13 ماۋسىمدا بىشكەك قالاسىندا پرەزيدەنت اكىمشىلىگى مەن ۇكىمەت ءۇيى الدىندا 200-دەن استام كاسىپكەر ميتينگ ۇيىمداستىردى. ولار كاسسا اپپاراتتارى مەن شوت-فاكتۋرا ەنگىزۋگە قارسى شىعىپ، پاتەنت جۇيەسىن قالدىرۋدى تالاپ ەتتى.

كاسسا اپپاراتتارىن قولدامايتىندار دۇيسەنبى كۇنى تالاس وبلىسىندا دا جينالدى. مۇنداعى ميتينگىگە 80-گە جۋىق ادام قاتىستى.

كاسىپكەرلەر تالابىن ۇكىمەت باسشىسى اقىلبەك جاپاروۆ تىڭدادى. ول كاسسا اپپاراتتارىن ەنگىزۋگە ون كۇندىك موراتوري جاريالاناتىنىن، ايىپپۇل سالىنبايتىنىن مالىمدەدى. پرەمەر-مينيستر قىرعىزستاننىڭ ءتۇرلى وڭىرلەرىنەن ون ادام جيناۋدى ۇسىندى. ء"بارىمىز بىرگە دۇرىس جول تابۋعا تىرىسامىز. شوت-فاكتۋرانىڭ سىزدەرگە قاتىسى جوق، ول تاۋار جەتكىزۋشىلەرگە عانا جۇرەدى", - دەدى جاپاروۆ.

11 ماۋسىمدا اقىلبەك جاپاروۆ "دوردوي Food" بازارىنىڭ كاسىپكەرلەرىمەن دە كەزدەسكەن. بازارداعى ساۋداگەرلەر دە كاسسا اپپاراتتارىنا قارسى.

بيىل 18 قاڭتاردا قابىلدانعان سالىق كودەكسىنە سايكەس، ەلدەگى كاسىپكەرلەردىڭ ءبارى كاسسا اپپاراتتارىن پايدالانۋى ءتيىس. بىراق مۇنداي وزگەرىسكە جەرگىلىكتى كاسىپكەرلەر دايىن بولماي شىقتى. ولار وسىعان دەيىن دە بىرنەشە مارتە ميتينگ وتكىزدى.

Abai.kz