قاراعاندى وبلىسىنىڭ پوليتسەيلەرى تەمىرتاۋ مەكتەپتەرىندە جارىلعىش زات بار دەپ حابارلاعان بەلگىسىز ازامات ىزدەستىرىپ جاتىر.

تەمىرتاۋداعى № 27 مەكتەپتىڭ ەلەكتروندى پوشتاسىنا بەلگىسىز ادامنان عيماراتتا مينا بار دەگەن حابارلاما كەلگەن. ول ءوزىن «پراۆوسلاۆ قازاق»، «اللانىڭ ساربازى» دەپ اتاعان جانە «بۇگىن بارلىق مەكتەپتەر مەن بالاباقشالارعا شاحيدتەر مىلتىقپەن كەلەدى» دەپ جازعان.

اتالمىش حابارلاماعا بايلانىستى تەمىرتاۋ قالاسىندا بارلىق مەكتەپتەر مەن بالاباقشالار تەكسەرىلدى. ەش جەردەن جارىلعىش زات تابىلعان جوق.

«اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 273-بابىنا سايكەس قىلمىستىق ءىس قوزعالدى. قازىرگى ۋاقىتتا پوليتسيا قىزمەتكەرلەرى كۇدىكتىنى انىقتاۋ بويىنشا كەشەندى جەدەل-ىزدەستىرۋ ءىس-شارالارىن جۇرگىزىپ جاتىر»، - دەپ مالىمدەدى قاراعاندى وبلىسىنىڭ پد ءباسپاسوز قىزمەتى.

Abai.kz