بۇل ارحيمەد مۇحانبەتوۆ دەگەن «30 پايىزدىق  اكىم» دەگەن حالىق ءسۇيىپ قويعان دارداي اتاعى بار ۇلىقتىڭ  قوستانايدان ءوزى كەتكەنمەن، كولەڭكەسى كەتپەيتىن سەكىلدى. 7 جىل بويى اكىمنىڭ جىلى ورنىنان قوزعالۋى، ءسىرا، وتە اۋىر سوقتى-اۋ دەيمىن، ورنىنان تۇسكەن ەشبىر اكىم شىعارماعان قىلىقتى شىعاردى.

ينستاگراممداعى ءوز پاراقشاسىندا قوستانايلىقتاردى قاتتى قيماي، كوز جاسىن كولدەتىپ وتىرىپ، ءۇشبۋ حات جازىپتى. بارىمەن قيماي قوشتاسادى. ءسىرا، مۇنداعىلار ونىڭ «اسا كورنەكتى» ىستەرىن ماڭگىلىككە ۇمىتپاي، ۇنەمى اندەتىپ جۇرەتىندىگىنەن وتە دامەلى سەكىلدى. اسىرەسە، زيالى قاۋىم مەن ءباسپاسوز وكىلدەرى دەگەندەگى ساعىنىشى كەۋدەسىنە سىيماي ءجۇر ەكەن-اۋ، شىركىن.

ويپىراي، وتىرىك، ەكىجۇزدىلىككە سالىنۋدىڭ دا شەگى جوق ەكەن عوي. وسىندا كوزىمىز ءتىرى عوي، قوستانايعا كەلىپ، تاققا قونعان كەزدەن بەرگى اتتاي جەتى جىلدىڭ ىشىندە ەڭ بولماسا ءبىر رەت نە زيالى قاۋىممەن كەزدەسكەن جوق، نە دەنى دۇرىس ءبىر ءباسپاسوز ءماسليحاتىنا دا قاتىسقان ەمەس. ال، ەڭ سوراقىسى، وسىنداعى ءوزى قۇرىلتايشىلىق ەتەتىن ماڭدايىمىزعا بىتكەن جالعىز قازاق گازەتى – «قوستاناي تاڭى» باسىلىمىنا ءبىر رەت تە باس سۇعۋعا جارامادى، سابازىڭ.

سويتە تۇرا وسى زيالى قاۋىمدار وكىلدەرىن الداعى ۋاقىتتا ماڭگى-باقي جۇرەك تۇسىندا ساقتايدى ەكەن. نە دەگەن سۇيىسپەنشىلىك دەسەڭىزشى...

سول اتاقتى قوشتاسۋ حاتىندا ءوزىنىڭ وسىندا كۇندىز-ءتۇنى تەر توگە ەڭبەك ەتكەندىگىن اتاپ وتەدى. سوندا ول قانداي ەڭبەك؟ ناتيجەسى قانداي؟ جۇرت ايتىپ جۇرەتىندەي قانداي بەلگى؟

ءىلىپ الاتىنداي ەشتەڭە دە جوق قوي، جوق.

ال ەندى قوستانايدا وسىنشا مەرزىم اكىم بولعان سەرگەي كۋلاگين دەگەن كىسى كەزىندە شوكەەۆ نازارباەۆتىڭ كوزىن باقىرايتىپ قويىپ، الداپ: «بىزدە قازاق دراما تەاترى بار» دەپ، جىمىرايعان مادەنيەت ءۇيىن كورسەتكەن جامان ۇيدەن ءبىرجولاتا قۇتىلىپ، قالانىڭ قاق ورتاسىنا جاڭادان ۇلكەن ءبىر قازاق دراما دراما تەاترىن سالىپ، حالىقتىڭ ۇلكەن ءبىر ريزاشىلىعىنا بولەنگەنى بار. مۇنى از دەسەڭىز، ىشىندە بارلىق جاعداي جاسالىپ، جاڭا زامانعى مەديتسينالىق تەحنيكامەن تۇگەل جابدىقتالعان وبلىستىق اۋرۋحانانى قالىڭ جۇرتشىلىققا تابىستاپ كەتتى. ەندى كوپ جۇرت سونىڭ راحاتىن كورىپ، وبلىستىڭ تۇكپىر-تۇكپىرىنەن كەلگەن اۋرۋ-سىرقاۋلارى كەڭ بولمەدە جاتىپ ەم الىپ، ال قارا كوزدەرىمىز ساۋلەتتى عيماراتتا تەاتر ونەرىن تاماشالاپ وتىر. سوندا ارتىندا ەلەۋلى بەلگى قالدىرعان اكىم قايسىسى بولدى؟ ءتىپتى كەزىندە كۋلاگين پەرىشتە بولماسا دا، وعان «30 پايىز» دەگەن اتاق ەرىپ تە كەلگەن جوق، ەرىپ تە كەتكەن جوق.

ايتا بەرسەك، بۇل ارحيمەد حالىققا سونشالىقتى اسا قاجەتى جوق عيماراتتاردى ميلليونداعان ەمەس، بىرنەشە ميللياردتاعان تەڭگەگە سالىپ، ونىسى كەيىن ىسكە جاراماي قالاتىنى سەكىلدى «ونەرلەرى» كوپ بولاتىن. ول قۇرىلىستاردى تەك قىمبات باعامەن سالۋدى جاقسى كورگەندىگىنەن شىعار، الگى «30 پايىزدىق اكىم» دەگەن اتاقتىڭ جەلىمدەي جابىسىپ قالعانى.

جالپى، بۇل مەنىڭ كەتكەن ادامدى جامانداعانىم ەمەس. كەيبىرەۋلەر سەكىلدى مەن ونى سىرتىنان وسەكتەگەن ادەتىم جوق. كوزى قاراقتى وقىرماندار بىلەدى، مەن ارحيمەدتىڭ وسىندا كەلگەننەن بەرگى كەزەڭدەگى جىبەرگەن كەمشىلىكتەرىن ىلعي كوزىنە شۇقىپ جازىپ وتىرعان جانمىن. تۋرا 7 جىل بويى.

مۇمكىن، مەنىڭ دە ەڭبەگىمدى ەسكەرەر. ايتپاقشى، ول مەنىڭ جاقىن اتالاس تۋىسىم دا بولىپ كەلەدى. جۋرناليست دەگەن ماماندىقتىڭ ءبىر جامان جەرى وسى، تۋعان-تۋىسقاندىقتان اجىراتادى. ايتپەسە، ارحيمەدتىڭ يگى ىستەرىن ىلعي تىزبەلەپ جازىپ جۇرگەنىمدە اۋزىمنان اق ماي اعىپ وتىرمايتىن با ەدى؟ ەندى، مىنە، دويدەي ءبىر تۋىس اكىمنەن ايىرىلىپ قالىپ، سورلاپ جۇرگەنىم. ءاي، مەنىڭ وزىمە دە سول كەرەك. جۇرت سەكىلدى تىنىش جۇرمەي...

جايبەرگەن بولاتوۆ

Abai.kz