قازاقستانعا كەلگەن رەسەيلىكتەر اقش-تان پانا سۇراپ، قازاقستان اۋماعىنان ءوتىنىش تۇسىرە المايدى. اقش-تىڭ قازاقستانداعى ديپلوماتيالىق ميسسياسىنىڭ ءباسپاسوز قىزمەتى وسىلاي دەيدى. بۇل تۋرالى ازاتتىققا سىلتەمە جاساپ Abai.kz حابارلايدى. 

ديپلوماتيالىق ميسسيا وكىلدەرى كورشى ەلدە جاريالانعان موبيليزاتسياعا بايلانىستى قازاقستانعا رەسەيلىكتەردىڭ اعىلىپ كەلۋىنەن حاباردار ەكەنىن اتاپ وتەدى.

"اقش-تىڭ استاناداعى ەلشىلىگى مەن الماتىداعى باس كونسۋلدىعىنىڭ پانا نەمەسە بوسقىن مارتەبەسىنە بايلانىستى وتىنىشتەردى قابىلداۋعا وكىلەتى جوق. پانا ىزدەۋشىلەر اقش-تا ءجۇرىپ ءوتىنىش تۇسىرە الادى. ولاردا اقش ازاماتتىعى بولماۋى ءتيىس" دەپ جازىلعان اقش ديپلوماتيالىق ميسسياسىنىڭ حابارلاماسىندا.

پانا بەرۋ تۋرالى وتىنىشتەردى اقش ازاماتتىق جانە يمميگراتسيا قىزمەتى قارايدى. سايكەسىنشە ديپميسسيا پانا ىزدەۋشىلەرگە سولارعا جۇگىنۋگە كەڭەس بەرەدى.

اقش-تىڭ بوسقىنداردى قابىلداۋ باعدارلاماسى بۇۇ بوسقىندار ءىسى جونىندەگى اگەنتتىك جانە ارىپتەس ۇكىمەتتىك ەمەس ۇيىمدارمەن بىرىگىپ جۇمىس ىستەيدى.

ديپميسسيا سونىمەن بىرگە قازاقستاننىڭ "كوشى-قون ساياساتى مەن شەتەل ازاماتتارىنىڭ قازاقستانعا كىرۋى بويىنشا كەز كەلگەن ماسەلە" بويىنشا قازاق ۇكىمەتىنە قايىرىلۋعا كەڭەس بەردى.

جۋىردا اق ءۇي وكىلدەرى موبيليزاتسيادان قاشقان رەسەيلىكتەر اقش-تان پانا سۇراي الادى دەپ مالىمدەگەن.

21 قىركۇيەكتە رەسەي پرەزيدەنتى پۋتين ەلدە موبيليزاتسيا جاريالاعان سوڭ ونداعان مىڭ رەسەيلىك ەلدەن قاشقان. رەسەيلىكتەردىڭ كوبى قازىر قازاقستان، گرۋزيا جانە ورتالىق ازيا ەلدەرىنە كەتىپ جاتىر. قازاقستان ىشكى ىستەر مينيسترلىگىنىڭ مالىمەتىنشە، 21-26 قىركۇيەك ارالىعىندا ەلگە 100 مىڭ رەسەي ازاماتى كىرگەن، 65 پايىزى شىعىپ كەتكەن.

Abai.kz