اۆتوكراتيالىق بيلىكپەن اشىق كۇرەسكە تۇسكەن ساياساتكەرگە/جۋرناليستكە قاستاندىق جاسالسا، كۇدىك تەك بيلىككە تۇسەدى. «تەرگەۋسىز-اق» قاستاندىقتى بيلىك جاساعان قىسىم دەپ قابىلداۋ – نەگىزدى، ال ءجۋرناليستىڭ جەكە باسىنا قاتىستى نۇسقالار – نەگىزcىز.

ءوزىنىڭ قاستاندىققا قاتىسى جوق ەكەنىن دالەلدەۋ اۋىرتپالىعى اقوردانىڭ موينىندا. وپپونەنتتەرگە جاسالعان زيانكەستىككە جاۋاپتى بولۋ – اۆتوريتارلى بيلىك ءۇشىن تولەنەتىن قۇن. بۇلاي بولۋىن قالاماسا، اشىق، ءادىل بيلىك ورناتسىن.

بىراق ورنايدى دەگەن ءۇمىت جوق. دۇرىستاۋ ەلدە سەناتورلىققا ۇمىتكەرلەر سايلاۋ كەزىندە جۋرناليستكە، ءسوز بوستاندىعىنا جاسالعان قاستاندىقتى كۇن تارتىبىندەگى ءبىرىنشى تاقىرىپ ەتىپ ايتار ەدى. دىنىنە، ناسىلىنە، جىنىسىنا، ليفت تۋرالى پىكىرالۋاندىعىنا قاراماستان، ولار ءۇشىن ەركىندىك پەن ادىلەت – بىرىكتىرۋشى كونسەنسۋس. ال ءبىزدىڭ سەناتتا ءتىپتى بىرنەشە جۋرناليست، اقىن وتىر. ءبارى تىم-تىرىس.

ەگەر قانداي دا ءبىر ەلدىڭ جوعارعى پالاتاسىنا دەپۋتاتتاردى سايلاۋ تۋرالى جاڭالىق پەن تالقىلاۋ ليفتىدەگى ەكى جىگىتتىڭ شاڭىنا دا ىلەسە الماي، تاۋەلسىز جۋرناليستكە جاسالعان قاستاندىقتىڭ فونىندا قالىپ قوياتىن بولسا، وندا بۇل – پالاتانىڭ حالىققا كەرەكسىزدىگىنىڭ، ماڭىزسىزدىعىنىڭ، ال سايلاۋدىڭ مانسىزدىگىنىڭ عانا كورىنىسى. ولاردى دەپۋتات ەمەس، كورولدىڭ شاشباۋىن كوتەرەتىن لوردتار پالاتاسى دەۋ – الدەقايدا دالىرەك.

الىبەك نۇرعايىپوۆ

Abai.kz