سەنىمنەن ايرىلعان پوليتسەيلەر حالىققا قورعان بولا ما؟
جاۋابىنان سۇراعى كوپ ۇكىم
سەنىمنەن ايرىلعان پوليتسەيلەر حالىققا قورعان بولا ما؟
وتكەن جىلى بۇزاقىلىق ارەكەت جاساعان ءىىم-ءنىڭ بۇرىنعى قىزمەتكەرى داۋرەن ازىمباەۆتى قۇرىقتاۋ كەزىندە قارۋ قولدانعان قالالىق ىشكى ىستەر دەپارتامەنتى پاترۋل-بەكەت قىزمەتىنىڭ قىزمەتكەرى مۇرات ءابىروۆ جەتى جىلعا سوتتالدى. سوت «بيلiكتi نە قىزمەتتiك وكiلەتتiكتi اسىرا پايدالانۋ» بابى بويىنشا ءتارتىپ ساقشىسىنىڭ كىناسى تولىق دالەلدەندى دەپ شەشتى. الايدا پوليتسەيدىڭ ارىپتەستەرى، تۋىسقاندارى جانە ادۆوكاتى مۇنداي ۇكىممەن كەلىسپەيتىندىگىن ءبىلدىردى. ولاردىڭ ويىنشا، تەرگەۋ دە، سوت تا تەك ايىپتاۋشى باعىتتا جۇرگىزىلگەن. سوندىقتان اتالمىش ۇكىم بايىپتى ۇيعارىمعا قاراعاندا، جاۋابىنان سۇراعى كوپ شەشىم ىسپەتتى.
جاۋابىنان سۇراعى كوپ ۇكىم
سەنىمنەن ايرىلعان پوليتسەيلەر حالىققا قورعان بولا ما؟
وتكەن جىلى بۇزاقىلىق ارەكەت جاساعان ءىىم-ءنىڭ بۇرىنعى قىزمەتكەرى داۋرەن ازىمباەۆتى قۇرىقتاۋ كەزىندە قارۋ قولدانعان قالالىق ىشكى ىستەر دەپارتامەنتى پاترۋل-بەكەت قىزمەتىنىڭ قىزمەتكەرى مۇرات ءابىروۆ جەتى جىلعا سوتتالدى. سوت «بيلiكتi نە قىزمەتتiك وكiلەتتiكتi اسىرا پايدالانۋ» بابى بويىنشا ءتارتىپ ساقشىسىنىڭ كىناسى تولىق دالەلدەندى دەپ شەشتى. الايدا پوليتسەيدىڭ ارىپتەستەرى، تۋىسقاندارى جانە ادۆوكاتى مۇنداي ۇكىممەن كەلىسپەيتىندىگىن ءبىلدىردى. ولاردىڭ ويىنشا، تەرگەۋ دە، سوت تا تەك ايىپتاۋشى باعىتتا جۇرگىزىلگەن. سوندىقتان اتالمىش ۇكىم بايىپتى ۇيعارىمعا قاراعاندا، جاۋابىنان سۇراعى كوپ شەشىم ىسپەتتى.
ەستەرىڭىزگە سالا كەتسەك، وتكەن جىلعى 18 شىلدەدە الماتى قالاسىنىڭ مەدەۋ اۋدانىندا «بۋران 127» پاترۋل ەكيپاجى شاقىرۋ بويىنشا زەنكوۆا كوشەسىنە كەلەدى. تەلەفون شالۋشىنىڭ ايتۋىنشا، مۇندا بۇزاقىلىق ورىن العان ەكەن. ارىزدانۋشىنىڭ سوزىنە قاراعاندا، بەيتانىس ەر ادام ونى ۇرىپ-سوعىپ، بەس ايلىق بالاسى جاتقان كولياسكانى تارتىپ الماقشى بولىپتى. وقيعا ورنىنا كەلگەن ءتارتىپ ساقشىلارى بۇزاقىنى بىردەن تانيدى دا، ونى قۇرىقتاماقشى بولادى. الايدا باسبۇزار وڭايلىقپەن بەرىلمەيدى. وقيعا سوڭىنان الماتى قالالىق ءىىد-ءنىڭ ءباسپاسوز قىزمەتى حابارلاعانداي، قويان-قولتىق ۇرىستان سپورت شەبەرى، ءىىم-ءنىڭ بۇرىنعى قىزمەتكەرى، پاتريوتتار پارتياسىنىڭ بەلسەندىسى داۋرەن ازىمباەۆ الدىمەن ءبىر پوليتسەيدى ۇرىپ ەسىنەن تاندىرادى، سودان كەيىن مۇرات ءابىروۆتى بىرنەشە رەت پىشاقپەن ۇرادى. ءۇش سوققى برونەجيلەتكە تيسە، ءتورتىنشى سوققى اياققا تيەدى. وسىدان كەيىن ءتارتىپ ساقشىسى قارۋ قولدانادى. وق ازىمباەۆتىڭ باسىنا ءتيىپ، سونىڭ سالدارىنان ول كەيىن قازا بولدى. سول كۇنى داۋرەن ازىمباەۆقا قاتىستى قىلمىستىق كودەكستىڭ بىرنەشە بابى بويىنشا قىلمىستىق ءىس قوزعالادى.
ءتورت ايعا سوزىلعان تياناقتى تەكسەرۋدەن كەيىن، 2012 جىلعى قاراشانىڭ ورتاسىندا الماتى قالاسى ءىىد تەرگەۋ باسقارماسىنىڭ قوعامدىق قاۋىپسىزدىككە قارسى قىلمىستاردى تەرگەۋ ءبولىمى كەلەسى مازمۇنداعى قاۋلى قابىلدايدى: «...ازىمباەۆتىڭ كىناسى تولىق كولەمدە دالەلدەندى. الايدا ونىڭ قازا بولعانىنا بايلانىستى، قىلمىستىق ءىس قىسقارتىلۋعا جاتادى». وسىمەن تەكسەرۋلەر اياقتالعانداي ەدى. الايدا، كەيىن بەلگىلى بولعانداي، ءتارتىپ ساقشىسى مۇرات ءابىروۆ ءۇشىن ءبارى سول كەزدە باستالادى. پروكۋراتۋرا پوليتسەيلەردىڭ قورىتىندىسىمەن كەلىسپەيدى، ءسويتىپ، ءىستى قوسىمشا تەرگەۋگە جولدايدى. ءبىر عاجابى لاۋازىمدىق قىلمىستاردى تەرگەۋمەن اينالىساتىن ارنايى پروكۋراتۋراعا جىبەرەدى.
مىنە، وسى ساتتەن باستاپ مۇرات ءابىروۆتىڭ ءومىرى كۇرت وزگەردى. ەندى پىشاق جاراقاتىن العان ءتارتىپ ساقشىسى زابىرلەنۋشىدەن كۇدىكتى ساناتىنا اۋىستىرىلىپ، ەشقايدا كەتپەيتىنى تۋرالى قولحات بەرۋگە ءماجبۇر بولادى. بەلگىسىز كۋاگەرلەر مۇرات ابىروۆكە قاتىستى قىلمىستىق ءىس بويىنشا تەرگەۋ ۇستىمىزدەگى جىلعى قاڭتاردا اياقتالىپ، سوتقا جىبەرىلەدى. مىنە، وسى كەزدە ادۆوكات ەركىن نۇرعاليەۆتىڭ ايتۋىنشا، ءتۇرلى كەرەمەتتەر باستالدى. الدىمەن قىلمىستىق ىستە بولماعان كۋاگەرلەر پايدا بولدى. زاڭگەر ولاردىڭ قايدان شىققانىن بىلمەيدى. ويتكەنى وقيعا ورنىندا جۇمىس ىستەگەندە نە قالالىق ءىىد-ءنىڭ، نە اۋداندىق ءىىب-ءنىڭ جەدەل-تەرگەۋ توپتارى، نە پروكۋراتۋرانىڭ وكىلدەرى ول ادامداردى كەزىكتىرمەگەن. ول از بولعانداي، كۋاگەرلەردىڭ ەكەۋى عانا سوتقا قاتىستى. ادۆوكاتتىڭ ايتۋىنشا، ولاردىڭ بەرگەن تۇسىنىكتەمەسى دە ۇنەمى وزگەرىپ وتىرعان. - كۋاگەرلەردىڭ ءبىرى وقيعا بولعان ۋاقىتتى دۇرىس كورسەتە الماعان، الدىمەن ءبىر ۋاقىتتى ايتسا، ارتىنشا باسقا مەزگىلدى كورسەتتى، - دەيدى قورعاۋشى ەركىن نۇرعاليەۆ. - ودان كەيىن ول كوشەنىڭ قاراڭعى بولعانىن، بىراق 15 مەتر قاشىقتىقتان وق اتىلعاننان كەيىن ادامنىڭ قۇلاعانىن كورگەنىن ايتادى. ال شىن مانىندە، ول وقيعا ورنىنان 30 مەتردەن قاشىق جەردە بولعان ەكەن، جارىق بولماعاندىقتان ونىڭ ءبىر نارسەنى كورۋى مۇمكىن ەمەس بولىپ شىقتى. وسىنداي ساتتەر كوپ. بىراق سوت ولاردى نازارعا المادى. ال بارلىق كۇماندى دەرەكتەر زاڭ بويىنشا مەنىڭ قورعاۋىمداعى تۇلعانىڭ پايداسىنا شەشىلۋى ءتيىس بولاتىن.
باسقا ەكى كۋاگەر سوتقا مۇلدەم قاتىسپادى. ال ولاردىڭ پروتسەسسكە قاتىسۋىن كىنالاۋشى تاراپ، ياعني پروكۋراتۋرا قامتاماسىز ەتۋى كەرەك ەدى. ايتپاقشى، ولاردىڭ بىرەۋى كامەلەتكە تولماعان تۇلعا وقيعانى كورمەگەن، بىراق وق اتىلعاننان كەيىنگىنى كورگەن، ا ەكىنشىسى - «قۇپيالى كۋاگەر». قىلمىستىق ءىس ماتەريالدارىندا ول «الەكسەي» دەگەن بۇركەنشىك اتپەن كورسەتىلگەن. - ءبىز ونداي كۋاگەردىڭ بار ەكەندىگىنە كۇماندىمىز، - دەدى اڭگىمەسىن جالعاستىرعان ەركىن نۇرعاليەۆ. - زاڭ بويىنشا ول ادام ءوزىنىڭ قاۋىپسىزدىگىن قامتاماسىز ەتۋدىڭ قاجەتتىگى جونىندە ءوتىنىش جازۋ كەرەك بولاتىن، ودان كەيىن تەرگەۋ ءتيىستى قاۋلى قابىلداۋى ءتيىس. بىراق قىلمىستىق ءىستىڭ ماتەريالدارىندا ول جوق. سۋديا زاڭدا كورسەتىلگەن وسى نورمالاردى نازارعا الماي، سول «الەكسەيدىڭ» سوتقا قاتىسۋىن تالاپ ەتپەي، ودان ءوزى تىكەلەي جاۋاپ الماي، تەك ونىڭ جاۋابىن وقۋمەن شەتەلدى. بۇدان تىس، سوت بارىسىندا «الەكسەي» اتتى انونيم كۋاگەردىڭ شىندىققا جاناسپايتىنداي جاۋاپ بەرگەنى انىقتالدى. ارنايى پروكۋراتۋراعا بەرگەن جاۋابىندا ول وقيعادان كەيىن «جەدەل جاردەم» كەلگەنشە وقيعا ورنىندا بولعانىن جانە ازىمباەۆقا كومەك كورسەتۋگە تىرىسقانىن جەتكىزگەن. الايدا سول كۇنى «جەدەل جاردەم» ەكيپاجىنىڭ قۇرامىندا بولعان مەيىربيكە سوت پروتسەسىندە بەرگەن جاۋابىندا وقيعا ورنىندا ازىمباەۆ پەن پوليتسەيلەردەن باسقا ەشكىمنىڭ بولماعانىن ايتىپ، ونىڭ ءسوزىن جوققا شىعاردى. تەرگەۋدىڭ كەلەڭسىزدىكتەرى
كۋاگەرلەرمەن بولعان كەلەڭسىزدىكتەر سۋديا نازارعا ىلمەگەن جالعىز جايت بولمادى. مۇرات ءابىروۆتىڭ قورعاۋشىسى جولداعان قولداۋحاتتاردىڭ ەشقايسىسىن سۋديا قابىل المادى جانە ونىڭ سەبەپتەرىنە تۇسىنىك بەرۋدى قاجەت دەپ سانامادى. ماسەلەن، سۋديا، ءتىپتى، بۇزاقىلىق فاكتىسى بويىنشا «02» تەلەفون شالعان كۋاگەر التىنبەكوۆتى شاقىرۋعا دا كەلىسىم بەرمەدى. ويتكەنى ونىڭ جاۋابى سول كەشتە ازىمباەۆتىڭ اشۋلى بولعانىن انىقتاعان. جاۋاپ بەرۋ بارىسىندا تەلەفون شالۋشى قازا بولعان ازاماتتىڭ الدىمەن ءوزىن ۇرعانىن ودان كەيىن بەس ايلىق ءسابي جاتقان كولياسكانى تەپكىلەي باستاعانىن، ال ودان كەيىن ءسابيدى تارتىپ الىپ، اكەسىن بالاسىنا جولاتپاعانىن ايتقان. سونداي-اق سوت ءبىر قاتار ساراپتامالار: ولىمنەن كەيىنگى پسيحولوگيالىق جانە ناركولوگيالىق، ەڭ باستىسى بالليستيكالىق (!) ساراپتاما تاعايىنداۋدان باس تارتقان. - ال سول بالليستيكالىق ساراپتاما كوپ نارسەنىڭ باسىن اشۋشى ەدى، - دەيدى مۇرات ءابىروۆتىڭ ادۆوكاتى. - ويتكەنى وقتىڭ قانداي قاشىقتىقتان اتىلعانى شىنايى انىقتالماعان. بىرەۋ ەكى مەتر دەسە، ەكىنشىسى - بەس مەتر دەيدى. وق زابىرلەنۋشىنىڭ باسىنا سولدان وڭعا تومەننەن جوعارى قاراي كىرگەن. ياعني، ءابىروۆ دايىندالىپ، تىك اتپاعان، ول دايىندىقسىز اتقان. ەسەسىنە، قازا بولعان ازىمباەۆتىڭ دەنەسىنەن تابىلعان 25 گەماتوما سۋديانى قاتتى قىزىقتىردى. الايدا كۋاگەرلەر بارلىق وقيعانىڭ كوز ىلەسپەس ساتتە، نەبارى 7-8 سەكۋندتىڭ ىشىندە بولعانىن ايتتى. ال وسىنداي ۋاقىتتىڭ ىشىندە تالاي الاساپىراندى باسىنان وتكەرگەن قويان-قولتىق ۇرىستىڭ حاس شەبەرىنە، ارنايى جاساقتىڭ باپكەرىنە 25 ەلەۋلى سوققى جاساۋ مۇمكىن بە؟ بۇل ماسەلە ءابىروۆتىڭ قورعاۋشىسىن دا مازالاعان ەدى. وسى جاعدايدى ارنايى تەكسەرگەن ادۆوكات، سوتقا ءوز تەكسەرۋىنىڭ قورىتىندىسىن ۇسىندى. سويتسەك، وقيعا بولاردان بۇرىن ازىمباەۆ كافەدە بولعان ەكەن. ول جەردەن ول ماساڭ كۇيدە شىققان، بۇل، زاڭگەردىڭ ايتۋىنشا دالەلدەنگەن فاكتى. كافەدەن شىققان ساتتەن (بەينەجازبا بار) ءتارتىپ ساقشىلارىمەن كەزدەسكەنگە دەيىن 38 مينۋت وتكەن. ال وسى ۋاقىت ىشىندە قانداي وقيعا بولعانى بەيمالىم.
- جالپى، مۇنى مەن ەمەس، تەرگەۋ انىقتاۋ كەرەك بولاتىن، - دەيدى ءسوزىن جالعاستىرعان ادۆوكات. - بىراق ەشكىم مۇنى ىستەگەن جوق. دەگەنمەن ازىمباەۆتىڭ ازاماتتىق ايەلىنىڭ سوزىنەن ونىڭ كافەدەن ۇيگە ىزالى كۇيدە كەلگەنى بەلگىلى بولدى، ءتىپتى، اياعىنا ورالعان مىسىقتى تەۋىپ جىبەرىپ، بىرەۋمەن توبەلەسىپ قالعانىن ايتقان، ءسويتىپ، ءبىراز ۋاقىتتان كەيىن قايتادان دالاعا شىققان. سول كەزدە سابيىمەن سەرۋەندەپ جۇرگەن التىنبەكوۆپەن كەزىككەن. ءبىزدىڭ جورامالىمىز بويىنشا، كافەدەن شىققان ازىمباەۆ كوشەدە بەلگىسىز بىرەۋلەرمەن سوقتىعىسىپ قالىپ، اتالمىش جاراقاتتاردى سول قاقتىعىستىڭ بارىسىندا الۋى ابدەن مۇمكىن، تەرگەۋ وسى ماسەلەنى انىقتاۋعا مىندەتتى بولاتىن. بىراق قۇزىرەتتى ورگان قازا بولعان تۇلعانىڭ جاراقات الۋ فاكتىسى بويىنشا قوزعالعان ءىستىڭ جەكە وندىرىسكە بولىنەتىنىن كولدەنەڭ تارتۋمەن شەكتەلدى. بىراق زاڭگەر، ەندى ول ۋادەنىڭ ءسوز جۇزىندە قالاتىندىعىن جورامالداپ وتىر. ايتپەسە، جەتى جىلعا سوتتالعان ءابىروۆتى قايتەدى؟ سوت پەن تەرگەۋدىڭ ءوز قاتەلەرىن مويىنداۋدى ۇناتپايتىندىعى بارشاعا بەلگىلى ەمەس پە. - تاعى ءبىر اتاپ ايتارلىق ءجايت، ازىمباەۆقا قارسى قوزعالعان قىلمىستىق ىستەر ابىروۆكە قارسى بيلiكتi نە قىزمەتتiك وكiلەتتiكتi اسىرا پايدالانۋ بابىمەن قوزعالعان قىلمىستىق ءىس ءبىر-بىرىمەن تىعىز بايلانىستى، - دەيدى اڭگىمەسىن جالعاستىرعان ەركىن نۇرعاليەۆ. - ياعني، ازىمباەۆتىڭ كىناسىن انىقتاماعان سوت ابىروۆكە قاتىستى ءىستى قاراماۋى كەرەك ەدى. بىراق ونى ەشكىم ەسكەرمەدى. سونىڭ سالدارىنان مەنىڭ قورعاۋىمداعى تۇلعا زاڭسىز سوتتالىپ وتىر.
كۇمان تۋدىرعان ۇكىم
سونىمەن، ءتارتىپ ساقشىسىنىڭ قورعاۋشىسى ۇسىنعان فاكتىلەر تەرگەۋدىڭ ساپاسىز جۇرگىزىلىپ، ماڭىزدى سۇراقتاردىڭ باسىم كوپشىلىگىنە جاۋاپ بەرىلمەگەنىن كورسەتكەنىنە قاراماستان، سوت ۇكىم شىعاردى. ءسويتىپ، مۇرات ءابىروۆ قر قك 308 بابىنىڭ 4 ءبولىمى (بيلiكتi نە قىزمەتتiك وكiلەتتiكتi اسىرا پايدالانۋ) بويىنشا كىنالى دەپ تانىلىپ، ونىڭ مۇلكى تاركىلەنىپ، جەتi جىلعا دەيiنگi مەرزiمگە باس بوستاندىعىنان ايىرۋ جونىندەگى جازا تاعايىندالدى. مۇلىكتى تاركىلەۋ ماسەلەسى كوپتەگەن سۇراقتار تۋىنداتتى. ءيا، 308-باپتىڭ ءبولىمنىڭ «ۆ» تارماقشاسىندا شىن مانىندە، كەلەسى انىقتاما بار، ەگەر قىلمىس «...ءوزi نەمەسە باسقا ادامدار نەمەسە ۇيىمدار ءۇشiن پايدا مەن ارتىقشىلىق الۋ نە باسقا ادامدارعا نەمەسە ۇيىمدارعا زيان كەلتiرۋ ماقساتىندا جاسالسا...»، مۇلىكتى تاركىلەۋ پايدالانىلۋى مۇمكىن. بىراق بۇل ءۇشىن ايىپتالۋشىدا قىلمىس جاساۋ جونىدەگى پيعىل بولۋ كەرەك. ال قىزمەتتە ءجۇرىپ، وقيعا ورنىنا شاقىرۋ بويىنشا كەلگەن سەرجانت ءابىروۆ ازىمباەۆتىڭ ولىمىنەن قانداي ماتەريالدىق پايدا نەمەسە ارتىقشىلىق الۋشى ەدى؟ سوتتىڭ قاتال بولعاندىعىن سوت زالىندا ايىپتالۋشىنىڭ كىناسىن جۇمسارتۋعا باعىتتالعان ءبىر اۋىز جىلى ءسوزدىڭ ايتىلماۋى دا دالەلدەيدى. ادۆوكاتتىڭ ايتۋىنشا، مۇرات ءابىروۆ ىشكى ىستەر ورگاندارىندا ون جىلدان استام قىزمەت اتقارعان، وسى مەرزىمدە بىردە ءبىر تارتىپتىك جازا الماپتى. جاقىندا مەدالمەن ماراپاتالعان. جۋىردا وتكەن اتتەستاتسيا بارىسىندا جاقسى ناتيجە كورسەتكەن. ءتىپتى، 2011 جىلى جول-كولىك اپاتى سالدارىنان اۋىر جاراقات العان مۇرات ءابىروۆتىڭ جۇبايى مەن كىشكەنە بالاسىنىڭ اۋىر حالدە ەكەنى دە سۋديانىڭ جۇرەگىن جىبىتپەدى. جۇبايىنىڭ باس سۇيەگى ترەپاناتسيالانعان. ءبۇلدىرشىننىڭ دە دەنساۋلىعى كوڭىل الاڭداتادى. ەندى ولارعا قامقور، سۇيەنىش بولاتىن جالعىز ادام - پوليتسەيدىڭ ەگدە اناسى. - جالپى، ايىپتالۋشىنىڭ تۇلعاسىن زەردەلەۋ، ول تۋرالى پىكىردى جانە مىنەزدەمەلەردى زەرتتەۋ - تەرگەۋدىڭ مىندەتى. ەگەر وسى ماسەلەلەر زەرتتەلگەندە، ءابىروۆتىڭ قاساقانا كىسى ولتىرۋگە قابىلەتتى ەمەس ەكەنى انىق بولۋشى ەدى، - دەيدى ءسوزىن تامامداعان ادۆوكات. سەنىمنەن ايرىلعان
ءتارتىپ ساقشىلارى...
مۇرات ابىروۆكە قارسى قوزعالعان ءىستىڭ تەرگەۋى، ودان كەيىن شىعارىلعان ۇكىم قوعامدا ۇلكەن رەزونانس تۋدىردى. ەڭ الدىمەن سوتتالعان پوليتسەيدىڭ ارىپتەستەرىنىڭ اراسىندا.
- ءبىز ەندى قىزمەتكە شىققاندا كوپشىلىك تۇگىل ءوزىمىزدى قورعاۋعا دا قۇقىعىمىز جوق ەكەندىگىن تۇسىندىك، - دەيدى الماتى قالالىق ءىىد پاترۋل پوليتسياسى پولكىنىڭ قىزمەتكەرلەرى. - قارۋدى ەسكەرتۋسىز قولدانۋعا مۇمكىندىك بەرەتىن زاڭعا ەنگىزىلگەن تۇزەتۋلەردىڭ قاجەتى قانشا؟ ول نەنى وزگەرتەدى؟ مۇراتپەن بولعان جاعداي سونداي احۋالدىڭ ءبىزدىڭ ارقايسىمىزدىڭ باسىمىزعا ءتۇسۋى مۇمكىن ەكەندىگىن كورسەتتى. سەن كىنالىسىڭ بە، جوق پا؟ وعان قاراپ جاتقان ەشكىم جوق. قاجەت بولسا، كەز كەلگەنىمىزدى تەمىر توردىڭ ار جاعىنا توعىتىپ جىبەرەدى. سوت ۇكىمى الماتى قالاسى ءىىد-ءنىڭ بۇرىنعى قىزمەتكەرى، اتى اڭىزعا اينالعان جەدەل وكىلەتى ۋاكىل، كوپ جىلدار قاراقشىلىقتار مەن توناۋشىلىقتاردى اشۋ جونىندەگى باسقارمانى باسقارعان ولەگ ماحروۆتى دا تاڭ قالدىردى. - شىنىمدى ايتايىن، قازىر جاس كەزىمدە ءدال وسىنداي وقيعا كەزىندە قارۋ قولدانباعانىما وكىنەمىن. ول كەزدە مەن كەۋدەمنەن جاراقات الىپ، ادام سەنبەس جاعدايدا امان قالدىم، - دەيدى ول. - ال قازىر ورگاننان كەتكەن كەزدە، مەن كىمگە كەرەكپىن؟ مۆد-عا ما؟ جوق. اۋرۋحانالارعا ما؟ تاعى جوق. ەڭ قورقىنىشتىسى وسى. قازىر ول سەرجانتتان بارلىعى باس تارتتى: دوستارى، باسشىلىق، مۆد، ەڭ باستىسى زاڭ تەرىس اينالدى. قازىر ادۆوكاتتىڭ ايتۋى بويىنشا، مۇرات ءابىروۆ ومىردەن تۇڭىلگەن دەپرەسسيالىق جاعدايدا، ەشكىمگە سەنبەيدى. الايدا زاڭگەر ءتارتىپ ساقشىسىن بۇدان ارى دا بارلىق ينستانتسيالاردا قورعاۋعا دايىن، قاجەت بولسا، ونىمەن بىرگە سوڭىنا دەيىن بارۋعا بەلىن بەكەم بۋعان. ال ازىرشە، قوعامدى «سەنىمنەن ايرىلعان پوليتسەيلەر قالاداعى قوعامدىق ءتارتىپتى قالاي قامتاماسىز ەتەدى؟» دەگەن سۇراق مازالايدى. بۇعان قازاقستان پاتريوتتارىنىڭ كوشباسشىسى، سەناتور عاني قاسىموۆ مىرزا نە دەر ەكەن؟
قايرات ماترەكوۆ الماتى
«تۇركىستان» گازەتى
