ەكونوميكالىق تاۋەلسىزدىگىمىز بيىل بارىنشا نىعاياتىن بولدى. قازاقستان رۋبل قۇشاعىنان بوساي باستادى.

ەندى وسى ترەندتى ساقتاپ قالۋ كەرەك. ناۋرىز بويىنشا كوپتەن كۇتكەن سىرتقى ساۋدا ستاتيستيكاسى شىقتى جانە وندا ءبىزدى كۋانتىپ وتىرعان ءبىر ماسەلە بار. رەسەيدەن بىزگە كەلەتىن يمپورت ايتارلىقتاي تومەندەگەن. ناۋرىزدا ول 1,28 ملرد دوللار بولدى. ول اقپان ايىنان الدەقايدا از (1,35 ملرد $). ال رەسەيگە ەكسپورت اقپان ايىنداعى دەڭگەيدە قالعان. ەگەر ءساۋىر-مامىر بويىنشا رەسەي يمپورتى 1,25 ملرد $ دەڭگەيىنە تۇسسە، وندا ءبىز جىل اياعىنا دەيىن تاۋەلدىلىكتەن قۇتىلامىز.

رەسەي يمپورتى بىزگە رۋبل باعامى مەن ينفلياتسيانى دا قاتار اكەلىپ جۇرگەنىن ەسكەرۋ كەرەك. سوندىقتان، يمپورتتىڭ قىسقارۋى ءبىزدىڭ رۋبل كۋرسىنا بايلانىسىمىزدى السىرەتەدى. رەسەيدىڭ ەكونوميكالىق ىقپالىنان كەتۋ وتانىمىز ءۇشىن اسا ماڭىزدى: رەسەيدەگى دەفولت سالدارى (كونتراگەنتتەر بانكروتتىعى) بىزگە اۋىر سوققى بولىپ ءتيۋى مۇمكىن.

ازىرگە رۋبلمەن بايلانىسىمىز انىق بايقالىپ وتىر. موسبيرجادا ءرۋبلدىڭ 57,8 دەڭگەيىنە دەيىن كۇشەيۋىنە تەڭگە دە بىردەن ءۇن قاتتى. ناتيجەسىندە KASE ساۋدا سەسسياسىنىڭ سوڭىندا تەڭگەنىڭ اقش دوللارىنا شاققانداعى باعامى 420 تەڭگەگە دەيىن كۇشەيدى.

بىراق ءرۋبلدىڭ ارتىنان سالپاڭداي بەرۋ تەڭگەنى ءبىر كۇنى جارعا جىعارى انىق. سول ءۇشىن تەز ارادا رەسەيدىڭ ەكونوميكالىق ىقپالىنان بوساپ شىعۋدىڭ امالدارى قاجەت. يمپورتتى ءارتاراپتاندىرۋ، قىتاي، تۇركيا، ءۇندىستان، يران، وزبەكستانسىز مۇمكىن ەمەس. سوندىقتان، جالعىز رەسەيگە قاراي بەرمەي، باسقا كورشىلەرىمىزدىڭ دە بار ەكەنىن ۇمىتپايىق.

ايبار ولجاەۆ

Abai.kz