حارۋكي مۋراكاميدىڭ شىعارمالارىن وقىعاندا كوز الدىڭا ەلەستەيتىن كەيىپكەرلەر، ولاردىڭ ىشكى سەزىمدەرى مەن وقيعا ورىن الاتىن پەيزاجدار ەرەكشە اسەرگە بولەيدى.

قانشا تىرىسساڭ دا، مۋراكامي الەمىن اشىق، جارقىن تۇستەرمەن ەلەستەتۋ مۇمكىن ەمەس. ونىڭ الەمىندە ۇنەمى سالقىندىق، وزگەشە مۇڭ مەن بەلگىسىز ءبىر سۋىقتىق تابى ەسىپ تۇرادى. سوندىقتان دا ونىڭ اڭگىمەلەرىنىڭ مانگا فورماتىنداعى اداپتاتسياسى شىققانىن ەستىگەندە، بۇل سۋرەتشىلەر ءۇشىن وتە كۇردەلى ءارى جاۋاپتى تاپسىرما بولعان بولار دەگەن وي كەلدى. مۇڭعا، جۇمباققا، پسيحولوگيالىق يىرىمدەر مەن جاۋاپسىز سۇراقتارعا تولى مۋراكاميدىڭ قارا سوزدەرىن ءتۇرلى-ءتۇستى سۋرەتتەرگە اينالدىرۋ وڭاي شارۋا ەمەس.

بۇل اڭگىمەنى بۇرىن مەن «تۋعان كۇن يەسى» اتتى توپتامادان وقىعان ەدىم. ول – مۋراكاميدىڭ ەڭ ۇمىتىلماس شىعارمالارىنىڭ ءبىرى. ونىڭ قۇندىلىعى – تۋعان كۇن يەسىنىڭ تىلەگى توڭىرەگىندەگى جۇمباق پەن قۇپيادا. وقىرمان اڭگىمە بويى: «ول نە تىلەدى؟ بۇل تىلەك ونىڭ ءومىرىن وزگەرتتى مە؟» – دەگەن سۇراققا جاۋاپ ىزدەيدى.

سۋرەتشىلەر وسى قۇپيالىق پەن توسىن سەزىمدى ۆيزۋالدى فورماتتا ساقتاي الدى ما؟ ءسوزسىز، ساقتاپ قالعان. كەيىپكەرلەر مەن اينالاداعى ورتاعا ناقتى ۆيزۋالدى بەينە بەرىلسە دە، مۋراكاميگە ءتان سول بۇلىڭعىرلىق پەن جۇمباق اتموسفەرا جوعالماعان. مانگا اۆتوردىڭ وقىرمان قيالىنا قالدىراتىن ىشكى كەڭىستىگىن تولىقتاي تارتىپ المايدى.

جيناقتاعى قالعان ءۇش اڭگىمە مەن ءۇشىن جاڭالىق بولدى. ولاردىڭ سيۋجەتى پسيحولوگيالىق اسپەكتىلەرىمەن، سونداي-اق جاپونيا قوعامى مەن مادەنيەتىنىڭ قىر-سىرىن كورسەتۋىمەن قىزىقتىردى. دەسە دە، بۇل اداپتاتسيالاردان مۋراكامي پروزاسىنا ءتان تەرەڭدىك پەن كوپقاباتتىلىقتى تولىق سەزىنە المادىم. ولار تۇپنۇسقا پروزا تۇرىندە الدەقايدا قۋاتتى ءارى اسەرلى بولار ەدى دەگەن وي باسىم بولدى.

دەسەك تە، مانگادا جاپونيا تاريحىنىڭ ءارتۇرلى كەزەڭدەرىنىڭ ۆيزۋالدى تۇردە شەبەر اجىراتىلعانىن اتاپ وتكەن ءجون: كەزەڭدەر كونتراستى: سوعىس كەزىندەگى جاپونيا مەن قازىرگى زامانعى جاپونيانىڭ ايىرماشىلىعى يلليۋستراتسيالاردا ايقىن بايقالادى.

مۋراكاميدى وقىعاندا، سول بۇلىڭعىر، سۇرعىلت، جالعىزدىققا تولى الەمدى وقىرمان ءوزى جاسايدى. ال مانگا ول الەمگە ناقتى ءپىشىن مەن ايقىن ءتۇس بەرەدى. مۇنداي قادام كەيبىر نارسەلەردى ايقىنداعانىمەن، پروزانىڭ باستى تارتىمدىلىعى – بەلگىسىزدىك شەگىن ازداپ تارىلتاتىنى جاسىرىن ەمەس. مۋراكامي الەمىنىڭ پسيحولوگيالىق تەرەڭدىگى مەن جۇمباعى ءوز ىرعاعىمەن باپپەن اشىلعانعا نە جەتسىن!

دۇيسەنالى الىماقىن

Abai.kz