بيىل كوكتەمدە ورىس تانكىلەرى كيەۆتءىڭ ماڭىندا قاڭتارىلىپ، سوعىستىڭ ەكونوميكالىق سالدارىنىڭ اۋىر بولاتىنى سەزىلە باستاعاندا، رەسەي ۇكىمەتىنىڭ ءبىر سالاسى بەلسەنە جۇمىس ىستەپ تۇردى. ول – ونىڭ تەلە ناسيحاتى ەدى.

كرەملدىڭ ۇگىتشىلەرى امەريكانىڭ كابەلدى تەلەارنا جاڭالىق قىزمەتى، وڭشىل الەۋمەتتىك جەلىلەر مەن قىتاي مەملەكەتتىك ارنالارىنىڭ كورىنىستەرىن ساپىرىلىستىرىپ، ميلليونداعان كورەرمەنگە شىندىقتان الشاق، باسقا دۇنيەلەر ۇسىندى. باتىستىڭ رەسەي مۇنايىنان باس تارتۋى وزدەرىنە اقىرزامان ورناتۋ ەكەنىن، امەريكانىڭ ۋكراينادا جاسىرىن بيولوگيالىق قارۋ وندىرەتىن بازاسى بار ەكەنىن، قىتايدىڭ قىرىق پىشىق باتىسقا بىرگە قارسى تۇراتىن ادال دوس ەكەنىن جارنامالاۋمەن بولدى.

مەملەكەتتىك باق-تىڭ جۋرناليستەرى وسى مازمۇنداردى اسىرەلەپ كورسەتۋگە مىندەتتەلگەن. رەسەيدىڭ بارلاۋ قىزمەتى ولارعا قويۋعا ءتيىس سيۋجەتتەرمەن باسقا دا جاڭالىقتاردى تىكەلەي ۇسىنىپ وتىرعان. وعان ناقتى دالەل ايعاقتاردى قۇپيا قۇجاتتاردى جاريالاۋمەن اتى شىققان «DDoSecrets» ۇيىمى عالامتوردا جاريالاعان.

اتالمىش ۇيىم «بۇكىل رەسەيلىك مەملەكەتتىك تەلەراديو كومپانياسىنىڭ» (ۆگترك) ەلەكتروندى پوچتا جاشىگىندەگى قۇپيا حاتتاردى اشكەرەلەگەن. كولەمى 750 GBتىق قۇپيا حاتتارعا تالداۋ جاساعان نيۋ-يورك تايمستىڭ جۋرناليستتەرى Adam Satariano, Aron Krolik قاتارلىلار زەرتتەۋ ناتيجەلەرىن جاريالاپ وتىر.

ولاردىڭ جازۋىنشا اشكەرەلگەن قۇپيا حاتتار رەسەيدىڭ ۇگىت ماشيناسىنىڭ بۇل جولعى سوعىستى قالاي بۇركەمەلەگەنىن بىلۋگە تاپتىرمايتىن وراي بەرىپ وتىر. رەسەي سوعىستا جەڭىلىس تاۋىپ، ادام شىعىنى كۇن ساناپ وسسە دە، ەكونوميكاسى وقشاۋلانىپ، حالىقارادا قاتاڭ سىنعا قالسا دا، ولاردىڭ مەملەكەتتىك ارنالارى سوعىستى بايانداۋدىڭ باسقا امالىن تاۋىپ، رەسەيدىڭ جەڭىسكە جاقىنداپ قالعانىن، ۋكراينانىڭ قۇلاۋدىڭ الدىندا تۇرعانىن، باتىستىق وداقتاستارىنىڭ دا ىدىراۋدىڭ الدىندا ەكەنىن ناسيحاتتاۋمەن بولعان. پۋتيننىڭ ەل ىشىندەگى بەدەلىنىڭ تۇسپەۋىنە، سوعىستى قولداۋشىلار قاتارىنىڭ ازايماۋىنا بارىن سالعان.

ولار بۇل ماقساتقا جەتۋ ءۇشىن قاۋىپسىزدىك قىزمەتى بەرگەن مالىمەتتەردەن سىرت، امەريكانىڭ وڭشىل كانالدارى مەن تەلەگرام، يۋتۋبتەگى تانىمال ارنالاردىڭ ماتەريالدارىن ادەمى پايدالانعان. قولعا تۇسكەن ۋكراين ساربازدارىن فاشيس ەتىپ كورسەتىپ، تەاترلاردى ۋكراين ۇلتشىلدارى جاردى دەپ اقپارات تاراتقان. قىتاي عالامتورىندا جاريالانعان «ورىستىڭ ءبىر تال ءتاتتىسىن ساتىپ العانىڭ، فاشيستەرگە قارسى ءبىر وق اتقانىڭ» دەگەن جازبانى دا نازاردان تىس قالدىرماعان. امەريكانىڭ ايگىلى تەلەجۇرگىزۋشىسى تاك كارسىننىڭ «امەريكانىڭ رەسەيگە قاراتقان ەكونوميكالىق ساياساتى دوللاردىڭ حالىقارالىق نارىقتاعى ورىنىن السىرەتەتىن بولدى» دەگەن پىكىرىن جەردەن جەتى قويان تاپقانداي بارلىق جەرگە تىقپالاعان. اقش تەلەگرام ارنالارىندا تارالعان بەنزين مەن ازىق-تۇلىك تاپشىلىعى جايىنداعى قاۋەسەتتەردى جيناقتاپ «جانارماي داعدارىسى مەن بوس تۇرعان سورەلەر: ترامپتىڭ قورقىنىشتى بولجامى ايداي كەلدى» دەپ كولەمدى ەتىپ، اسىرەلەپ بەرگەن.

امەريكا باسىلىمىنا سۇحبات بەرگەن ساراپشىلار ۋكرايناعا باسىپ كىرگەلى-بەرى كرەمل باق-تى قاداعالاۋدى كۇشەيتكەنىمەن، سوعىستىڭ ۇزارۋىنا بايلانىستى شىندىقتى بۇركەمەلەۋ قيىنعا سوعىپ، كورەرمەندەردىڭ تەلە باعدارلامالارعا دەگەن ىنتاسىنىڭ ازايعانىن جەتكىزگەن.

گەرمانيانىڭ رەسەيشىل باسىلىمدارىنىڭ ءبىرى رەسەيدىڭ قازىرگى تەلەارنالارىنىڭ بەينەسىن: «وتىرىكتىڭ، وشپەندىلىكتىڭ، ارسىزدىقتىڭ جەكسۇرىن نۇسقاسى» دەپ باعالاعان.

ەسبول ۇسەنۇلى

Abai.kz