كرەمل بيلىگى ەلدە ءىشىنارا موبيليزاتسيا جاريالاعالى-بەرى رەسەي حالقى دۇرلىگە باستادى. ماسكەۋ، پەتەربور باستاعان ءىرىلى-ۇستاقتى قالالار مەن رەسپۋبليكالاردا جاپپاي نارازىلىقتار ءوتىپ جاتىر. موبيليزاتسيا جاريالانعالى رەسەيدەن وزگە مەملەكەتتەرگە كەتىپ جاتقان ادامداردىڭ سانى ەسەلەپ ارتتى. رەسمي: 21-25 قىركۇيەك ارالىعىندا رەسەيدەن 250 مىڭنان استام ەر ازامات شەكارا اتتاپ، شەتكە كەتكەن ەكەن. سولاردىڭ ىشىندە قازاقستانعا قاراي اعىلعان كوشتىڭ دە قاراسى قالىڭ. ءبىز بۇل تۋرالى جازدىق.

جۋىردا رەسەي سۋبەكتىلەرىنىڭ ءبىرى سانالاتىن – باشقۇرتستاننىڭ قوعامدىق بەلسەندىلەرى مەن باشقۇرت ۇلتتىق-ساياسي ورتالىعىنىڭ باسشىلارى قازاقستانعا، قازاق حالقىنا قايرىلۋ جاساپ، ۇندەۋ جاريالاپتى.

باشقۇرت بەلسەندىلەرى رف پرەزيدەنتى ۆلاديمير ءپۋتيننىڭ ۋكرايناعا قارسى اگرەسسياسى مەن رەسەيدەگى ەتنيكالىق از ۇلتتارعا قاتىستى ساياساتىن قاتاڭ ايىپتايتىنىن ايتىپ، «پۋتيندىك سوعىستان» باس ساۋعالاپ قاشقان باشقۇرت ازاماتتارىنا پانا بەرۋدى سۇراپتى. ءبىز اتالعان ۇندەۋدى Abai.kz پورتالىندا جاريالاعاندى ءجون سانادىق.

باشقۇرت ۇلتتىق-ساياسي ورتالىعىنىڭ قازاقستان رەسپۋبليكاسىنا ۇندەۋى

قۇرمەتتى باۋىرلار!

ءبىر-بىرىنە كورشىلەس ورنالاسقان ءبىزدىڭ باۋىرلاس حالقىمىز عاسىرلار بويى قيىن-قىستاۋ كەزەڭدەردە ءبىر-بىرىنە كومەك قولىن سوزىپ كەلەدى. قازاق حالقى ءبىزدىڭ باشقۇرتتىڭ باس كوتەرگەن ازاماتتارى مەن ولاردىڭ وتباسىلارىنا پانا بولىپ، جاندارىن قالاي ساقتاپ قالعانىن ءبىز تاريحتان جاقسى بىلەمىز.

سول سەكىلدى قازاق حاندىعىنىڭ جەرىنە جوڭعارلار شاپقىنشىلىق جاساعان كەزەڭدەردە ءبىزدىڭ باشقۇرتتار دا ءوز اسكەرىمەن كومەككە كەلگەن.

الاش وردانىڭ باسشىلارى مەن باشقۇرتستاننىڭ ۇكىمەتى كۇش بىرىكتىرىپ، قىزىل تەررورعا قارسى بىرلەسىپ كۇرەسكەنىن، ءوز اۆتونوميالارىن الۋعا ۇمتىلعانىن ءبىز تاريحتان بىلەمىز. ءوز ۋاعىندا بىزدەگى كوتەرىلىس باسشىسى بولعان كينيا اراسلانوۆ پەن قاراحاكال حان ءدال ءسىزدىڭ جەردەن پانا تاپقان ەدى.

تاۋەلسىز قازاقستانداعى باۋىرلار، اپكەلەر!

ءبىزدىڭ جەرىمىزگە تاعى دا پالە كەلدى. رەسەيلىك يمپەرلىك شوۆينيزم ءدال قازىر ءبىزدىڭ ونداعان مىڭ بالامىزدى تاۋەلسىز ۋكرايناعا قارسى سوعىسقا ايداپ سالۋدا. بۇل يمپەريا عاسىرلار بويى ءبىزدىڭ حالقىمىزدى جويىپ كەلەدى. ءتىلىمىزدى، تاريحىمىز بەن ءداستۇرىمىزدى جويدى. ەندى قازىر ءبىزدىڭ ەر ازاماتتارىمىزدىڭ قولىمەن ەركىن ۋكراينا جەرىندە «ورىس الەمىن» ورناتپاقشى.

ءبىزدىڭ ەر ازاماتتارىمىز بۇل سوعىسقا بارعىلارى كەلمەيدى. ءبىز كرەملدىڭ يمپەرلىك، شوۆينيستىك ساياساتى ءۇشىن سوعىسقىمىز كەلمەيدى. سول سەبەپتى دە، ءماجبۇرلى موبيليزاتسيادان باس ساۋعالاپ، تۋعان توپىراعىمىزدى تاستاپ كەتۋگە ءماجبۇرمىز.

قازاقستان – باشقۇرتستان مەن تاتارستانعا جانە ورال-ۆولگا ايماعىنداعى وزگە رەسپۋبليكالارعا ەڭ جاقىن ورنالاسقان تاۋەلسىز مەملەكەت. سول سەبەپتى دە، بىزدەن باس ساۋعالاپ قاشقانداردىڭ دەنى سىزدەردىڭ مەملەكەتكە قاراي اعىلۋدا.

باشقۇرت ۇلتتىق-ساياسي ورتالىعى قازاق حالقىنا، قوعامدىق ۇيىمدار مەن قايىرىمدىلىق قورلارعا، جەكەلەگەن بەلسەندىلەرگە ءۇن قاتىپ، كومەك سۇرايمىز. ۋكراينا حالقىنا قارسى سوعىسقا بارۋدان باس تارتىپ، باس ساۋعالاپ، سىزدەرگە بارعان ءبىزدىڭ ازاماتتارىمىزعا كومەك قولدارىڭىزدى ۇسىنۋلارىڭىزدى سۇرايمىز. ولاردىڭ كوبى قولدارىنا قۇجاتتارىن عانا الىپ شىققاندار. ءارى قاراي ءومىر سۇرۋگە قوسىمشا قاراجاتى جوق ازاماتتار. ءبىزدىڭ ازاماتتارىمىزعا ۋاقىتشا تۇرعىنجاي، تۇرمىسقا قاجەتتى كەرەك-جاراق، ءدارى-دارمەك بەرۋدىڭ مۇمكىندىگىن قاراستىرۋلارىڭىزدى سۇرايمىز.

ءبىز ءپۋتيننىڭ يمپەرلىك ساياسي ماشيناسى ۋكراينا حالقىنىڭ تەمىردەي تەگەۋرىنىنەن جەسكەسى ءۇزىلىپ، ءبىزدىڭ ەلىمىز دە ءوز ەگەمەندىگىن الاتىن كۇن تۋاتىنىنا بەك سەنەمىز! سىزدەردىڭ بۇل كومەكتەرىڭىز مىڭداعان ەر ازاماتتىڭ ءومىرىن ساقتاپ قالادى. بۇل دەگەنىڭىز – بالالار اكەسىز، ايەلدەر كۇيەۋسىز قالمايدى دەگەن ءسوز. سىزدەردىڭ بۇگىنگى كومەكتەرىڭىز، ءبىزدىڭ ەرتەڭگى بولاشاعىمىز!

Abai.kz