حيميا سالاسى بويىنشا قازاقستان العا شىعۋدى كوزدەپ وتىرعان ەلدىڭ ءبىرى. حيميا سالاسىن دامىتۋعا قاجەتتى رەسۋرستار جەتكىلىكتى، ەندى ادامي كاپيتالدى سول ماقساتقا باعىتتاۋ ماڭىزدى. مۇناي جانە گاز سالاسىنىڭ دامۋى حيميا سالاسىنىڭ دامۋىنا سەرپىن بەرەدى. حيميا بويىنشا قازاقستان وقۋشىلارى دا ءتۇرلى دودالاردا وق بويى وزىق كەلەدى. 

ۇلتتىق قۇراما حيميادان حالىقارالىق وليمپيادادا (IChO-2022) 1 التىن جانە 3 كۇمىس مەدال جەڭىپ الدى. بيىل بۇل جارىس تيانتسزين قالاسىندا (قىتاي) ءوتتى.

وقۋ-اعارتۋ ءمينيسترى اسحات ايماعامبەتوۆتىڭ حابارلاۋىنشا، ەلىمىزدىڭ اتىنان نۇر-سۇلتان، قاراعاندى، پاۆلودار جانە اقتاۋ قالالارىنان 4 وقۋشى قاتىسقان. ولار الەمنىڭ 83 ەلىنەن كەلگەن 322 وقۋشىمەن باق سىناسىپ، تورتەۋى دە بەدەلدى وليمپيادانىڭ جەڭىمپازى اتانعان.

«ۇلتتىق قۇراماعا 2017 جىلدان بەرگى العاشقى التىندى ماديار قاسىمالى اكەلسە، سانجار بيسەنالى، سانجار نۇرعاليەۆ جانە الميرا نۇرلانوۆا كۇمىس جۇلدەنى ەنشىلەدى. بىلتىر قورجىنىمىزعا ءۇش كۇمىس، ءبىر قولا مەدال تۇسكەن بولاتىن.

وقۋشىلارىمىزدى جوعارى ناتيجەلەرمەن جانە لايىقتى جەڭىستەرىمەن قۇتتىقتايمىن! بالالارىمىزدىڭ ماتەماتيكا، فيزيكا، حيميا پاندەرىنەن حالىقارالىق وليمپيادالارداعى جەتىستىكتەرى جاراتىلىستانۋ پاندەرىندەگى جاقسى جەتىستىكتەردىڭ كورسەتكىشى. كوماندانىڭ تاباندىلىعى، ءبىلىمى، ەڭبەگى جانە جەڭىسكە دەگەن جىگەرى بارلىق وقۋشىعا ۇلگى بولارى ءسوزسىز. وقۋشىلارىمىزعا بەرگەن بىلىمدەرى مەن دايىندىقتارى ءۇشىن ارىپتەستەرىمە العىس ايتقىم كەلەدى»، - دەپ جازدى مينيستر الەۋمەتتىك جەلىدەگى پاراقشاسىندا.

اسحات ايماعامبەتوۆ بيىل وسىنداي وليمپيادالاردىڭ جەڭىمپازدارى العاش رەت قولداۋ شارالارىنا يە بولاتىنىن ايتتى.

«ولار قوماقتى اقشالاي سىياقى الۋعا جانە وتاندىق جوو-لارعا ۇبت تاپسىرماي-اق تۇسۋگە مۇمكىندىك الىپ وتىر. وقۋشىلاردى جارىسقا دايىنداعان ۇستازدار دا تولەماقى الادى»، - دەدى مينيستر.

Abai.kz