پەتەربورداعى فورۋمدا پرەزيدەنت توقاەۆ الاڭداتاتىن ءبىر تەندەنتسيانى ايتتى. الايدا پرەزيدەنتتىڭ ول سوزىنە ەشكىم كوڭىل اۋدارمادى. بار نازار نەگىزىنەن لند، دنر، كەوساياندارعا اۋىپ كەتتى. توقاەۆ جاساندى ينتەللەكت پەن فۋتۋرولوگيالىق بولجامنان اجەپتەۋىر حابارى بارىن كورسەتتى. پرەزيدەنت وزىق تەحنولوگيالار تۋرالى ايتا وتىرىپ، مىقتى مامانداردىڭ قازاقستاننان كەتىپ جاتقانىن جانە ولارعا مۇمكىندىك تۋعىزا الماي وتىرعانىمىزدى مويىندادى. ەڭ باستىسى، “بۇل ءبىزدىڭ قاتەلىگىمىز” دەپ اشىپ ايتتى. ال پۋتين بولسا، قازاقستاندا IT-ماماندارعا قولايلى جاعداي جاسالعانىن ايتىپ، رەسەيلىك مامانداردىڭ قازاقستانعا كەتىپ جاتقانىن جانە رەسەي قازاقستاننان ۇلگى الۋ كەرەكتىگىن جەتكىزدى.

گلوباليزاتسيا يگىلىن كورىپ قالعان، شەتەلگە ەمىن-ەركىن شىعىپ جۇرگەن ازاماتتاردىڭ سانكتسيالاردىڭ استىنا تۇسكەن ەلدە تۇرعىسى كەلمەيتىنىن تۇسىنىكتى عوي. بىراق سانكتسياسىز كۇندەردىڭ وزىندە دە مىقتى رەسەيلىك مامانداردىڭ قازاقستانعا كەلۋى ەكىتالاي دەپ ويلايمىن. ولاردىڭ ەڭ مىقتىلارى اقش-قا، ەۆروپاعا كەتەدى. بىزدەگى جاعداي دا شامامەن وسىنداي ەكەنىن پرەزيدەنت ءبىلىپ وتىر. بۇعان رەسمي ستاتيستيكا دالەل - بۇگىندە ەلىمىزدە ميگراتسيانىڭ تەرىس سالدوسى تىركەلىپ وتىر، ياعني ەلدەن كوشىپ كەتكەندەردىڭ سانى ەلگە كوشىپ كەلگەندەردەن كوپ. مەنىڭ تانىستارىمنىڭ اراسىندا دا ەلدەن كوشىپ كەتكەندەر جەتەرلىك. كوشىپ كەتكەندەردىڭ بارلىعى دەرلىك ءوز سالاسىنىڭ مايتالماندارى. شتۋچنىي كادرلار. ولارعا ەلىمىزدەگى ساياسي جاعداي ۇنامايدى.

ەلىمىزدى ءبىرىنشى كەزەكتە وزىمىزگە، سوسىن وزگەلەرگە تارتىمدى ەتۋ ءۇشىن نە ىستەۋ كەرەك؟ ول ءۇشىن ساياسي رەفورمالاردىڭ يميتاتسياسىنان باس تارتىپ، شىنايى دەموكراتيالىق رەفورمالاردى جۇزەگە اسىرۋ كەرەك. سوندا عانا ەكونوميكا داميدى، سوندا عانا ازاماتتاردىڭ تابىسى ارتادى، سوندا عانا ادامدار ءوز پوتەنتسيالىن ءوز ەلىندە اشا الادى. مىقتى مامانداردىڭ ەميگراتسياسىن توقتاتۋدىڭ باسقا جولىن كورىپ تۇرعام جوق. ءبىز جاڭا قازاقستاندى، مىقتى قازاقستاندى، ساپالى قازاقستاندى ەسكى، ناشار، ساپاسىز ماماندارمەن قۇرا المايمىز. ەڭ باستىسى، ءبىز تارتىمدى قازاقستاندى ۇسقىنسىز ساياسي تەحنولوگيالاردىڭ كومەگىمەن، كوزبوياۋشىلىقپەن قۇرا المايمىز. بارىمىزگە سول تارتىمدى قازاقستاندا تۇرۋدى جازسىن.

نۇربەك ماتجاني

Abai.kz