بۇرىنعى الماتى، قازىرگى جەتىسۋ وبلىسىنا قارايتىن پانفيلوۆ اۋدانىندا ورنالاسقان شولاقاي دەگەن اۋىل بار. اۋىلدىق وكرۋگ. تۇرعىلىقتى جۇرتتىڭ سانى رەسمي دەرەكتەردە 5 مىڭعا جۋىقتايدى دەيدى. شولاقاي اۋىلى – قازاق پەن ۇيعىر ارالاس قونىستانعان اۋىل. الماتى-قورعاس باعىتىن جالعاپ جاتقان اۆتوماگيسترالدىڭ بويىندا، جاركەنتكە كىرەبەرىس جولدا ورنالاسقان.

كەشەلى-بەرى الەۋمەتتىك جەلىلەر مەن باق-تا شولاقايدا بولعان جانتۇرشىگەرلىك وقيعانىڭ شەتى شىعىپ، جەلىدە ءتۇرلى ۆيدەولار مەن اقپاراتتار تاراپ جاتىر.

وسىدان 8-9 كۇن بۇرىن جاركەنتتەگى شولاقاي اۋىلىندا 15 جاسار قىز بالا ءىز-ءتۇسسىز جوعالىپ كەتتى دەگەن اقپارات تارادى. جوعالعان قىزدىڭ اتا-اناسى، تۋعان-تۋىستارى، اۋىلداستارى پانفيلوۆ اۋدانىندا ورنالاسقان بارلىق اۋىلدى جاياۋ ارالاپ، ءاربىر ءۇيدىڭ ەسىگىن قاعىپ شىققان. جوعالعان قىزدى تاپپاعان. قازىرگى كۇنى ادام ۇرلىعىنا قاتىستى فاكتىلەر ءالسىن-ءالسىن اقپارات قۇرالدارىندا ايتىلىپ، جازىلىپ جۇرگەنى جانە بەلگىلى. شولاقاي توعىز جولدىڭ تورابىندا ورنالاسقاندىقتان، ءتۇرلى بولجامدار ايتىلعان. قىزدى قۇلدىققا ۇرلاپ كەتۋى مۇمكىن ەكەندىگى نەمەسە ساۋداعا سالۋ ءۇشىن ۇرلاپ كەتۋى مۇمكىن ەكەندىگى دەگەن بىرنەشە نۇسقا قاراستىرىلعان. ال ارادا اپتادان اسا ۋاقىت وتكەندە جوعالعان قىزدىڭ ءولى دەنەسى سول اۋىلدىڭ ماڭايىنان تابىلعان.

ءبىرىنشى دەرەك:

قىزدىڭ تولىق اتى-ءجونى: قيسابەكوۆا قۇرالاي ەربولقىزى. 2007 جىلى 25 مامىردا دۇنيەگە كەلگەن. بيىل اتالعان اۋىل مەكتەبىندە 9 سىنىپتى تامامداعان. تولىق جاسى – 15-تە.

تۋىستارىنىڭ ايتۋىنشا، 21 شىلدەدە ۇيىنەن كەتىپ ورالماعان. ءمايىت اراعا اپتا سالىپ، 28 شىلدەدە تابىلدى.

ەكىنشى دەرەك:

قىزدى سول اۋىلدىڭ ءبىر ازاماتى بىرنەشە كۇن بويى (بەيرەسمي اقپاراتتا 3 كۇن دەلىنەدى) قاماپ ۇستاپ، زورلىق-زومبىلىق جاساعان. ارتىنان اۋىلدىڭ شەتىندەگى القاپقا اپارىپ، ولىگىن ورتەپ، جەرگە كومىپ تاستاعان.

ءۇشىنشى دەرەك:

كۇدىكتى رەتىندە سول اۋىلدىڭ تۇرعىنى ۇستالعان. اتى-ءجونى: رۋستام احمەتوۆ. 1984 جىلى تۋعان. تولىق جاسى – 38-دە.

باق-تاعى دەرەكتەرگە كوز جۇگىرتسەك، كۇدىكتى بۇعان دەيىن دە قىز زورلاۋ فاكتىسى بويىنشا سوتتالىپ شىققان. 5-6 جىل بۇرىن كامەلەتكە تولماعان قىزدى زورلاپ، ءىستى بولعان. تۇرمەدە ءتارتىپتى بولعانى ءۇشىن، جازاسىن تولىق وتەمەگەن. كەيىن جانە ءبىر مارتە قىز زورلاپ ءىستى بولعان. ەكىنشى جولى جازادان قۇتىلىپ كەتۋ ءۇشىن، ءوزى زورلاعان قىزعا ۇيلەنگەن.

قازا تاپقان قىزدىڭ اپكەسى كامشات كوپباەۆا: «ءبىز سوڭعى ساتتەرگە دەيىن قىزدىڭ ءتىرى ەكەنىنە سەندىك. ءبىز قىزىمىزدى جان ۇشىرىپ ىزدەپ جۇرگەن كەزدە، مىنا ايۋان تۇك بولماعانداي، جارتكەنتتە تاكسي بولىپ جۇرگەن»، - دەپتى.

اتالعان اقپارات قازىر الەۋمەتتىك جەلىلەر ارقىلى كۇللى قازاقستان جۇرتىنا تارادى. جەرگىلىكتى ازاماتتاردان جەتكەن اقپاراتتارعا ارقا سۇيەر بولساق، قازىر شولاقاي اۋىلىنا كۇشتىك قۇرىلىمدار اپارىلعان. اۋىلدى اينىلدىرا قورشاۋعا العان. وقيعا ۇلتارالىق سيپات الىپ بارا جاتقاندىقتان، اۋىلدا ينتەرنەت بايلانىسى وشىرىلگەن.

تەرىستەلگەن نۇسقا:

وسىعان دەيىن الەۋمەتتىك جەلىلەردە قىزدى 4 ەركەك جابىلىپ زورلاعان دەگەن دەرەك شىقان. الايدا جەرگىلىكتى پوليتسيا دەپارتامەنتى بۇل اقپاراتتى تەرىستەگەن.

«اۋىلدا قاۋىپسىزدىك شاراسى كۇشەيتىلگەن. ءجاسوسپىرىمدى ءتورت جىگىت جابىلىپ زورلاعان دەگەن اقپارات جالعان. قىلمىستى ءبىر ادام جاساعان. ءبىز حالىقپەن ءتۇسىندىرۋ جۇمىستارىن جۇرگىزىپ جاتىرمىز»،- دەدى جەتىسۋ وبلىسى اكىمىنىڭ ءباسپاسوز حاتشىسى دۋمان التىنبەكوۆ.

بەسىنشى دەرەك:

قازىر مارقۇمنىڭ دەنەسىنە سوت-مەديتسينالىق ساراپتاما جاسالعان. كۇدىكتى رەتىندە ۇستالعان جەرگىلىكتى تۇرعىن كامەلەتكە تولماعان قىزبەن جىنىستىق قاتىناسقا تۇسكەنىن جانە قىلمىسىن جاسىرۋ ءۇشىن ونى ءولتىرىپ، دەنەسىن اۋىل شەتىنە كومگەنىن مويىنداعان.

قازىر قر قىلمىستىق كودەكسىنىڭ 99-شى بابى جانە 120-نشى بابابى بويىنشا قىلمىستىق ءىس تىركەلگەن. ول 17 جىلعا دەيىن باس بوستاندىعىنان ايىرىلۋى مۇمكىن.

نۇرگەلدى ابدىعانيۇلى

Abai.kz