اۋعانستان ۇكىمەتىن باسقارىپ وتىرعان "تاليبان" تەرروريستىك ۇيىمى رەسەيدەن ءبىر ميلليون باررەل مۇناي ساتىپ العىسى كەلەدى. بۇل تۋرالى تالىپتەر ۇكىمەتىنىڭ ساۋدا جانە ءوندىرىس ءمينيسترى نۋريددين ازيزي ريا نوۆوستي اگەنتتىگىنە بەرگەن سۇقباتىندا ايتقان.

ازيزي "تاليبان" مۇنايدى قانداي دا ءبىر اۋعان ونىمدەرىمەن الماستىرۋدى قاراستىرىپ جاتقانىن ايتادى.

ماۋسىم ايىندا پەتەربۋرگتە وتكەن حالىقارالىق ەكونوميكالىق فورۋمدا اۋعانستاننىڭ ساۋدا-ءوندىرىس پالاتاسىنىڭ توراعاسى رەسەيدەن بەس مىڭ توننا مۇناي مەن ەكى ميلليون توننا بيداي ساتىپ العىسى كەلەتىنىن جەتكىزگەن ەدى.

ال، بىلتىر قازان ايىندا رەسەي پرەزيدەنتى ۆلاديمير پۋتين "تاليبان" قوزعالىسىن تەرروريستىك ۇيىمدار تىزىمىنەن الىپ تاستاۋ باعىتىندا جۇمىس ىستەيتىنىن جاريالادى. مەملەكەتتىك باق-تارعا "تاليبان" قوزعالىسىن تەرروريستىك ۇيىم دەپ جازۋدى الىپ تاستاۋ تالاپ ەتىلدى.

Abai.kz