پرەزيدەنت قاسىم-جومارت توقاەۆ وتكەن جىلى قازان ايىنىڭ ون بەسىندە «قازاقستان رەسپۋبليكاسىنىڭ اسكەري دوكتوريناسىن بەكىتۋ تۋرالى قازاقستان رەسپۋبليكاسى پرەزيدەنتىنىڭ 2017 جىلعى 29 قىركۇيەكتەگى  №554 جارلىعىنا وزگەرىستەر مەن تولىقتىرۋلار ەنگىزۋ تۋرالى» جارلىققا قول قويدى. وندا اسكەري ماقساتتاعى اقپاراتتاندىرك وبەكتىلەرىندە اقپاراتتى قورعاۋدىڭ قازىرگى زامانعى پرواكتيۆتى جۇيەسىن قالىپتاستىرۋعا باعىتتالعان تەحنيكالىق جانە كادرلىق الەۋەتتى دامىتۋ جونىندە جۇيەلى جۇمىستار جۇرەتىنى انىق جازىلعان.

پرەزيدەنت ايتقان، دوكتورينادا كورسەتىلگەن سول جۇمىستاردىڭ تياناقتى قولعا الىنىپ، ىسكە اسىپ جاتقانىنىڭ ناقتى ءبىر كورىنىسى – دەسانتتىق-شابۋىلداۋ اسكەرلەرىنىڭ بايلانىس پولكىندە قارۋلى كۇشتەردىڭ بايلانىسشىلارى اراسىنداعى جيىن مارەسىنە جەتتى. بۇل جيىنعا «بۇركىت» جاڭا تسيفرلىق ستانتسيالارىن زەردەلەۋ ءۇشىن قازاقستان اسكەرىنىڭ بايلانىس بولىمشەلەرى قىزمەتىنە كىرەتىن راديورەلەلىك بايلانىستىڭ 30-عا جۋىق مامانى قاتىستى.

ءتورت كۇن بويى وفيتسەرلەر مەن كەلىسىمشارت اسكەري قىزمەتشىلەرى تەوريادا جانە ءىس جۇزىندە ءار ءتۇرلى ماقساتتاعى راديورەلەلىك جەلىلەر مەن بايلانىس ارنالارىن ۇيىمداستىرۋعا ارنالعان «بۇركىت» ر-409متس ستانتسياسىنىڭ تاكتيكالىق-تەحنيكالىق سيپاتتامالارىن زەرتتەپ، زەردەلەدى.

اتالمىش بايلانىس ماشينالارى قارۋلى كۇشتەرگە 2023 جىلدىڭ قاڭتارىندا اكەلىندى. مامانداردىڭ ايتۋىنشا، بۇعان دەيىن راديورەلەلىك بايلانىستى راديورەلەلىك ستانتسيالاردىڭ كومەگىمەن قامتاماسىز ەتكەن. ەندى بايلانىسشىلار تسيفرلىق جابدىقتارمەن جۇمىس ىستەيتىن بولادى.

– جاڭا تسيفرلىق ستانتسيا دەرەكتەردى 40 شاقىرىمعا دەيىن قاشىقتىققا جىبەرۋ مۇمكىندىگىنە يە.  ونىڭ وتكىزۋ قابىلەتتىلىگى شەگىندە E1 جانە Ethernet اعىندارىنىڭ ترافيگىن يكەمدى قايتا ءبولۋ مۇمكىندىگى بار. «بۇركىت» ر-409متس قۇرالىنىڭ باستى ارتىقشىلىقتارىنىڭ ءبىرى – بەينەكونفەرەنتسيا بايلانىسىن ۇيىمداستىرۋ، سونداي-اق ونىڭ پارامەترلەرىن دەربەس كومپيۋتەر ارقىلى باقىلاۋ جانە باسقارۋ مۇمكىندىگى، – دەدى ستانتسيانىڭ قىزمەتى جايلى دەسانتتىق-شابۋىلداۋ اسكەرلەرى 16194 اسكەري ءبولىمى بايلانىس باتالونىنىڭ كومانديرى پودپولكوۆنيك ۆيكتور سەنچيلوۆ.

«بۇركىت» ر-409متس تسيفرلىق راديورەلەلىك ستانتسيالارى بيىل ناۋرىز ايىندا وتەتىن «باتىل تويتارىس» وقۋ-جاتتىعۋىندا ءىس جۇزىندە قولدانىلادى. وقۋ-جاتتىعۋ بارىسىندا بايلانىسشىلار سونداي-اق بايلانىستى ۇيىمداستىرۋدىڭ جاڭا ۇلگىلەرىن دە سىناپ كورمەك.

اسكەري سالانى زامانيلاستىرۋ، ساندىقتەحنولوگيامەن قامتاماسىز ەتۋ زامان تالابى ەكەنى انىق. «بۇركىت» ر-409متس تسيفرلىق راديورەلەلىك ستانتسيالارىن ساتىپ الىپ، قولدانىسقا ەنگىزۋ سونداي قادامنىڭ باسى ەكەنى بەلگىلى. الداعى ۋاقىتتا ونىڭ قولدانىس اياسىن كەڭەيتىپ، جاڭا ءورىسىن اشۋ جۇمىسى جالعاسىن تاۋىپ، جاڭا ۇلگىلەرمەن تولىعا بەرەتىنى ءسوزسىز.

Abai.kz