بۇرىن رەسەيدىڭ اقپاراتتىق قۇرساۋىندا ەدىك، ەندى بۇگىن ونىڭ ەكونوميكالىق باسىبايلى بۇزاۋىنا اينالا باستادىق. ولاي دەيتىنىمىز، بۇرىنعى پرەزيدەنتتىڭ وتباسى زاڭسىز جەكەمەنشىككە شىعارىپ، يەلىك ەتكەن ءتۇرلى ستراتەگيالىق ماڭىزى بار كومپانيالار رەسەي الپاۋىتتارىنىڭ مەنشىگىنە رەت-رەتىمەن ءوتىپ جاتىر.

ولاردىڭ ىشىندە «قامقور لوكوموتيۆ» پەن «قامقور ۆاگون» ءىرى ءوندىرىس ورىندارى بار. قوعام بەلسەندىسى ارمان شوراەۆ بۇل كومپانيالاردىڭ رەسەي ميللياردەرى الەكساندر لەبەدەۆتىڭ «ترانسماش حولدينگىنە» ساتىلعانىن «ساتقىندىق» دەپ باعالادى.

ال، وتاندىق ونلاين باسىلىم sknews.kz بولسا «10 جىلدام استام رەسەي تەمىرجولىن باسقارعان الەكساندر لەبەدەۆ ەلىمىزگە ينۆەستيتسيا اكەلىپ، قۇلىباەۆ اقساتقان سالانىڭ باعىن جاندىرادى»، دەيدى.

جىلىنا 34,7 ملرد تەڭگە تابىس ءتۇسىرىپ، 5147 ادامدى جۇمىسپەن قامتىپ وتىرعان «قامقور لوكوموتيۆ» ساتىلاتىنداي باسىمىزعا نە كۇن تۋدى؟

ەندى ەكس-پرەزيدەنتتىڭ وتباسىلىق مونوپولياسىن رەسەيدىڭ ءپۋتينشىل كاسىپكەرلەرى باسقارماق پا؟

جەتى بولىمشەسىندە 1600 ادام قىزمەت ەتىپ، ونىڭ ىشىندە اياگوز، قازالى مەن شالقار سىندى قازاق ءتىلدى قالالاردا 570 كاسىبي ماماندار ىستەيتىن كاسىپورىن رەسەيدىڭ قولىنا ءبىرجولا ءوتتى.

بۇل قالالاردا قاسقارتۋ ءجۇرىپ، قىزمەتتىڭ ءبارى ورىستاردىڭ قولىنا وتپەسىنە كىم كەپىل؟

سوندىقتان قازاق بالاسىن «لوكوموتيۆ پەن ۆاگونسىز» قالدىرعالى وتىرعان وزەكتى ماسەلە بىرجاقتى شەشىمىن تابۋى كەرەك. ستراتەگيالىق ماڭىزى بار وبەكتىلەر مەملەكەتتىڭ مەنشىگىندە بولۋى ءتيىس.

Abai.kz