الەۋمەتتىك جەلىلەردە 10 قازاندا شىمكەنت قالاسىندا وتكەن قايرات نۇرتاستىڭ كونتسەرتى كەزىندە كوپتەگەن ادام زارداپ شەگىپ، بىرنەشە ازامات قايتىس بولدى دەگەن اقپارات تارالۋدا.

الايدا بۇل مالىمەتتەر شىندىققا سايكەس كەلمەيدى.

شىمكەنت قالاسىنىڭ دەنساۋلىق ساقتاۋ باسقارماسىنىڭ مالىمەتىنشە, 2026 جىلدىڭ 10 قازاندا قاجىمۇقان مۇڭايتپاسوۆ اتىنداعى ستاديوندا وتكەن كونتسەرت كەزىندە 8 ادام مەديتسينالىق كومەككە جۇگىنگەن. مەديتسينالىق تەكسەرۋدەن كەيىن ولاردىڭ بىرىنەن باسقاسى ۇيلەرىنە جىبەرىلگەن. 18 جاستاعى قىز جاراقات الىپ، اۋرۋحاناعا جەتكىزىلگەن. قازىرگى ۋاقىتتا وعان قاجەتتى مەديتسينالىق كومەك كورسەتىلۋدە، جاعدايى مامانداردىڭ باقىلاۋىندا.

سونىمەن قاتار شىمكەنت قالاسىنىڭ پوليتسيا دەپارتامەنتى كونتسەرت وتكىزۋ كەزىندە قاۋىپسىزدىك تالاپتارىنا ساي كەلمەيتىن قىزمەتتەر كورسەتۋ فاكتىسى بويىنشا قىلمىستىق ءىس تىركەلدى. ءىس-شارانى ۇيىمداستىرۋشىلار پوليتسياعا جەتكىزىلدى. ولاردىڭ ارەكەتتەرىنە زاڭعا سايكەس قۇقىقتىق باعا بەرىلەدى.

جالعان اقپاراتقا قارسى ءىس-قيمىل ورتالىعى بۇقارالىق اقپارات قۇرالدارى وكىلدەرىن، بلوگەرلەر مەن الەۋمەتتىك جەلى قولدانۋشىلارىن جاريالانىم جاساماس بۇرىن ولاردىڭ انىق-قانىعىن تەكسەرۋگە جانە راستالماعان اقپاراتتى تاراتپاۋعا شاقىرادى.

اسىرەسە ازاماتتاردىڭ ءومىرى مەن قاۋىپسىزدىگىنە قاتىستى وقيعالاردى جاريالاۋ كەزىندە جاۋاپكەرشىلىك تانىتۋ ماڭىزدى. ويتكەنى شىندىققا سايكەس كەلمەيتىن حابارلامالار قوعامدا نەگىزسىز الاڭداۋشىلىق تۋعىزۋى مۇمكىن.

قازاقستان رەسپۋبليكاسىنىڭ زاڭناماسىنا سايكەس، جالعان اقپارات تاراتقانى ءۇشىن جاۋاپكەرشىلىك كوزدەلگەنىن ەسكە سالامىز.

Abai.kz