كاسىپورىن قىزمەتكەرلەرى ۇندەۋدە جاريا ەتىلگەن كەي اقپارات شىندىققا مۇلدەم جاناسپايتىنىن مالىمدەدى.

- بەينەۇندەۋدە جوندەۋ جۇمىستارىن ءتيىستى دەڭگەيدە جۇرگىزۋگە قاتىستى تەرىس اقپارات كەلتىرىلدى. سونداي-اق جوندەۋ زاۋىتى قىزمەتكەرلەرىنىڭ كاسىبي بىلىكتىلىگى سىنعا ىلىگىپ، دايەكسىز اقپاراتقا جول بەرىلدى. جوندەۋ زاۋىتى جۇمىسكەرلەرى ەنەرگوكومبيناتتىڭ ىركىلىسسىز جۇمىسىن قامتاماسىز ەتۋ ءۇشىن مۇمكىندىگىنشە قىزمەت ەتۋدە. قولدانىستاعى قۇرال-جابدىقتاردىڭ توزۋىنا بايلانىستى توتەنشە جاعدايلار ورىن الاتىنى جاسىرىن ەمەس، الايدا ولار مۇمكىندىگىنشە قىسقا مەرزىمدە جويىلادى.

كومبينات اكىمشىلىگى وبلىس اكىمدىگىمەن بىرلەسىپ، كومبينات جۇمىسىن قارجىلاندىرۋ جانە قولداۋ ماقساتىندا جۇيەلى جوسپار نەگىزىندە بىرقاتار ءىس-شارالاردى جۇزەگە اسىرادى. الەۋمەتتىك جەلىلەردە تاراعان جالعان اقپارات ەل اراسىندا دۇربەلەڭ تۋعىزادى. ال بۇل ءوز كەزەگىندە مەكەمەنىڭ جۇمىسىنا كەرى اسەرىن تيگىزەدى، - دەدى «ماەك» جشس جوندەۋ زاۋىتى باس ينجەنەرىنىڭ ورىنباسارى قاليجان قابدۋلوۆ.

بەينەۇندەۋدى جولداعاندار «ماەك» جشس باسشىلىعى مەن كاسىپوداق وكىلدەرى جانە قىزمەتكەرلەردىڭ قاتىسۋىمەن كەزدەسۋلەر وتكىزىپ، ەڭبەك جاعدايلارىن جاقسارتۋ جانە ەڭبەكتى قورعاۋ ماسەلەلەرى تالقىلاناتىنىن اتاپ ءوتتى.

سونىمەن قاتار، جۇمىسشىلار نارازىلىعىن تۋدىرعان ماڭىزدى ماسەلەلەردى قاراۋ جانە شەشۋ ماقساتىندا ەنەرگوكومبيناتتا اي سايىن قوعامدىق كەڭەس وتكىزىلەدى جانە دە كاسىپورىن باسشىلىعى ازاماتتار مەن قىزمەتكەرلەردى اپتا سايىن قابىلداۋ جۇرگىزەدى.

ال قۇرىلعان telegram چات ارقىلى قىزمەتكەرلەر ءوز پىكىرلەرىن ءبىلدىرىپ، سۇراقتار قويا الادى. قاجەت كەزدە ءوز ۇسىنىستارىن بىلدىرەدى.

بۇگىنگى تاڭدا «ماەك» جشس مەكەمەسىندە 3627 ادام ەڭبەك ەتەدى. كاسىبي بىلىكتى قىزمەتكەرلەر كومبيناتقا قاراستى نىسانداردىڭ وندىرىستىك جابدىقتارىنا قاجەتتى جوندەۋ جۇمىستارىن سەنىمدى ءارى ءتيىستى دەڭگەيدە جۇرگىزەدى.

ءوڭىر حالقىن اۋىز سۋمەن قامتىپ وتىرعان ىرگەلى كاسىپورىننىڭ ىركىلىسسىز جۇمىسىن جۇرگىزىپ وتىرعان ۇجىمنىڭ باستى تالابى- مورالدىق-پسيحولوگيالىق احۋالدىڭ تۇراقتىلىعى.

قازىرگى تاڭدا «ماەك» جشس مەكەمەسىندە «ماەك-قازاتومونەركاسىپ» جەرگىلىكتى كاسىپوداق قب جانە «Yntymaq» باستاۋىش كاسىپوداق ۇيىمى قىزمەتىن جۇرگىزەدى. بەينەوتىنىشتەگى اۆتورلاردىڭ دا ءبىر بولىگى، وسى ۇيىمنىڭ قاتىسۋىشلارى.

ماەك-تەگى جۇمىسشىلاردىڭ ورتاشا جالاقىسى-271 000 تەڭگە. 2022 جىلعى ناۋرىزدا وندىرىستىك قىزمەتكەردىڭ جالاقىسى 30%-عا ءوستى (كومبينات باسقارماسىنىڭ باسشىلارى مەن قىزمەتكەرلەرىن قوسپاعاندا), سونداي-اق ءبىر لاۋازىمدىق جالاقى مولشەرىندە ساۋىقتىرۋ جاردەماقىلارىن جانە مەملەكەتتىك جانە كاسىپتىك مەرەكەلەرگە 10 جانە 25 اەك مولشەرىندە سىياقىلار تولەي وتىرىپ ماسەلە شەشىلدى.

2022 جىلعى جەلتوقساننان باستاپ كاسىپورىن باسشىلىعى كاسىپوداق وكىلدەرى مەن قىزمەتكەرلەردىڭ قاتىسۋىمەن تۇراقتى نەگىزدە كەزدەسۋلەر وتكىزەدى. وندا ەڭبەك جاعدايلارىن جاقسارتۋ جانە ەڭبەكتى قورعاۋ ماسەلەلەرى تالقىلانادى.

ماسەلەن كەزدەسۋلەردىڭ قورىتىندىسى بويىنشا مىناداي ماسەلەلەر شەشىلدى:

-2023 جىلعى 1 اقپاننان باستاپ جالاقىسى تومەن 540 قىزمەتكەردىڭ ايلىعى 35% - عا ءوستى.
-قىزمەتكەر قايتىس بولعان جاعدايدا بىرجولعى ماتەريالدىق كومەك مولشەرى 100 اەك-كە، ال قىزمەتكەردىڭ وتباسى مۇشەلەرىنە تولەنەتىن قارجى 30 اەك-كە دەيىن ۇلعايتىلدى.
-سونىمەن قاتار، العاشقى نەكە قيۋ كەزىندە 30 اەك مولشەرىندە بىرجولعى كومەك تولەمى ەنگىزىلدى;
- ەنەرگەتيكا كۇنىنە ارنالعان سىيلىقاقى مولشەرى 50 اەك-كە دەيىن ۇلعايتىلدى;
- رەسپۋبليكا كۇنى مەرەكەسىنە وراي 25 اەك مولشەرىندە سىيلىقاقى تولەۋ ەنگىزىلدى.

Abai.kz