وزبەكستان پرەزيدەنتى شاۆكات ميرزياەۆتىڭ قاۋلىسىمەن توتەنشە جاعدايلاردىڭ الدىن-الۋ جانە ونىڭ سالدارىن جويۋ تۋرالى وزبەك جانە قازاق ۇكىمەتى اراسىنداعى كەلىسىم بەكىتىلدى.

بىلتىر جەلتوقسان ايىندا وزبەكستان باسشىسىنىڭ ەلىمىزگە ساپارى ۋاقىتىندا قۇجاتقا ەكى تاراپتىڭ قولى قويىلعان بولاتىن. كەلىسىمدە تابيعي جانە تەحنوگەندىك اپاتتاردىڭ الدىن الۋ، ولاردىڭ سالدارىن ازايتۋ بويىنشا توتەنشە جاعدايلار مەكەمەلەرى بىرلەسىپ ءتيىمدى ءىس اتقارۋى ءۇشىن كەشەندىك شارالار مەن ارەكەتتەر قاراستىرىلعان جانە نەگىزگى باسىمدىق شەكاراعا جاقىن ايماقتارعا بەرىلمەك.

بۇدان بولەك كەلىسىمدە قاۋىپتى تەحنوگەندىك جانە ەكولوگيالىق پروتسەسستەرگە، جاراتىلىس قۇبىلىستارىنا مونيتورينگ جۇرگىزۋ جانە بولجامدار بويىنشا ءوزارا ۇزدىكسىز اقپارات الماسۋ، تابيعي اپاتتاردىڭ الدىن الۋ، مەتوديكالىق ادەبيەتتەر، ۆيدەو جانە فوتوماتەريالدار، سونىمەن بىرگە ارنايى تەحنيكالىق قۇرالدار الماسۋ جايىندا جازىلعان.

ايتا كەتەيىك، 2020 جىلدىڭ جازىندا وزبەكستانداعى ساردوبا سۋ قويماسى جارىلىپ، قازاقستاننىڭ تۇركىستان وبلىسىنداعى ماقتاارال اۋدانىن سۋ باسقان. 30 مىڭنان استام ادام قاۋىپسىز جەرگە ەۆاكۋاتسيالاندى. سۋ وزبەكستانمەن شەكتەسەتىن بەس اۋىلدى، سونىمەن بىرگە 7 639 گەكتار ماقتا القابىن باسىپ قالعان.

Abai.kz