الاشتىڭ ايگىلى اقىنى ماعجان جۇماباەۆتىڭ جاۋھار پوەزياسى تۇركى تەكتەس حالىقتار اراسىندا دا التىن قازىناعا بالانادى.

تۇركى  حالىقتارىنىڭ تەگى ءبىر تۇتاستىعى مەن بىرلىگىن جۇرەگىنەن وتكىزە جىرلاعان اقىننىڭ ءبىرى دە، بىرەگەيى - ماعجان.

ماعجان بەكەنۇلىنىڭ «الىستاعى باۋىرىما» اتتى ولەڭى بار. وسى ولەڭگە ارادا 80 جىل ۋاقىت وتكەندە تۇرىكتىڭ فەيزۋللاح بۋداك دەيتىن اقىنى جاۋاپ جازىپتى.

قوس ولەڭدى قاتار ۇسىنىپ وتىرمىز.

Abai.kz

ماعجان جۇماباەۆ. الىستاعى باۋىرىما

الاشتىڭ ايگىلى اقىنى ماعجان جۇماباەۆتىڭ جاۋھار پوەزياسى تۇركى تەكتەس حالىقتار اراسىندا دا التىن قازىناعا بالانادى.

تۇركى  حالىقتارىنىڭ تەگى ءبىر تۇتاستىعى مەن بىرلىگىن جۇرەگىنەن وتكىزە جىرلاعان اقىننىڭ ءبىرى دە، بىرەگەيى - ماعجان.

ماعجان بەكەنۇلىنىڭ «الىستاعى باۋىرىما» اتتى ولەڭى بار. وسى ولەڭگە ارادا 80 جىل ۋاقىت وتكەندە تۇرىكتىڭ فەيزۋللاح بۋداك دەيتىن اقىنى جاۋاپ جازىپتى.

قوس ولەڭدى قاتار ۇسىنىپ وتىرمىز.

Abai.kz

ماعجان جۇماباەۆ. الىستاعى باۋىرىما

الىستا اۋىر ازاپ شەككەن باۋىرىم،
قۋارعان بايشەشەكتەي كەپكەن باۋىرىم،
قاماعان قالىڭ جاۋدىڭ ورتاسىندا
كول قىلىپ كوزدىڭ جاسىن توككەن باۋىرىم.
الدىڭدا اۋىر قايعى جاتقان باۋىرىم،
ءومىرى جاپا شەككەن جاتتان باۋىرىم.
تۇكسيگەن جۇرەگى تاس جاۋىز جاندار،
تىرىدەي تەرىڭ توناپ جاتقان باۋىرىم.
اپىرماي، ەمەس پە ەدى التىن التاي -
انامىز ءبىزدى تاپقان اساۋ تايداي!
باۋىرىندا جۇرمەپ پە ەدىك سالىپ ويناق،
ءجۇزىمىز ەمەس پە ەدى جارقىن ايداي!
الالى التىن ساقا اتىسپاپ پا ەك،
تەبىسىپ ءبىر توسەكتە جاتىسپاپ پا ەك.
التايداي انامىزدىڭ اق سۇتىنەن
بىرگە ەمىپ، بىرگە ءدامىن تاتىسپاپ پا ەك.
تۇرماپ پا ەدى، ءبىز ءۇشىن ءمولدىر بۇلاق
سىلدىراپ، سىلق-سىلق كۇلىپ، تاۋدان قۇلاپ.
دايار بوپ ۇشقان قۇستاي سوققان قۇيىن،
تىلەگەن ءبىر-ءبىر تۇلپار بەينە پىراق!
التايدىڭ التىن كۇنى ەركەلەتىپ،
كەلگەندە جولبارىس بوپ، جاڭا ەرجەتىپ،
اق تەڭىز، قارا تەڭىز ار جاعىنا،
باۋىرىم، مەنى تاستاپ قالدىڭ كەتىپ.
مەن قالدىم - جاس بالاپان قانات قاقپاي،
ۇشام دەپ ۇمتىلسام دا دامىل تاپپاي.
ءجون سىلتەر، جول كورسەتەر جان بولمادى،
جاۋىز جاۋ قويسىن با ەندى مەنى اتپاي.
قورعاسىن جاس جۇرەككە وعى باتتى،
كۇناسىز تازا قانىم سۋداي اقتى.
قانسىراپ، ءالىم قۇرىپ ەستەن تاندىم،
قاراڭعى اباقتىعا بەرىك جاپتى.
كورمەيمىن كەشە جۇرگەن قىر-سايدى دا،
كۇندىز - كۇن، تۇندە - كۇمىس نۇرلى ايدى دا.
ارداقتاپ، شىن جىبەكتەي ارايعا وراپ
وسىرگەن التىن انام - التايدى دا.
اپىرم-اي، ايرىلدىق پا قالىڭ توپتان،
شابىلىپ قايتپايتۇعىن جاۋعان وقتان.
تۇرىكتىڭ جولبارىستاي جۇرەگىنەن
شىنىمەن قورقاق قۇل بوپ جاۋدان بۇققان.
شارق ۇرىپ، ەرىككە ۇمتىلعان تۇرىك جانى،
شىنىمەن اۋىردى ما ءبىتىپ ءحالى؟!
وت ءسونىپ جۇرەكتەگى، قۇرعادى ما
قايناعان تامىرداعى اتا قانى؟!
باۋىرىم، سەن و جاقتا، مەن بۇ جاقتا،
قايعىدان قان جۇتامىز.
ءبىزدىڭ اتقا
لايىق پا قۇل بوپ تۇرۋ؟
كەل، كەتەلىك
التايعا، اتا ميراس، التىن تاققا!

ماعجاننىڭ بۇل ولەڭىنە 2001 جىلى تۇرىك اقىنى فەيزۋللاح بۋداكتىڭ جازعان جاۋابى.

الىستان ازابىمدى بىلگەن باۋىرىم،
جۇباتىپ، كوزدىڭ جاسىن سۇرتكەن باۋىرىم.
وتىرىپ ءوزى جاۋدىڭ ورتاسىندا،
كوڭىلدى مۇڭ - زارىما بولگەن باۋىرىم.
تۇمشالىپ قايعى-مۇڭعا قالدىم، باۋىرىم،
قۋارىپ بايشەشەكتەي سولدىم، باۋىرىم.
سەن دۇشپاندى بۇرىننان ءبىلۋشى ەدىڭ،
مەن ەندى سوعان كۋا بولدىم، باۋىرىم.
انامىز ەدى-اۋ ورتاق التىن التاي،
ول ءبىر تۇلپار بولعاندا، ءبىز ءبىر-ءبىر تاي.
باۋىرىندا ويناق سالىپ ءبىز جۇرگەندە،
تاپ بىزدەي جاينامايتىن كۇن مەنەن اي.
الالى التىن ساقا اتقان ەدىك،
تەبىسىپ ءبىر توسەكتە جاتقان ەدىك.
التايداي انامىزدىڭ اق ءسۇتىن دە
بىرگە ەمىپ، بىرگە ءدامىن تاتقان ەدىك.
سىلدىراپ بىزدەر ءۇشىن بۇلاق اقتى،
شاتىرلاپ نايزاعايلار ويناپ جاتتى.
دايار بوپ ۇشقان قۇس پەن سوققان قۇيىن،
ءبىز مىنگەن اتتار - تۇلپار، ءھام پىراقتى.
ءبىر كۇنى بۇل داۋرەننىڭ سوڭى جەتىپ،
ءتاڭىردىڭ جازۋىمەن ساپار شەكتىك.
اق تەڭىز، قارا تەڭىز اسساقتاعى،
جۇرەكتى سول التايعا تاستاپ كەتتىك.
بىلەمىن ۇشام دەدىڭ، ۇشا المادىڭ،
دارمەنسىز، كوككە قانات قاعا المادىڭ.
ءجون سىلتەپ، جول كورسەتەر ەشكىمىڭ جوق،
دۇشپاننىڭ تىرناعىنان قاشا المادىڭ.
ساعان اتقان وق ماعان ءوتىپ جاتتى،
كۇناسىز قانىمىزدى توگىپ جاتتى.
ەگەردە قان توگىلسە مىنا ءبىزدىڭ،
تۇبىمىزگە ءبولىنۋ جەتىپ جاتتى.
مەن دە اڭسايمىن كەشەگى قىر-سايدى دا،
كۇندىز - كۇن، تۇندە - كۇمىس نۇرلى ايدى دا.
ءبىزدى جىبەك قۇنداققا وراپ الىپ،
باۋىرىندا الپەشتەگەن انا - التايدى دا.
ايىرىلىپ ءبىر-بىرىمىزدەن، وتقا تۇستىك،
تاريحتىڭ قازانىندا قايناپ پىستىك.
تايسالىپ قايتپايتۇعىن جاۋعان وقتان
جىگىتتىك، باتىرلىقتىڭ انتىن ىشتىك.
ۇمتىلعان بوستاندىققا تۇرىك جانى،
اۋىرىپ كورگەن ەمەس، ءبىتىپ قانى.
جۇرەكتىڭ جالىن وتى سونگەن ەمەس،
سوعىپ تۇر تامىرىندا اتا قانى.
باۋىرىم، سەن و جاقتا، مەن بۇ جاقتا،
نە تاپتىق شاشىراعاندا شارتاراپقا؟
بارلىعىن كۇش-قايراتتىڭ جيناۋ كەرەك،
اتادان ميراس قالعان ۇلى وتاندا.