19 ماۋسىمدا الماتىداعى ءال-فارابي اتىنداعى قازاق ۇلتتىق ۋنيۆەرسيتەتىندە وتكەن لەكتسيادان سوڭ قازاقستانداعى قاڭتار وقيعاسى تۋرالى سۇراققا جاۋاپ بەرگەن قىرعىزستاننىڭ ءبىرىنشى پرەزيدەنتى اسقار اقاەۆ "حالىقتىڭ دامۋدىڭ جاڭا ساتىسىنا وتۋگە تالپىنىسى – تابيعي پروتسەسس" دەدى. بۇل تۋرالى ازاتتىققا سىلتەمە جاساپ Abai.kz حابارلايدى.

"مەنىڭشە، كەز كەلگەن حالىق، كەز كەلگەن ۇلت ۋاقىت وتە دامۋدىڭ جاڭا ساتىسىنا وتۋگە تالپىنادى. بۇل – تابيعي پروتسەسس. ەگەر ەل باسشىلارى الدىن الا السا، كەيدە الەۋمەتتىك نارازىلىقتارسىز دا جۇزەگە اسادى. ەل باسشىلارى ۋاقىت اعىمىنا ىلەسە الماسا، حالىق نارازىلىققا شىعادى. مەنىڭ ويىمشا، وسى وقيعا رەفەرەندۋمعا جەتكىزدى، رەفەرەندۋم ارقىلى قازاقستان حالقى گۇلدەنگەن، ادىلەتتى، كۇشتى ەكىنشى رەسپۋبليكا قۇرۋ جونىندە بيىك ماقسات قويدى",- دەدى ول.

1990-2005 جىلدارى قىرعىزستان پرەزيدەنتى بولعان اسقار اقاەۆ 2005 جىلى 24 ناۋرىزداعى "قىزعالداق توڭكەرىسى" كەزىندە بيلىكتەن كەتىپ، ماسكەۋدەن ساياسي باسپانا العان. كەيىن بۇل ارەكەتىن ء"وز حالقىما وق اتپاۋ – باستى ۇستانىمىم" دەپ تۇسىندىرگەن.

قازىر لومونوسوۆ اتىنداعى ماسكەۋ مەملەكەتتىك ۋنيۆەرسيتەتى جانىنداعى كۇردەلى جۇيەلەردى ماتەماتيكالىق زەرتتەۋ ينستيتۋتىنىڭ باس عىلىمي قىزمەتكەرى بولىپ جۇرگەن اسقار اقاەۆ ءال-فارابي اتىنداعى قازاق ۇلتتىق ۋنيۆەرسيتەتىندە "كونە داۋىردەن بەرگى دەموگرافيالىق كورسەتكىش جانە ادامزات بولاشاعى" دەگەن تاقىرىپتا لەكتسيا وقىدى.

اسقار اقاۆتىڭ لەكتسياسىنا شەتەل ديپلوماتيالىق وكىلدىكتەرى جانە قازۇۋ وقىتۋشىلارى مەن قازاقستاننىڭ وزگە دە عالىمدارى، ستۋدەنتتەر جانە باق وكىلدەرى قاتىستى.

Abai.kz