ۋكراينا ادام قۇقىقتارى جونىندەگى ەۋروپالىق سوتتقا رەسەيدىڭ ۇستىنەن شاعىم ءتۇسىردى. كيەۆ ماسكەۋدى باسقىنشىلىق جاساۋ، بەيبىت تۇرعىندارعا قاساقانا شابۋىلداۋ ارقىلى حالىقارالىق قۇقىقتاردى ورەسكەل بۇزدى دەپ ايىپتادى.

شاعىم 23 ماۋسىمدا قابىلدانعان، ال سەيسەنبى كۇنى كەشكە ەۋروپالىق سوت وكىلى روبەرت سپانو ونى سۋديالارعا تاپسىرىپ، رەسەيگە حابار جىبەردى. بۇل تۋرالى ستراسبۋرگتەگى سوتتىڭ ءباسپاسوز مالىمدەمەسىندە ايتىلعان.

قۇجاتتا بۇل ءىستى قوزعاۋعا ۋكراينانىڭ باسقا دا ءتورت شاعىمى، سونىمەن بىرگە سەگىز مىڭنان استام ادامنىڭ ءوتىنىشى سەبەپ بولعانى حابارلاندى.

شاعىمدا رەسەي فەدەراتسياسىنىڭ ۋكراينا اۋماعىنداعى اسكەري ارەكەتتەرى كەزىندە تىركەلگەن ادام قۇقىقتارىن جاپپاي ءارى ورەسكەل بۇزۋ دەرەكتەرى تۋرالى ايتىلعان. كيەۆ رەسەيلىك اسكەردى جانە رەسەي باقىلاۋىنداعى باسقا دا قارۋلى توپتاردى مىڭداعان بەيبىت تۇرعىندى ءولتىردى، جۇزدەگەن مىڭ نىساندى جويدى، ميلليونداعان ادامنىڭ بوسىپ كەتۋىنە سەبەپ بولدى دەپ ايىپتادى.

بيىل 16 ناۋرىزدا رەسەيدى ۋكراينا اۋماعىنا باسىپ كىرگەنى ءۇشىن ەۋروپا كەڭەسىنەن شىعارىپ تاستادى. 16 قىركۇيەكتەن باستاپ رەسەي ادام قۇقىقتارى جونىندەگى ەۋروپالىق كونۆەنتسياعا قاتىسۋشى مارتەبەسىنەن ايرىلادى.

11 ماۋسىمدا رەسەي پرەزيدەنتى ۆلاديمير پۋتين ادام قۇقىقتارى جونىندەگى ەۋروپالىق سوتتىڭ 15 ناۋرىزدان كەيىن شىعارعان شەشىمدەرىن ورىنداماۋ تۋرالى زاڭ جوباسىنا قول قويدى.

"اگورا" ادام قۇقىقتارىن قورعاۋ توبىنىڭ وكىلى كيريلل كوروتەەۆ پۋتين ماقۇلداعان زاڭ جوباسى ادام قۇقىقتارى مەن باستى ەركىندىكتەرىن قورعاۋ جونىندەگى ەۋروپالىق كونۆەنتسياعا قايشى كەلەدى. قۇجاتقا سايكەس، رەسەي ەۋروپالىق سوت شىعارعان تۇپكىلىكتى شەشىمدەردى مۇلتىكسىز ورىنداۋى ءتيىس.

Abai.kz