بولاشاقتا رەسەي اگرەسسياسىنا تويتارىس بەرۋ ءۇشىن ناتو-نىڭ قوسىمشا اسكەرلەرى مەن قارۋدىڭ جاڭا تۇرلەرى بالتىق جاعالاۋى ەلدەرىنە ورنالاستىرىلىپ جاتىر. بۇل تۋرالى لاتۆيانىڭ ەكس-پرەزيدەنتى ۆالديس زاتلەرس Haqqin.az باسىلىمىنا بەرگەن سۇحباتىندا ايتتى.

«رەسەي ۋكراينانى باسىپ الۋمەن عانا شەكتەلمەيدى. ول بالتىق ەلدەرىنە دە شابۋىل جاساۋدى كوزدەيدى دەگەن بولجامعا گەرمانيا، فرانتسيا جانە باسقا دا ەۋروپا ەلدەرى سەنەدى»، - دەدى لاتۆيانىڭ ەكس-پرەزيدەنتى.

ۆالديس زاتلەرستىڭ ايتۋىنشا، كرەملدىڭ يادرولىق بوپساسى يادرولىق قارۋدى قولدانۋدىڭ اسكەري پايداسىن تۇبەگەيلى قايتا قاراۋعا اكەلدى.

«وسى ۋاقىتقا دەيىن يادرولىق قارۋ ەشبىر سوعىستا قولدانىلعان جوق. ءتىپتى حيروسيما مەن ناگاساكيگە تاستالعان بومبا دا سوعىستان گورى، قورقىتۋ ارەكەتى ەدى. قازىر اتوم قارۋى قورقىتۋ قۇرالىنا، پسيحولوگيالىق فاكتورعا اينالدى، بىراق ونى ءىس جۇزىندە قولدانۋ مۇمكىن ەمەس. يادرولىق قارۋدى قولدانۋ – بۇل سۋيتسيد، ەشكىم مۇنداي قادامعا بارمايدى. مەن چەرنوبلگە بارىپ كوردىم. رادياتسيامەن بۇلىنگەن اۋماقتىڭ قانداي بولاتىنىن بىلەمىن. يادرولىق قارۋ قولدانعاننان كەيىنگى زاردابى شەكسىز. سوندىقتان رەسەيدىكى باتىستى قورقىتىپ، پسيحولوگيالىق قىسىم جاساۋ عانا»، - دەدى ول.

لاتۆيانىڭ بۇرىنعى پرەزيدەنتى ۋكراينا اسكەرى 2014 جىلعا قاراي ەلدىڭ شەكاراسىن قالپىنا كەلتىرگەندە، سوعىس توقتايدى دەپ ەسەپتەيدى. وعان دەيىن رەسەي تىنبايدى. رەسەيدى تىنىشتالدىرۋ ءۇشىن وعان دونباستى بەرە سالۋ دۇرىس شەشىم ەمەس. ويتكەنى مۇنداي شەشىم، كەرىسىنشە، اگرەسسوردىڭ ارانىن اشا تۇسەدى.

«بولاشاقتا ەۋروپا، اقش، ءۇندىستان جانە قىتاي قارۋ-جاراقتى باقىلاۋدىڭ قانداي دا ءبىر ەرەجەلەرى تۋرالى كەلىسۋى كەرەك»، - دەدى ۆالديس زاتلەرس.

كەرىمسال جۇباتقانوۆ

Abai.kz