جىل باسىنان بەرى 7,4 مىڭنان استام ەتنيكالىق قازاق قانداس مارتەبەسىن الدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى حابارلاعان.

«بيىلعى ءبىرىنشى شىلدەدەگى ەسەپ بويىنشا 7 415 ەتنيكالىق قازاق تاريحي وتانىنا ورالىپ، قانداس مارتەبەسىن الدى»،- دەلىنگەن دەرەكتە.

قازاقستانعا ورالعان قانداستاردىڭ 70,2%-ى وزبەكستاننان، 10,4%-ى قىتايدان، 7,4%-ى تۇركىمەنستاننان، 3,2%-ى موڭعوليادان جانە 8,8%-ى باسقا ەلدەردەن كەلگەن. كەلگەندەردىڭ كوبىسى الماتى، ماڭعىستاۋ، تۇركىستان جانە جامبىل وبلىستارىندا، سونداي-اق الماتى، نۇر-سۇلتان جانە شىمكەنت قالالارىنا قونىستاندى.

1991 جىلدان باستاپ رەسپۋبليكاعا بارلىعى 1 ملن 95,3 مىڭ ەتنيكالىق قازاق ورالدى.

Abai.kz