قازاقستان رەسپۋبليكاسى
پارلامەنتى ءماجىلىسىنىڭ
دەپۋتاتى ق.ج. يساعا; 
قازاقستان رەسپۋبليكاسى
پارلامەنتى ءماجىلىسىنىڭ
دەپۋتاتى ە.ت جاڭبىرشينگە!

قۇرمەتتى قازىبەك جارىلقاسىنۇلى!

قۇرمەتتى ەدىل تەرەكبايۇلى!

وزدەرىڭىز دە بايقاعان بولارسىزدار، كەشە سىزدەردىڭ اتتارىڭىزعا جازىلعان «ڭ جويىلىپ كەتۋ قاۋپى استىندا تۇر!» دەگەن «اشىق حاتتى» «Facebook» الەۋمەتتىك جەلىسىندەگى پاراقشاما جۇكتەگەنىم سول ەكەن، جۇرت جابىلا ءبولىسىپ، قىزۋ تالقىلادى دا كەتتى.

وقىرمانداردىڭ پىكىرىنە قاراپ وتىرساق، ولاردىڭ ءبارى «ڭ»-نىڭ تاعدىرىنا قاتتى الاڭداۋلى ەكەن.

مىسالى، بەلگىلى مەملەكەت جانە قوعام قايراتكەرى، مەملەكەتتىك سىيلىقتىڭ يەگەرى وتەگەن ورالبايۇلى اعامىز وسپانحان اۋباكىروۆتىڭ «ءڭوڭ» اتتى ولەڭىنە سىلتەمە جاساي كەلىپ، اتالعان ماسەلەگە بايلانتى ءوز ويىن ايتىپ، «بۇل ورىس ءتىلىنىڭ وكتەمدىگىنىڭ بەلگىسى، ەندى وسى توپقا ق، ءۇ،ۇ، ءو ارىپتەرى دە كىرىپ كەتپەسە بولار ەدى. اۋىت قاۋىپ ايتىپ وتىر، ەستىر قۇلاق تا ازاڭ، ايتار ءتىل دە مازاڭ...» - دەپ، الاڭداۋشىلىعىن ءبىلدىرىپتى;

Zhanabek Nar اتتى جەرلەسىمىز «...جاستاردىڭ جاپپاي بۇل ارىپتەردى ايىرا الماۋى، ويلاندىراتىن جاعداي» دەگەن ويىن ورتاعا سالىپتى;

ىلەسبەك بايجانوۆ اعامىز «قولدايمىن! وتە ورىندى، جانە ۇلت تاعدىرىنداعى اسا ماڭىزدى ۇسىنىس!!!!» - دەپ، قولداۋ ءبىلدىرىپتى ماعان;

Amantay Toyshybayuly «بۇگىن ءسوزىن تاڭدادىم. جاڭا تاعايىندالعان ءبىلىم ءمينيسترى دە ڭ-دى ايتا المايدى ەكەن. جاناعى، جاناعى دەپ سويلەدى...» -دەپ، باس مۇعالىمنىڭ «ڭ»-سىز سويلەيتىنىنە نازار اۋدارىپ ۇلگىرىپتى;

Nurlan Asqar ءىنىمىز «وتە ورىندى ماسەلە. "ن" مەن "ڭ"-دى ايىرا المايتىندار، ايىرسا دا ايتا المايتىندار، ايتا السا دا ەلىكتەپ، قاساقانا ايتپايتىندار كوبەيىپ كەتتى. ءتىپتى جۋرناليستەر اراسىندا دا ەتەك الدى. سوندىقتان بۇعان ءبىر شارا قولدانۋ قاجەت!» - دەپ، «ڭ»-عا ءتىلى كەلمەيتىندەردىڭ كوپتىگىن العا تارتىپتى;

پاكيزات نۇرداۋلەت قارىنداسىمىزدى «ڭ» تاعدىرى قاتتى تولعاندىرىپ ءجۇر ەكەن، «سونى ويلاپ ءجۇر ەدىم اعا، قازاقتىلدى ماماندارمەن، ءتىپتى عىلىم مينىستىرىدە، جۋرناليستەردە ن-دى ڭ-نان پارىقتامايدى. ەستىگەندە جانىڭا ينە سۇققانداي بولادى. ۇيىمىزدەگى ۇل-قىزمىزعا دۇرىستاپ ايت دەپ قاقسايتىن بولدىق...» - دەگەن پىكىر قالدىرىپتى...

قىسقاسى، «ڭ»-نىڭ تاعدىرى كىم-كىمدى دە بەيجاي قالدىرمايتىن، جۇرتتىڭ الاڭىنا اينالعان اۋقىمدى ماسەلەگە باياعىدا اينالىپ كەتكەنى بەلگىلى بولدى.

سوندىقتان، «ڭ»-نىڭ جويىلىپ كەتۋ قاۋپى استىندا تۇرعان بۇل ماسەلەنى ىڭ-جىڭسىز قويا سالۋعا بولمايدى!

ەل بولىپ، جۇرت بولىپ، وزدەرىڭىزگە سۇيەنە وتىرىپ، بۇل تاقىرىپتى كوتەرۋ قاجەت! مەملەكەتتىك دەڭگەيدە شارا قولدانباسا, «ڭ» دىبىسى مەن ارىبىنەن اي مەن كۇننىڭ امانىندا ايىرىلىپ قالامىز. ەرتەڭ ءبىزدى تاريح تا، احمەت بايتۇرسىنۇلى اتامىزدىڭ رۋحى دا ءبىزدى ماڭگى كەشىرمەيدى!

ايتپاقشى، ءبىر قىزىعى، مەن كوتەرگەن وسى «ڭ»-نىڭ تاعدىرىنا قاتىستى ماسەلەگە قانشاما جۇرت الاڭداۋشىلىق ءبىلدىرىپ، ءوز پىكىرلەرىن قالدىرعانىمەن، بىردە-بىرەۋى اتالعان ماسەلەنى شەشۋدىڭ – «ڭ»-دى قۇتقارىپ قالۋدىڭ جولىن كورسەتپەپتى.

ماسەلە كوتەرگەن سوڭ، ونى شەشۋدىڭ جولىن دا ۇسىنعان دۇرىس قوي. جوعارىدا ىلەسبەك بايجانوۆ اعامىز ايتقانداي، بۇل ۇلت تاعدىرىنداعى اسا ماڭىزدى ماسەلە. تاعى قايتالاپ ايتايىن، تاۋەلسىز ەل بولا تۇرىپ، مەملەكەت قۇراۋشى ۇلت - قازاقتىڭ اينالدىرعان 28 دىبىسىنا يە بولا الماساق، ول دا ەلدىگىمىزگە ۇلكەن سىن!

ونىڭ ۇستىنە، ارعى جاعىن ايتپاعاندا، «ڭ»-سىز سويلەۋ مەن جازۋ وتىز جىلدان بەرى ابدەن قالىپتاسىپ، ۇلتىمىزدىڭ ەتىنەن ءوتىپ، سۇيەگىنە ءسىڭىپ كەتكەن دەرت! ول دەرتتى ءبىر-ەكى اۋىز سوبەن نەمەسە بىرەر بۇيرىقپەن ەمدەپ جازۋعا كەلمەيدى، ۇزاق بارىس كەرەك. ءتىپتى، بىرنەشە بۋىن بۋىنعا دەيىن جالعاساتىن شارا قولدانۋدى تالاپ ەتەدى. سوسىن بۇل ماسەلە مينيسترلىكتەردىڭ دەڭگەيىندە ەمەس، ۇكىمەتتىڭ، كەرەك بولسا، پرەزيدەنتتىڭ دەڭگەيىندە عانا شەشىلەدى. «ڭ تۋرالى» زاڭ قابىلدانسا دا ارتىق بولمايدى.

سەبەبى، وتەگەن ورالبايۇلى اعامىز دۇرىس ايتادى، بۇگىن «ڭ»-دى جوعالتساق، ەرتەڭ ق، ءۇ، ۇ، ءو ارىپتەرىنەن ايىرىلامىز...

قۇرمەتتى قازىبەك جارىلقاسىنۇلى!

قۇرمەتتى ەدىل تەرەكبايۇلى!

«ڭ»-دى ساقتاپ قالۋ ءۇشىن، سىزدەردەن تومەندەگى بەس ماسەلە بويىنشا دەپۋتاتتىق ساۋال جولداپ،

ءبىرىنشى، 2023 جىلدى، بولماسا 2024 جىلدى «ڭ جىلى» دەپ جاريالاۋعا;

ەكىنشى، «قازاقستان رەسپۋبليكاسىنداعى مەرەكەلەر تۋرالى» زاڭىنا تولىقتىرۋ ەنگىزىپ، 4 مامىردى «ڭ-دى قورعاۋ كۇنى» دەگەن اتپەن كاسىبي جانە وزگە دە مەرەكەلەردىڭ تىزبەسىنە ەنگىزۋگە;

ءۇشىنشى، استانا، الماتى، شىمكەت قالالارىن قامتي وتىرىپ، 17-وبلىستىڭ ورتالىقتارىنان، وزگە دياسپورا وكىلدەرى كوپ قونىستانعان اۋدان، اۋىلداردان «ڭ»-عا كوشە اتتارىن بەرۋگە;

ءتورتىنشى، رەسپۋبليكا كولەمىندەگى مەكتەپتەر مەن بالاباقشالارعا ەڭ كەمىندە ءبىر «ڭ» دىبىسى بار سوزدەن قۇرالعان اتاۋلار بەرۋگە;

بەسىنشى، مەكتەپ وقۋشىلارى مەن جوعارى وقۋ ورىندارى ستۋدەنتتەرى اراسىندا «ڭ»-نان جىلىنا ءبىر مارتە رەسپۋبليكالىق وليمپيادا وتكىزىپ تۇرۋ ءۇشىن مەملەكەتتىك بيۋدجەتتەن ارنايى قوماقتى قاراجات بولدىرۋگە ىقپال ەتۋلەرىڭىزدى سۇرايمىن.

قۇرمەتپەن،

اۋىت مۇقيبەك،

«قۇرمەت» وردەنىنىڭ يەگەرى

Abai.kz