پرەزيدەنت قاسىم-جومارت توقاەۆ «قۇقىق قورعاۋ ورگاندارىنان ءبىرىنشى كەزەكتە الاياقتىق، قارجىنى جىلىستاتۋ، زاڭسىز اقشا تابۋ، قارجى پيراميدالارىن قۇرۋ ارەكەتتەرىن اشكەرەلەۋدى تالاپ ەتتى»، - دەپ حابارلايدى Akorda.kz.

پرەزيدەنت ەلىمىزدىڭ بيزنەس وكىلدەرىمەن كەزدەسۋ بارىسىندا «مايشەلپەك ورىندار» مەن جايلى قىزمەت ورىندارىن ۇلەستىرۋگە جول بەرىلمەيتىنىن ايتتى.

«جالپى، جۇمىستى دۇرىس جۇرگىزۋ ءۇشىن مەملەكەتتىك ورگانداردىڭ ەسەبى جەتكىلىكسىز. ەلىمىزدە جانە الەمدە بولىپ جاتقان وقيعالار تۋرالى سىزدەردىڭ پىكىرلەرىڭىزدى ءبىلۋ اسا ماڭىزدى. مەن، ەڭ الدىمەن، ءبىر ماسەلەنى ناقتى ايتقىم كەلەدى. «ويىن ەرەجەسى» ءادىل ءارى بارىنە بىردەي بولاتىن اشىق ەكونوميكا ساياساتى جالعاسا بەرەدى. بۇل – مەنىڭ بەرىك ۇستانىمىم. «مايشەلپەك ورىندار» مەن جايلى قىزمەتتەردى ۇلەستىرۋگە جول بەرىلمەيدى، – دەدى پرەزيدەنت.

سونداي-اق مەملەكەت باسشىسى قازاقستاندىق بيزنەستە ەشقانداي رەيدەرلىك بولماۋى كەرەگىن ناقتىلاپ ءوتتى.

«وڭىرلىك بيلىك پەن اۋماقتىق قۇقىق قورعاۋ بولىمشەلەرىنىڭ باسشىلارى كاسىپكەرلەرمەن بىرىگىپ، بيزنەستى قولداۋ دەگەن سىلتاۋمەن ۇنەمى زاڭدى بولا بەرمەيتىن ارەكەتتەردىڭ جۇزەگە اسىرىلۋىنا سەپتىگىن تيگىزگەنى جاسىرىن ەمەس. بۇل – ۇلەستى ءوزارا ءبولىسىپ العان دەگەن ءسوز. مۇنىڭ ءبارى سىبايلاس جەمقورلىققا، كولەڭكەلى ارەكەتتەرگە، اكىمشىلىك رەسۋرستارعا نەگىزدەلگەن جانە تەندەرلەر مەن بيۋدجەت قارجىسىن وڭدى-سولدى شاشۋعا باعىتتالعان قازاقستاندىق بيزنەستىڭ اششى دا بولسا شىنايى بەينەسىن  قالىپتاستىردى. مۇنداي قىلمىس تۇرلەرىنە مەملەكەت باتىل ءارى مىندەتتى تۇردە جۇيەلى توسقاۋىل قويۋعا ءتيىس. بۇل – ۇلكەن مىندەت. وتاندىق بيزنەستىڭ ءدال وسىنداي سيپاتى تۇتاس مەملەكەتتىڭ بەدەلىنە زور نۇقسان كەلتىرەدى.  باسقاشا ايتقاندا، ەلىمىزدە ەشقانداي دا قولداۋشى تىرەك پەن رەيدەرلىك بولماۋى كەرەك. ەگەر بيزنەس ادال جۇمىس ىستەۋگە دايىن ءارى كرەاتيۆتى، زامانعا ساي سۇرانىسقا يە بولسا، ونى قولداۋ قاجەت. ۇلتتىق ەكونوميكانىڭ جاڭا مودەلىنە ەنۋگە كومەكتەسۋ كەرەك. ءبىز بيزنەس پەن مەملەكەت مۇددەسى اراسىنداعى تەڭگەرىمدى قاتاڭ ساقتاۋعا ءتيىسپىز، – دەدى قازاقستان باسشىسى.

Abai.kz