بۇل تۋرالى وزبەكستان سىرتقى ىستەر مينيسترلىگى 26 شىلدەدە حابارلادى.
مينيسترلىك مالىمدەمەسىندە ءتالىپ ءمينيسترىنىڭ ناقتى ايتقان ءسوزى بەرىلمەگەن. مۋتتاكي تاشكەنتكە "اۋعانستان: قاۋىپسىزدىك جانە ەكونوميكالىق دامۋ" حالىقارالىق كونفەرەنتسياسىنا قاتىسۋ ءۇشىن كەلدى.
كەزدەسۋ بارىسىندا مۋتاككي اۋعانستان جونىندەگى حالىقارالىق كونفەرەنتسيانىڭ تاشكەنتتكە ءوتىپ جاتقانىن قۇپتاعان. بۇعان قوسا، وزبەك-اۋعان قارىم-قاتىناسىن نىعايتۋ مەن دامىتۋ ماسەلەلەرى ءسوز بولعان.
اۋعان دەلەگاتسياسىنىڭ باسشىسى وزبەك ۇكىمەتىنە اۋعانستانعا گۋمانيتارلىق كومەك بەرگەنىنە، سونىمەن بىرگە ەنەرگەتيكا مەن ينفراقۇرىلىم جوبالارىن جۇزەگە اسىراتىنىنا راقمەت ايتقان.
ۆلاديمير نوروۆ اۋعان جاعىن حالىقارالىق قاۋىمداستىق تالاپتارىن، سونىڭ ىشىندە ءتۇرلى توپ وكىلدەرىنەن تۇراتىن ۇكىمەت جاساقتاۋ، ايەلدەر مەن از ۇلتتار قۇقىقتارىن ساقتاۋ، قىزدارعا مەكتەپتە ءبىلىم الۋعا رۇقسات بەرۋ كەڭەستەرىن ورىنداۋعا شاقىردى.
وزبەكستان - 2021 جىلعى 15 تامىزدا كابۋلدى باسىپ العان تالىپتەر ۇكىمەتىمەن بايلانىس ورناتقان ساناۋلى ەلدەردىڭ ءبىرى. تاليبان ۇكىمەتىن حالىقارالىق قاۋىمداستىق ءالى كۇنگە دەيىن مويىنداعان جوق.
Abai.kz
