرىلەتىن گازدىڭ 72% ىشكى نارىققا بەرىلەدى. سول سەبەپتى، زاۋىتتارعا دۇرىس كىرىس كىرۋى ءۇشىن باعانى كوتەرۋ كەرەك، ول ەلەكتروندى ساۋدا ارقىلى قامتاماسىز ەتىلەدى»، - دەدى مينيسترلىك وكىلدەرى.

سول كەزدەن باستاپ، «قازمۇنايگاز» كومپانياسىنا  باعىنىشتى گاز وڭدەۋ زاۋىتتارى، گازعا وزدەرى  باعا قويىپ، ەلەكتروندى ساۋدا الاڭدارى قىزمەتىن اتقاراتىن جەكەمەنشىك مەكەمەلەر ارقىلى ساتتىققا شىعارعان.

نەگىزگى بىلىقتىڭ ورداسى، گازعا وزدىگىنەن باعا قويعان گاز وڭدەۋ زاۋىتتارى جانە ەلەكتروندى ساۋدا الاڭىنىڭ جەتىلمەگەن جۇيە ەكەنى ايدان انىق بولدى. دەمەك، ەلەكتروندى ساۋدا الاڭى ارقىلى گاز ساتۋ تەتىگى شالا، ياعني ابدەن پىسىقتالماعان بولىپ شىقتى. مىسال  رەتىندە: كەيبىر ازاماتتاردىڭ ايىنا ءبىر رەت وتكىزىلەتىن ساۋدا الاڭى ارقىلى، ساۋدانى وتكىزۋشى مەكەمەمەن ساۋداعا قاتىسۋشى كاسىپكەرلەردىڭ اراسىندا زاڭسىز دەلدالدىق كورسەتۋ ناتيجەسىندە ازعانا كاسىپكەرلەردىڭ جەڭىمپاز بولا بەرۋى، وبلىستاعى بارلىعى 350-دەي گاز ساتۋ ستانساسى بار 250-دەي كاسىپكەردىڭ نارازىلىعىن تۋدىردى.

ال، ءادىل باسەكەلەستىكتى قامتاماسىز ەتۋشى، وسى شارۋالارعا باقىلاۋ جاساۋعا مىندەتتى باسەكەلەستىكتى قورعاۋ جانە دامىتۋ اگەنتتىگى سول كەزدەردە قايدا قاراپ وتىرعان؟

قر پرەزيدەنتى اكىمشىلىگىنىڭ تاپسىرماسى

2021 جىلدىڭ اقپان-ءساۋىر ايلارى ارالىعىندا وڭىردە «جىعىلعانعا جۇدىرىق» - دەگەندەي، پاندەميامەن بىرگە، گاز تاپشىلىعى تۋىنداپ، باعاسى قىمباتتاپ جانە ۇزىن-سونار كەزەكتەر پايدا بولىپ، الەۋمەتتىك نارازىلىقتار ورىن الىپ، بۇقارالىق اقپارات قۇرالدارى ارقىلى پرەزيدەنتكە، ۇكىمەتكە شاعىمدانعان گازەت-جۋرنالداردا ماتەريالداردى كورىپ جاعدايدىڭ وڭاي بولماعانىن كوردىك .

تاپسىرماعا بايلانىستى 2021 جىلى ناۋرىزدا جىل اياعىنا دەيىن، وڭىردە الەۋمەتتىك احۋالدى تۇراقتاندىرىپ، نارازىلىقتاردى بولدىرماۋ، ەنەرگەتيكالىق قاۋىپسىزدىكتى قامتاماسىز ەتۋ جانە گازدىڭ تاپشىلىعىن جويۋ ماقساتىندا  قر «قازاقستان رەسپۋبليكاسىنىڭ ۇلتتىق قاۋىپسىزدىگى تۋرالى» زاڭىنىڭ 22-بابىنا سايكەس، ەنەرگەتيكا ۆيتسە-ءمينيسترى ج.قاراعاەۆتىڭ توراعالىعىمەن وبلىس اكىمدىگىندە گاز جەلىسى ۇيىمدارى وكىلدەرىنىڭ قاتىسۋىمەن جينالىس ءوتتى. ودان ءارى جىل اياعىنا دەيىن گاز جەلىسى ۇيىمدارىنىڭ قولدۋىمەن ماڭعىستاۋ وبلىسىندا گاز نارىعىندا ءتارتىپ ورنادى.

كوميسسيا گاز ساۋداسىن بەلگىلەي المايدى

وبلىس اكىمدىگىنىڭ  گاز بويىنشا جۇمىسشى ورگانى - ماڭعىستاۋ وبلىسىنىڭ ەنەرگەتيكا جانە تۇرعىن ءۇي-كوممۋنالدىق باسقارماسى بولىپ تابىلادى.

گاز جەلىسى ۇيىمدارى وزدەرىنىڭ گازعا قاتىستى سۇرانىستارىن اي سايىن، ماڭعىستاۋ وبلىسىنىڭ ەنەرگەتيكا جانە تۇرعىن ءۇي-كوممۋنالدىق باسقارماسىنا ۇسىنادى. ودان ءارى باسقارما وبلىسقا قاجەتتى الەۋمەتتىك گازدى گاز جەلىسى ۇيىمدارى اراسىنا ءبولۋ ءۇشىن، ەنەرگەتيكا مينيسترلىگىنىڭ ەرەجەسىنە سايكەس قۇجات جوباسىن دايىنداپ، بىرگە شەشىم قابىلداۋ ءۇشىن، كوميسسياعا ۇسىنادى، كوميسسيا قۇرامى: توراعاسى وبلىس اكىمى ورىنباسارى ع. نيازوۆ، كوميسسيا توراعاسى ورىنباسارى  ماڭعىستاۋ وبلىسىنىڭ ەنەرگەتيكا جانە تۇرعىن ءۇي-كوممۋنالدىق باسقارماسى باسشىسى ب.قارتباەۆ، كوميسسيا مۇشەلەرى وبلىستىق ءماسليحاتتىڭ دەپۋتاتتارى ا. سالمانوۆ، ا. سۇگىرباي، وبلىستىق قوعامدىق كەڭەس مۇشەسى و. توعجانوۆ، «اتامەكەن» ۇكپ  ورىنباسارى ا. تۇراشەۆا، قازىرگى «قازاقستان حالقىنا» فوندىنىڭ كوميسسيا مۇشەسى ۆ. تريفونوۆ جانە تاعى باسقالار.

(ع.نيازوۆ 2020 جىلدىڭ ماۋسىم ايىنان باستاپ وبلىس اكىمىنىڭ ورىنباسارى، ال 2020 جىلدىڭ قاراشا ايىنان 2021 جىلدىڭ قاراشا ايى اراسىندا زاڭناماعا سايكەس الەۋمەتتىك گازدى، گاز جەلىلەرى ارسىندا ءبولىنۋى كوميسسيا توراعاسى بولعان).

كوميسسيا توراعاسىمەن ونىڭ مۇشەلەرى جانە ماڭعىستاۋ وبلىسىنىڭ ەنەرگەتيكا جانە تۇرعىن ءۇي-كوممۋنالدىق باسقارماسى گازدىڭ باعاسىنا، ەلەكتروندى ساۋدا الاڭى جۇمىسىنا، گاز ساتۋ ستانسالارىنىڭ جۇمىستارىنا ارالاسۋعا قۇقى جوق. سول سەبەپتى، گاز باعاسىنا ىقپال ەتە المايدى.

نەگىزسىز ايىپ تاعىلدى

بۇدان كەيىن، ماڭعىستاۋ وبلىسى اكىمىنىڭ ورىنباسارى ع.نيازوۆقا، ەنەرگەتيكا مينيسترلىگىمەن قازاق گاز وڭدەۋ زاۋىتى اراسىنداعى 2021 جىلى جاساقتالعان مەموراندۋمدى بۇزۋ تۋرالى حات جولداپ «ءوزىنىڭ قىزمەتىن اسىرا پايدالانعان» دەگەن ايىپ تاققان.

وسى جەرگە توقتالساق، 2021 جىلى قىركۇيەك ايىندا 350-گە جۋىق گاز ساتۋ ستانساسى بار، قۇرامىندا 250 كاسىپكەرى بار «مۇنايلىاۆتوگاز» اسسوتسياتسياسى باسشىسى م.نۇرتاەۆ، زاڭمەن رەتتەلمەگەن جوعارى جانە تومەنگى شەكتى باعانى الىپ تاستاۋ جانە ەلەكتروندىق ساۋدا الاڭىنداعى كەلەڭسىز جاعدايلار ورىن الىپ جاتقانى تۋرالى ەنەرگەتيكا ءمينيسترى م.مىرزاعاليەۆكە جانە وبلىس اكىمى ن.نوعاەۆقا حات جازادى. بىراق تا باعانى شەكتەۋگە جانە ەلەكتروندى ساۋداعا قاتىستى شەشىم قابىلداۋعا وبلىس اكىمدىگىنىڭ قۇزىرى جوق بولعاندىقتان، اسسوتسياتسيا حاتىن تىركەپ مينيسترلىككە ع.نيازوۆ شەشىم قابىلداۋ ءۇشىن حات جولداعان.

بۇل جەردە وبلىس اكىمى ورىنباسارى «مۇنايلىاۆتوگاز» اسسوتسياتسياسى ءوتىنىشىن ەنەرگەتيكا مينيسترلىگىنە جولداعانى ءۇشىن، ال ەنەرگەتيكا ۆيتسە-ءمينيسترى ەلەكتروندى ساۋدا الاڭىنا ساۋدا-ساتتىقتى زاڭ تالاپتارىنا ساي وتكىزۋگە ۇسىنىس جاساعانى ءۇشىن كۇدىكتى بولىپ وتىرعانى ايان.

پارادوكس، ع.نيازوۆتىڭ قورعاۋشىسى ر.ۋميربولاتوۆتىڭ ساۋالىنا: «ەنەرگەتيكا مينيسترلىگى 2021 جىلى قازاق گاز وڭدەۋ زاۋىتىمەن گازدىڭ باعاسىن رەتتەۋ تۋرالى مەموراندۋم بولماعان دەگەن» -  رەسمي جاۋاپ بەرگەن.

ماڭعىستاۋدا گازعا بايلانىستى ماسەلەنىڭ تۇپكىلىكتى شەشىلمەي كەلە جاتقانىنا 10-12 جىلداي بولدى. قر قارجىلىق مونيتورينگ اگەنتتىگىنىڭ ماڭعىستاۋ وبلىسى بويىنشا ەكونوميكالىق تەرگەۋ دەپارتامەنتى وسى گازعا قاتىستى سۇراقتاردى «قازمۇنايگاز» كومپانياسىنا باعىنىشتى «قازاق گاز وڭدەۋ زاۋىتى» جشس-باسشىلارىنا، ەلەكتروندى ساۋدا الاڭى ارقىلى گاز ساتۋدى ۇيىمداستىرۋشىلارعا، باسەكەلەستىكتى قورعاۋ جانە دامىتۋ اگەنتتىگى وكىلدەرىنە قويۋدىڭ ورنىنا، ەنەرگەتيكا ۆيتسە-ءمينيسترى ج.قاراعاەۆ پەن وبلىس اكىمىنىڭ ورىنباسارى ع.نيازوۆتى كۇدىكتىلەر رەتىندە قاماۋعا الدى.

بارلىق كىنانى ءبىر ادامعا جابا سالۋ ماقساتىن كوزدەيدى

«ع.نيازوۆ قىزمەتتىك مىندەتتەرىن اسىرا پايدالاندى» دەگەن نەگىزسىز كۇدىككە ءىلىنىپ وتىر، ول ءوزىنىڭ فۋنكتسيونالدىق مىندەتتەرىنە سايكەس، ەنەرگەتيكا جانە  تۇرعىن ءۇي-كوممۋنالدىق باسقارماسىن سونىمەن قاتار كاسىپكەرلىك باسقارمالارىنىڭ  قىزمەتىن ەشقاشان قاداعالاعان دا، باسقارعان دا ەمەس. ونىڭ ۇستىنە، تاعى ءبىر تاعىلعان ايىپقا توقتالاتىن بولساق، ع.نيازوۆتىڭ ءوزى جەكە دارا، جۇمىس جاسامايتىن گاز جەلىسى ۇيىمدارىنا گاز بولگەن دەگەن، شىندىعىنا كەلسەك، ول گاز جەلىسى ۇيىمىنا 2019 جىلدان بەرى، ع.نيازوۆقا دەيىنگى كوميسسيامەن دە گاز بولىنگەن (ع.نيازوۆ 2020 جىلدىڭ ماۋسىم ايىنان باستاپ وبلىس اكىمىنىڭ ورىنباسارى قىزمەتىن اتقارىپ كەلەدى، ال 2020 جىلدىڭ قاراشا ايىنان 2021 جىلدىڭ قاراشا ايى اراسىندا زاڭناماعا سايكەس گازدى، گاز جەلىلەرى ارسىندا ءبولىنۋى كوميسسيا توراعاسى بولعان).

سونداي-اق، وبلىستاعى 10-عا جۋىق گاز جەلىسى ۇيىمدارىنىڭ بارلىعى، وكىلەتتى ورگان - ەنەرگەتيكا مينيسترلىگى دەپارتامەنتىنەن زاڭعا سايكەس قىزمەت كورسەتۋ ءۇشىن العان اككرەديتاتسيالارى بار.  كوميسسيا - القالى ورگان، شەشىم داۋىس بەرۋ ارقىلى قابىلدانادى. كوميسسيا توراعاسى جەكە-دارا شەشىم قابىلداي المايدى. كوميسسيانىڭ اككرەديتاتسياسى بار گاز جەلىسى ۇيىمدارىنا گاز بولمەۋگە قۇقى جوق.

سونىمەن قاتار، قر پرەزيدەنتى ق.توقاەۆ شاعىن كاسىپكەرلىك سۋبەكتىلەرىنە، بارۋ ارقىلى تەكسەرۋلەردى، پروفيلاكتيكالىق باقىلاۋ، قاداعالاۋ جانە تەكسەرۋ جۇرگىزۋگە 3 جىلعا (2020-2022 جىلدار) موراتوري جاريالاعان.

سوندىقتان وبلىس اكىمىنىڭ ورىنباسارى ع.نيازوۆتىڭ ارەكەتتەرىندە ەشقانداي قىلمىستىق قۇرام جوق.

بۇل ورىن العان قاڭتار وقيعاسى ءۇشىن ماڭعىستاۋ وبلىسى بويىنشا بارلىق كىنانى ءبىر ادامعا جابا سالۋ ماقساتىن كوزدەيدى.

قۇرمەتتى قاسىم-جومارت كەمەلۇلى!

قازاقستان رەسپۋبليكاسىنىڭ كونستيتۋتسياسى مەن زاڭدارىنىڭ مۇلتىكسىز ساقتالۋىنىڭ كەپىلى رەتىندە جوعارىدا اتالعان ماسەلەدە قىلمىس قۇرامىنىڭ بولماۋىنا بايلانىستى قىلمىستىق ءىستى قىسقارتىپ، ماڭعىستاۋ وبلىسى اكىمىنىڭ ورىنباسارى عالىمجان نيازوۆتى بوساتۋعا جانە ودان بارلىق ايىپتاۋلاردى الىپ تاستاۋعا جاردەم كورسەتۋىڭىزدى سۇرايمىز!

ءشارىپحان قايسار

Abai.kz