رەسەي پرەزيدەنتى ۆلاديمير پۋتين ەلدىڭ تۇتاستىعىن قورعاۋ ءۇشىن قولىنداعى بارلىق مۇمكىندىكتى پايدالانۋعا دايىن ەكەنىن مالىمدەدى.

رەسەي باسشىسى ۆاشينگتون، لوندون جانە بريۋسسەل كيەۆتى رەسەيگە قارسى اسكەري وپەراتسيا ۇيىمداستىرۋعا يتەرمەلەپ جاتقانىن ايتتى.

"وسىنداي مالىمدەمەلەرگە جول بەرەتىندەرگە، ءبىزدىڭ ەلدە دە ءتۇرلى قىرىپ-جويۋ قۇرالدارى بار ەكەنىن ەسكە سالعىم كەلەدى. ال جەكە قۇرامداس بولىكتەرىنە كەلەتىن بولساق بىزدەگىلەر ناتو ەلدەرىنە قاراعاندا زاماناۋي. ءبىز حالقىمىزدى قورعاۋ ءۇشىن قولىمىزداعى بارلىق قۇرالداردى پايدالانامىز. بۇل بلەف ەمەس. رەسەي ازاماتتارى وتانىمىزدىڭ اۋماقتىق تۇتاستىعىنا، تاۋەلسىزدىگىمىز بەن بوستاندىعىمىزعا سەنىمدى بولۋى كەرەك.

تاعى اتاپ وتەمىن: قولىمىزداعى بارلىق قۇرالدارمەن. ال ءبىزدى يادرولىق قارۋمەن بوپسالاۋعا تىرىساتىندار جەلدىڭ دە ءوز باعىتىنا بۇرىلۋى مۇمكىن ەكەنىن ءبىلۋى كەرەك", - دەدى رەسەي پرەزيدەنتى حالىققا جولداۋىندا.

Abai.kz