وقۋشىلار ءۇشىن ەرەكشە ەستە قالاتىن ءساتتىڭ ءبىرى مەكتەپ ءبىتىرۋ كەشى. قۇشاق-قۇشاق گۇل شوقتارى، ەستەلىكتەر مەن مەكتەپتى قيماس ءتاتتى ساعىنىش سەزىمى، ۇستازدارعا العىس جانە ءبىلىم باسقارماسى تاراپىنان تابىستالاتىن ماراپاتتار. 

الماتى قالاسى ءبىلىم دەڭگەيى بويىنشا الدىڭعى قاتاردا تۇرعان قالا. مەكتەپ وقۋشىلارى جىل سايىن رەسپۋبليكالىق جانە حالىقارالىق وليمپيادادا كوش باستاپ، توپ جارىپ كەلەدى. التىن بەلگىگە بىتىرۋشىلەر سانى دا جەتەرلىك.

الماتىدا رەسپۋبليكا سارايىنىڭ الدىندا قالا باسشىسى ەربولات دوساەۆتىڭ قاتىسۋىمەن مەكتەپ تۇلەكتەرىن «التىن بەلگى» بەلگىسىمەن ماراپاتتاۋ ءراسىمى ءوتتى. ءىس-شاراعا سونداي-اق قازاق ۇلتتىق پەداگوگيكالىق ۋنيۆەرسيتەتى ديرەكتورلار كەڭەسىنىڭ ءتورايىمى گۇلميرا يسيمباەۆا، ەڭبەك ارداگەرلەرى، مەكتەپتىڭ ۇزدىك پەداگوگتارى جانە ت.ب. قاتىستى.

بيىل قالا مەكتەپتەرىن 12 مىڭنان استام تۇلەك ءبىتىرىپ، ونىڭ ىشىندە 605 وقۋشى «التىن بەلگى» يەگەرى اتاندى. الماتى اكىمى ەربولات دوساەۆ قالانىڭ ۇزدىك تۇلەكتەرىن قۇتتىقتاپ، ولارعا جوعارى وقۋ ورىندارىنا ءتۇسۋ كەزىندە تابىس تىلەدى.

«ۇلى اباي «اتاڭنىڭ بالاسى بولما، ادامنىڭ بالاسى بول» دەپ ايتقانداي جوعارى ءبىلىمدى، بىلىكتى مامان بولىپ، بولاشاقتا ەلىمىزدىڭ، قالامىزدىڭ وركەندەۋىنە لايىقتى ۇلەس قوسادى دەپ سەنەمىز. جولدارىڭ اشىق، كەلەشەكتەرىڭىز جارقىن بولسىن»، – دەدى الماتى قالاسىنىڭ اكىمى ەربولات دوساەۆ.

«بۇل ماراپاتتى الىپ، ەڭ جاقسىعا لايىق ەكەنىمدى الدىمەن وزىمە دالەلدەدىم. سول ءۇشىن مەكتەبىمىزدىڭ ۇستازدارىنا، اتا-اناما شەكسىز العىس. اسىرەسە سىنىپ جەتەكشىمنىڭ ەڭبەگى زور. ول كىسى مەنى كىشكەنتايىمنان قولداپ، ماعان سەنىپ كەلدى»، – دەدى «التىن بەلگى» يەگەرى ءامينا نۇرتازينا.

«كوپتەن كۇتكەن مەدالدى العانىما سونداي ريزامىن! ءاردايىم قولداپ وتىرعان اتا-اناما، اسىرەسە اكەمە راحمەت ايتامىن. مۇعالىمدەرگە مىڭ العىس»، – دەدى «التىن بەلگى» يەگەرى ەركىن شاحديار.

Abai.kz