كرەمل كەشە كوپشىلىك كۇتپەگەن شەشىم قابىلداپ، مالىمدەمە جاسادى. روجدەستۆو مەرەكەسىنە بايلانىستى ۇرىس قيمىلدارىن توقتاتامىز دەيدى. 36 ساعاتقا. كيەۆكە دە ۇسىنىس جاساپ، سولاي ەتۋگە شاقىردى. 

ۆلاديمير پۋتين قورعانىس ءمينيسترى سەرگەي شويگۋعا ۇرىس قيمىلدارىن توقتاتۋ تۋرالى بۇيرىق بەردى. روجدەستۆو مەرەكەسىنە بايلانىستى ۇرىس قيمىلدارىن توقتاتۋ تۋرالى ۇسىنىستى پاتريارح كيريلل ايتقان بولاتىن.

ۇرىس قيمىلدارىن ۋاقىتشا توقتاتۋ مەرزىمى 6-قاڭتار، ساعات 12:00-دەن باستاپ، 7-قاڭتار، ساعات 24:00-گە دەيىن جالعاسادى. ارنايى بۇيرىقتىڭ ءماتىنى كرەملدىڭ رەسمي سايتىندا دا جاريالاندى.

"ۇرىس قيمىلدارى ءجۇرىپ جاتقان ايماقتا وتە كوپ پراۆوسلاۆ وكىلدەرى تۇراتىندىقتان، ۋكراين تاراپى دا ۋاقىتشا ۇرىس قيمىلدارىن توقتاتىپ، بەيبىت تۇرعىنداردىڭ ءدىني جورالعى جاساۋىنا مۇمكىندىك بەرۋى كەرەك", - دەيدى رەسمي ماسكەۋ. الايدا زەلەنسكي ءوفيسى رەسەيدىڭ بۇل ۇسىنىسىن كەرى قايتاردى.

ۆلاديمير زەلەنسكي بىلاي دەدى: "ولار قازىر روجدەستۆو مەرەكەسىن قالقان ەتىپ، ءبىزدىڭ اسكەرىمىزدىڭ دونباسستاعى العا جىلجۋىن ۋاقىتشا توقتاتىپ، اسكەري پوزيتسيامىزعا كوبىرەك تەحنيكا، اسكەردى توپتاستىرىپ الماق. بۇل قانداي ناتيجە بەرەدى؟ شىعىندى ارتتىرادى، بار بولعانى سول. الەمدە بارلىق ادام رەسەيدىڭ ۋاقىتشا ۇرىستى توقتاتۋدى نە ماقساتتا قولداناتىنىن جاقسى بىلەدى. ولار كەلەسى شابۋىلدى جاساۋ ءۇشىن عانا كەلىسىم سۇرايدى. سوعىس قاشان بىتەدى؟ سوعىس رەسەي اسكەرى ءوز ەركىمەن ءبىزدىڭ جەرنىمىزدەن كەتكەن ساتتە بىتەدى، نە ءبىز ولاردى قۋىپ شىعامىز".

زەلەنسكيدىڭ پىكىرىن ۋكراينا پرەزيدەنتىنىڭ وفيس باسشىسى ميحايل پودولياك جالعاپ: "رەسەي بۇل سوعىستا قانداي دا ءبىر گۋمانيستىك ارەكەتكە بارعان سىڭاي تانىتپاق. ولاردىڭ الدامشى ارەكەتىنە سەنىم جوق" ،- دەپ قىسقا قايىردى.

دونەتسك سەپاراتيستەرىنىڭ باسشىسى دەنيس پۋشيلين بولسا "ۇرىستى بىرجاقتى توقتاتامىز، الايدا ۋكراينا تاراپىنان شابۋىل بولسا وڭدىرمايمىز، ونىڭ ۇستىنە ءبىز ولاردى ناعىز پراۆوسلاۆ دەپ سانامايمىز" دەيدى.

ءسوزسىز بۇل ۋاقىتشا ۇقرىستى توقتاتۋ بۇيرىعىن رەسەي ءوزى دە ساقتامايدى. ال 36 ساعاتتىق تىرناقشا ىشىندەگى ۇرىستى توقتاتۋ ارەكەتىن، رەسەي بيلىگى پروپاگاندالىق ماقساتتا قولدانۋعا تىرىساتىن بولادى.

Abai.kz