ەكس-پرەزيدەنتتىڭ نەمەرە ءىنىسى قايرات ساتىبالدىۇلى استانا قالاسىنىڭ بايقوڭىر اۋداندىق №2 سوتىنىڭ سۋدياسى نۇرلان باياحمەتوۆتىڭ ۇكىمىمەن 6 جىلعا باس بوستاندىعىنان ايىرىلدى.

قايرات ساتىبالدىۇلىنىڭ مۇلكى تاركىلەنىپ، مەملەكەتتىك قىزمەتتە، سوتتا، ۇلتتىق بانكتە، مەملەكەتتىڭ ۇلەسى 50 پايىزدىق كاسىپورىنداردا 10 جىل مەرزىمگە جۇمىس ىستەۋ قۇقىعىنان ايىرىلدى.

ساتىبالدىۇلى جازاسىن ورتاشا تۇزەۋ مەكەمەسىندە وتەيدى. سونداي-اق، ونى ۇلتتىق قاۋىپسىزدىك ورگاندارىنىڭ گەنەرال - مايورى، "قۇرمەت" جانە "پاراسات" مەملەكەتتىك ناگرادا-وردەندەرىنەن ايىرۋ تۋرالى ۇسىنىس ەنگىزىلەدى.

بۇدان بۇرىن قايرات ساتىبالدىۇلى كىناسىن مويىنداپ، «قازاقتەلەكوم» اق جانە «كسو» اق-عا 12 ملرد تەڭگە جانە 28 ملرد تەڭگە شىعىنىن وتەگەنى بەلگىلى بولعان.

ەسكە سالا كەتەيىك، قايرات ساتىبالدىۇلى بيىلعى ناۋرىزدا ۇستالعان بولاتىن. ونىڭ ۇستىنەن «الداۋ جولىمەن مۇلىكتىك زالال كەلتىرۋ»، «سەنىپ تاپسىرىلعان بوتەن مۇلىكتى يەمدەنىپ الۋ نەمەسە تالان-تاراجعا سالۋ» باپتارىمەن قىلمىستىق ءىس قوزعالعان. ودان بولەك ول «سالىقتان جانە كەدەندىك تولەمدەردەن جالتاردى»، «قىلمىستىق جولمەن تاپقان تابىسىن زاڭداستىردى» دەگەن كۇدىكپەن دە تەرگەلىپ جاتىر.

Abai.kz