قازىر ءبىزدىڭ ەلدە بۋكمەكەرلىك كەڭسەلەر مەن لوتو-كلۋب سەكىلدى ورىندارعا بارىپ، قوماقتى اقشانى باسكە تىگىپ، جەڭىل جولمەن بايىپ كەتۋدى ارمانداعان ادامداردىڭ كوبەيىپ كەتكەندىگى انىق بايقالادى.

الماتى قالاسىنداعى پسيحولوگيالىق وڭالتۋ ورتالىعىنىڭ پسيحولوگى ايدوس يبراگيمنىڭ ايتۋىنا قاراعاندا، مۇنداي ادامداردى قاتتى اۋرۋلار قاتارىنا جاتقىزۋعا ابدەن بولاتىن كورىنەدى. مۇنىڭ اسقىنىپ كەتكەنى سونشالىق، قازىر اتالمىش ورتالىقتا مۇندايلاردى ەمدەيتىن بوس ورىن دا قالماپتى. ال ەمدەۋ پروتسەسى تىم ۇزاققا سوزىلىپ، دۇرىس ناتيجە شىعۋىنا ەشكىم دە كەپىلدىك بەرمەيدى.

ال ەندى مۇنداي ويىندارعا قۇمار جانداردىڭ ەسى كەتكەنى سونشالىقتى، ماڭداي تەرمەن كەلگەن اقشانى قالايشا دالاعا شاشىپ جاتقاندىعىنا مۇلدەم ەسەپ بەرمەيدى ەكەن. ايدوستىڭ ايتۋىنشا، ولار ورتا ەسەپپەن 20-30 ميلليون تەڭگەنى الگىندەي كەڭسەلەرگە ىڭ-شىڭسىز بەرە سالاتىن كورىنەدى. بىرەۋ ءتىپتى، 500 مىڭ دوللارعا دەيىنگى اقشانى دا ۇتقىزىپ جىبەرگەن.

جالپى، مۇنداي ويىن قۇمارلىق ىشىمدىككە، ءتىپتى، ەسىرتكىگە قۇمارلىقتان دا جامان ەكەندىگى الدەقاشان دالەلدەنگەن. مۇندايلار «انە، ۇتامىن، مىنە، ۇتامىن» دەگەن ەسەك دامەمەن ءومىر سۇرەدى. ءسويتىپ، ەرەن بايلىققا كەنەلمەگەنىمەن، جاپ-جاقسى ءومىر ءسۇرۋدى ارمان ەتەدى. سوسىن وسى جالعان ءۇمىتىنىڭ سوڭىندا ءومىرىن وتكىزەدى. ءبىر جامان جەرى، ولاردىڭ ويىن قۇمارلىققا تاۋەلدى بولعانى سونشالىقتى، ناشاقور سەكىلدى كەز-كەلگەن ۇرلىققا بارۋعا دايىن. ءتىپتى، ۇيىندەگى دۇنيە-مۇلكىن، ونى از دەسەڭىز ءتىپتى باسىنداعى جالعىز باسپاناسىن دا ساتىپ جىبەرەدى.

بۇل قاۋىپتى قۇبىلىستىڭ كەڭ ەتەك جايىپ كەتۋىنىڭ ءبىر سەبەبى - ەلىمىزگە بەلگىلى ادامدارىنىڭ الگىندەي بۋكمەكەرلىك كەڭسەلەردى جارنامالاۋىندا جاتقاندىعىنان. ايدوستىڭ پىكىرىنشە، بۇعان اڭقاۋ دە سەنگىش ادامدار يمانداي يلانىپ قالادى. ونىڭ اياعى ميلليونلاعان اقشاسىن ايدالاعا شاشىپ، وتباسىنىڭ وراسان زارداپ شەگۋىنە اكەلىپ سوعادى. وعان الگىندەي جارناماشىلداردىڭ ءتىپتى دە، جانى اشىپ جۇرگەندىگى بايقالمايلى. ال وزگەسى-وزگە، اتى الەمگە جايىلىپ كەتكەن، «گرەممي» سىيلىعىنىڭ لاۋرەاتى، حالقىمىزدىڭ ماقتانىشىنا اينالعان دەرلىكتەي يمانبەكتىڭ دە وسىنداي كۇماندى ىستەرمەن اينالىسىپ جۇرگەندىگىن نەمەن تۇسىندىرۋگە بولادى؟

پسيحولوگ وسىندايلاردى ايتىپ، قينالادى. ءبىز دە يمانبەكتىڭ بۇل قىلىعىن تۇسىنە المادىق. ءسىرا داعى، اتاق پەن بايلىقتى ەكىنىڭ ءبىرى كوتەرە المايتىن شىعار.

جايبەرگەن بولاتوۆ

Abai.kz