قازىرگى تاڭدا ءبىز «ادىلەتتى قازاقستان» قوعامىن قۇرۋعا تالپىنىپ جاتقانىمىزدا كوڭىلدى كۇپتى قىلاتىن كەي جايلار مازا بەرمەيتىندىگى بار. بىزدە ءالى دە بولسا، قوعامىمىزدا اشىقتىق پەن ادىلدىك جەتىسە بەرمەيتىن سەكىلدى.

ءبىر عانا فاكتى. «ۆرەميا» گازەتىنىڭ ءتىلشىسى ميحايل كوزاچكوۆ دەگەن ازاماتتىڭ باسىنا ءىس تۇسكەنى قاتتى الاڭداتىپ وتىر. ونىڭ ۇيىنە ءتىنتۋ جۇرگىزىلىپ، وزىنە «رەيدەرلىككە قاتىسىپ، بىرەۋلەردى بوپسالاپ، مول كولەمدە اقشا العان» دەگەن ايىپ تاعىلىپ، اباقتىعا قامالدى.

مەنىڭ ونىمەن تۋىستىعىم دا جوق، تانىستىعىم دا شامالى. الايدا، ونىڭ اتالمىش گازەت پەن تەلەگرامم-ارناسىنداعى اسا وزەكتى ماقالالارى ەشكىمدى دە بەي-جاي قالدىرمادى. اسىرەسە، سوت جۇيەسىندەگى بىلىق-شىلىقتار، جەڭ ۇشىنان جالعاسقان جەمقورلىق، تامىر-تانىستىقپەن جايلى ورىندارعا جايعاسۋ، تۋعان-تۋىستاردى جوعارى مانساپقا سۇيرەلەۋ سەكىلدى جيركەنىشتى جاعدايلار بۇكپەسىز اشىق جازىلدى.

مۇنىڭ سىرتىندا الماتى وبلىسىنداعى سانداعان كازينولارعا جوعارى لاۋازىمدى شەنەۋنىكتەردىڭ ونداعان ەمەس، جۇزدەگەن ميلليون تەڭگەنى ەش قىمسىنباستان ۇتقىزىپ، دىم بولماعانداي تايراڭداپ جۇرگەندىگىن اشىپ كورسەتكەندىگىنىڭ ءوزى نەگە تۇرادى؟ مۇنداي تۋراشىل جۋرناليست كىمگە جاعۋشى ەدى؟ مۇمكىن، ماسەلەنىڭ ءوزى وسىعان تىرەلىپ تۇرعان شىعار؟ كەزىندە، وزگە تۇگىلى، قازاقستان جۋرناليستەر ولاعىنىڭ توراعاسى سەيىتقازى ماتاەۆتى بالاسىمەن بىرگە جالعان ايىپپەن تۇرمەگە توعىتقاندىعىن ەشكىم دە ۇمىتا قويعان جوق. بۇل دا سونداي جاعداي ەمەستىگىنە كىم كەپىلدىك بەرە الادى؟

ايتپاقشى، ۇلتى ۋكرايندىق بۇل ازامات رەسەيدىڭ باسقىنشىلىق ساياساتىن اشىق سىناپ، قاشاندا ءوز پىكىرىن ەش قىمسىنباي، اشىق ايتىپ جۇرەتىن. مۇمكىن، سونىڭ دا سالقىنى ءتيىپ كەتتى مە، كىم ءبىلسىن؟..

ءبىز، ارينە، كوزاچكوۆتى «سۋدان تازا، سۇتتەن اق» دەپ وتىرعان جوقپىز. بولماسا، اناۋ زەرتتەۋ جۇرگىزگەن قارجىلىق باقىلاۋ اگەنتتىگىنىڭ تاققان ايىپتارىنىڭ ءبارى جالعان دەۋدەن دە اۋلاقپىز. بىزدىڭشە، مۇنداي جاعدايلار اشىق تا ءادىل تەكسەرىلىپ، شىندىق سالتانات قۇرۋى ءتيىس. سوندا عانا «جاڭا قازاقستانعا» دەگەن سەنىم نىعايارى ءسوزسىز.

جايبەرگەن بولاتوۆ

Abai.kz