ۇلتتىق بانك بازالىق مولشەرلەمەنى جىلدىق 17%-عا دەيىن تومەندەتۋ تۋرالى شەشىم قابىلدادى. بۇل تۋرالى ۇلتتىق بانكتىڭ اقشا-كرەديت ساياساتى كوميتەتى مالىمدەدى.

جاڭا شەشىم بويىنشا بازالىق مولشەرلەمە +/- 1 پايىزدىق تارماق دالىزىمەن بەلگىلەندى. رەتتەۋشى بۇل قادامدى ينفلياتسيانىڭ باياۋلاۋى، نەگىزگى ماكروەكونوميكالىق كورسەتكىشتەردىڭ جاقسارۋى جانە ينفلياتسيالىق تاۋەكەلدەردىڭ تومەندەۋىمەن بايلانىستىردى.

ۇلتتىق بانك دەرەگىنشە، جىلدىق ينفلياتسيا تومەندەۋ ءۇردىسىن جالعاستىرىپ كەلەدى. ەگەر وتكەن جىلدىڭ قىركۇيەگىندە ينفلياتسيا 12,9%-عا جەتسە، بيىل مامىر ايىنىڭ قورىتىندىسى بويىنشا 10,4%-عا دەيىن باياۋلاعان.

ازىق-تۇلىك باعاسىنىڭ ءوسۋ قارقىنى دا تومەندەگەن. مامىردا ازىق-تۇلىك ينفلياتسياسى 10,7%-دى قۇرادى. بۇعان جەمىس-جيدەك، كوكونىس، الەۋمەتتىك ماڭىزى بار ازىق-تۇلىك تاۋارلارى مەن كەيبىر يمپورتتىق ونىمدەر باعاسىنىڭ باياۋ ءوسۋى اسەر ەتكەن.

ال ازىق-تۇلىككە جاتپايتىن تاۋارلار ينفلياتسياسى 11,7% دەڭگەيىندە ساقتالدى. ۇلتتىق بانك مۇنى تەڭگەنىڭ نىعايۋى مەن تۇتىنۋشىلىق نەسيەلەۋدىڭ باسەڭدەۋىنە بايلانىستى سۇرانىستىڭ تۇراقتانۋىمەن ءتۇسىندىردى.

كورسەتىلەتىن قىزمەتتەردىڭ باعاسى دا باياۋلاي ءتۇستى. مامىر قورىتىندىسى بويىنشا قىزمەت كورسەتۋ ينفلياتسياسى 8,7%-دى قۇرادى. بۇعان تۇرعىن ءۇي-كوممۋنالدىق قىزمەت تاريفتەرىنىڭ ءوسۋ قارقىنىنىڭ باسەڭدەۋى مەن ىشكى سۇرانىستىڭ تۇراقتانۋى ىقپال ەتكەن.

سونىمەن قاتار ايلىق ينفلياتسيا ساۋىردەگى 0,8%-دان مامىردا 0,7%-عا دەيىن تومەندەدى.

ۇلتتىق بانكتىڭ باعالاۋىنشا، حالىقتىڭ ينفلياتسيالىق كۇتۋلەرى دە بىرتىندەپ تومەندەپ كەلەدى. مامىر ايىندا بۇل كورسەتكىش 12,7% بولعان. ال كاسىبي نارىق قاتىسۋشىلارى 2026 جىلدىڭ سوڭىندا ينفلياتسيا 10% دەڭگەيىندە بولادى دەپ بولجاپ وتىر.

رەتتەۋشى مۇناي نارىعىنداعى بولجامدارىن دا جاڭارتتى. جاڭا بازالىق ستسەناريگە سايكەس، Brent ماركالى مۇنايدىڭ ورتاشا باعاسى بيىل باررەلىنە 90 دوللار دەڭگەيىندە قالىپتاسادى دەپ كۇتىلەدى. بۇعان تاياۋ شىعىستاعى گەوساياسي جاعداي اسەر ەتىپ وتىر.

سونداي-اق ۇلتتىق بانك 2026 جىلعا ارنالعان ينفلياتسيا بولجامىن 9-11% ارالىعىنا دەيىن جاقسارتتى. بۇعان باعانىڭ كۇتىلگەننەن جىلدام باياۋلاۋى، ققس ءوسىمىنىڭ شەكتەۋلى اسەرى جانە ۇلتتىق ۆاليۋتانىڭ نىعايۋى سەبەپ بولعان.

رەتتەۋشىنىڭ بولجامىنشا، 2027 جىلى ينفلياتسيا 5,5-7,5%-عا دەيىن تومەندەپ، 2028 جىلى 5%-دىق ماقساتتى دەڭگەيگە جەتەدى.

ەكونوميكالىق ءوسىم بويىنشا دا بولجام جاقساردى. ۇلتتىق بانك 2026 جىلى قازاقستان ەكونوميكاسى 4,5-5,5% ارالىعىندا وسەدى دەپ كۇتەدى. بۇعان مۇناي باعاسىنىڭ جوعارى بولۋى مەن ەكونوميكالىق بەلسەندىلىكتىڭ ارتۋى نەگىز بولىپ وتىر.

ۇلتتىق بانك ينفلياتسيانىڭ تومەندەۋى مەن بولجامداردىڭ جاقسارۋى بازالىق مولشەرلەمەنى ازايتۋعا مۇمكىندىك بەرگەنىن اتاپ ءوتتى. الايدا اقشا-كرەديت ساياساتى ءالى دە ۇستامدى قاتاڭ دەڭگەيدە ساقتالادى.

Abai.kz