رەسەي نوۆوروسسييكىدەگى كاسپي قۇبىر كونسورتسيۋمىنىڭ جۇمىسىن توقتاتقاننان كەيىن قازاقستان ءوز مۇنايىن ەكسپورتتاۋ باعىتتارىن ارتاراپتاندىرۋعا نيەتتى ەكەنىن جەتكىزدى. بۇگىنگى پرەزيدەنت توقاەۆتىڭ باسشىلىعىمەن وتكەن نۇر-سۇلتانداعى جيىندا وسى ماسەلە قارالدى.

«قاسىم-جومارت توقاەۆ مۇناي تاسىمالداۋ ءىسىن ءارتاراپتاندىرۋدى ماڭىزدى مىندەت رەتىندە اتاپ ءوتتى»، - دەپ جازادى اقوردا.

«ترانسكاسپي باعدارى باسىم باعىت سانالادى. «قازمۇنايگازعا» ونى جۇزەگە اسىرۋدىڭ وڭتايلى نۇسقاسىن، سونىڭ ىشىندە تەڭىز جوباسىنىڭ ينۆەستورلارىن تارتۋ مۇمكىندىگىن پىسىقتاۋدى تاپسىرامىن. ۇكىمەت «سامۇرىق-قازىنامەن» بىرلەسىپ، اتىراۋ – كەڭقياق جانە كەڭقياق – قۇمكول مۇناي قۇبىرلارىنىڭ قۋاتىن ارتتىرۋ جونىندە شارالار قابىلداۋى قاجەت، - دەدى پرەزيدەنت كولىك-ترانزيتتىك الەۋەتىن دامىتۋ جونىندەگى كەڭەستە.

رەسەيدى اينالىپ وتەتىن ترانسكاسپي باعىتى قىتاي، قازاقستان، كاسپي تەڭىزى اكۆاتورياسى، ءازىربايجان، گرۋزيا، تۇركيا ارقىلى وتەتىن باسىم باعىت بولىپ تابىلادى.

رەسەي وقتىن-وقتىن جۇمىسىن توقتاتىپ تاستاپ وتىرعان كاسپي كونسورتسيۋمى قازاقستان ءۇشىن مۇناي ەكسپورتتاۋدىڭ باستى مارشرۋتى سانالادى. ەلىمىزدىڭ مۇنايىنىڭ 80% وسى باعىت ارقىلى جونەلتىلەدى. بۇل قۇبىر جىلىنا  67 ملن توننا مۇناي جەتكىزۋگە قابىلەتتى. قۇبىر جۇمىسىنىڭ ءتىپتى ءبىر كۇندىك جۇمىسىنىڭ ءوزى قازاقستان ەكونوميكاسىنا وراسان سوققى دەگەن ءسوز.

پرەزيدەنت قازاقستاننىڭ تەڭىز ارقىلى تاسىمالداۋ مۇمكىندىگىن ءالى تولىق پايدالانباي وتىرعانىن ايتتى. ول ۇكىمەتكە «قازاقستان پورتتارىن ترانسفورماتسيالاپ، كاسپي تەڭىزىنىڭ جەتەكشى حابىنىڭ بىرىنە اينالدىرۋدى» تاپسىردى.

«تەڭىز فلوتىن نىعايتىپ، اقتاۋ پورتىندا كونتەينەرلىك حاب قۇرۋ قاجەت دەگەن ۇسىنىسپەن تولىق كەلىسەمىن»، – دەدى مەملەكەت باسشىسى.

قاسىم-جومارت توقاەۆ سونداي-اق «قازاقستان تەمىر جولى» ۇلتتىق كومپانياسىن تولىقتاي جاڭعىرتۋ قاجەت ەكەنىن ايتتى. پرەزيدەنتتىڭ پىكىرىنشە، وتاندىق ءونىمنىڭ ەكسپورتقا قاۋىپسىز ءارى ۇزدىكسىز شىعارىلۋىن قامتاماسىز ەتۋ ءۇشىن كەشەندى شارالار قابىلداۋ كەرەك. ونىڭ ىشىندە، دوستىق – مويىنتى، باقتى – اياگوز، ماقتاارال – داربازا جوبالارىن جۇزەگە اسىرۋ، الماتى قالاسىن اينالىپ وتەتىن تەمىرجول جەلىسىن سالۋ ماسەلەسىن قولعا الۋ كەرەك.

سونىمەن بىرگە، پرەزيدەنت ۇكىمەتكە اقتوبە – قاندىاعاش – ماقات، اتىراۋ – استراحان، الماتى – قاراعاندى جانە تالدىقورعان – وسكەمەن اۆتوماگيسترالدى باعىتتارىنداعى قايتا جاڭارتۋ جۇمىستارىن ۋاقىتىلى ءارى ساپالى اياقتاۋدى تاپسىردى.

Abai.kz